စားသုံးသူရေးရာဦးစီးဌာန၊မန္တလေးတိုင်းဒေသကြီး၊မိတ္ထီလာခရိုင်ဦးစီးမှူးရုံးမှ ဦးစီးအရာရှိ နှင့် ဝန်ထမ်းများသည် (၂.၂.၂၀၂၂)ရက်နေ့ (၁၂:၀၀) နာရီအချိန်ခန့်တွင် မိတ္ထီလာမြို့နယ်၊ ပြည်တော်သာကျေးရွာရှိ (ထိုင်ဝမ်)ပြောင်းဖူးစိုက်ပျိုးရန်အတွက် မြေယာပြုပြင်နေသော တောင်သူ များနှင့် တွေ့ဆုံဆွေးနွေးခဲ့ပါသည်။
(ထိုင်ဝမ်)ပြောင်းဖူးစိုက်ပျိုးရန် မြေယာပြုပြင်နေသော တောင်သူများဖြစ်သည့် ဦးကျော်စွာ (၃)ဧက၊ ဦးဘိုတင်(၂)ဧကတို့၏ စိုက်ပျိုးရန်ပြုပြင်နေသော မြေဧကများတွင် တွေ့ဆုံဆွေးနွေး မေးမြန်းခဲ့ရာ တောင်သူများမှ ယခင်နှစ်ကတည်းက (ထိုင်ဝမ်)ပြောင်းဖူးစိုက်ပျိုးခဲ့ကြကြောင်း၊ ဖေဖော်ဝါရီလတွင် စတင်စိုက်ပျိုးပြီး ဧပြီလကုန်ပိုင်းတွင် ထွက်ရှိကြောင်းနှင့် အကျိုးအမြတ် များလည်း ရရှိခဲ့ကြကြောင်း စုံစမ်းသိရှိရပါသည်။
(ထိုင်ဝမ်)ပြောင်းဖူးစိုက်ပျိုးရာတွင် တန်းဆွဲစနစ်ဖြင့်(၁)ဧကလျှင် အပင်ရေ (၅၀၀၀)ခန့် အထိ စိုက်ပျိုးကြပြီး (၁)ပင်လျှင် (၁)ဖူးမှ (၂)ဖူးထိ ထွက်ရှိကြောင်းသိရှိရပါသည်။ ယခင်နှစ်က (၁)ဧကလျှင် မြေယာပြုပြင်ခြင်း၊ လုပ်သားခ၊ သွင်းအားစု၊ မျိုးစေ့တန်ဖိုးအပါအဝင် စုစုပေါင်းကုန်ကျ စရိတ်အနေဖြင့် (၃)သိန်း ကျော်ကုန်ကျခဲ့ကြောင်း၊ တောင်သူများထံမှ သိရှိရပါသည်။ (၁)ဧကလျှင် (ထိုင်ဝမ်) ပြောင်းဖူး (၇၅၀၀) ဖူးခန့်ထွက်ရှိပြီး၊ ထွက်ရှိလာသော ပြောင်းဖူးများကို ပွဲစားများမှ စိုက်ခင်းသို့လာရောက်၍ ထိပ်စ (၁)ဖူးလျှင်(၁၀၀)ကျပ်၊အလတ်စ(၁)ဖူးလျှင် (၈၅)ကျပ်၊ အောက်စ (၁)ဖူးလျှင် (၅၀) ကျပ်ဈေးနှုန်းဖြင့် ဝယ်ယူကြပြီး ဝင်ငွေအနေဖြင့် တစ်ဧကလျှင်(၇)သိန်း ဝန်းကျင် ရရှိခဲ့သည့် အတွက် အကျိုးအမြတ်အနေဖြင့် (၄)သိန်း နီးပါး ရရှိခဲ့ကြောင်းသိရှိရပါသည်။
ယခုနှစ်တွင် သွင်းအားစုအပါအဝင် ကုန်ကျစရိတ်များ မြင့်မားလာပြီး (၁)ဧက(၄)သိန်း ကျော် အထိကုန်ကျနိုင်သော်လည်း လက်ရှိ(ထိုင်ဝမ်)ပြောင်းဖူး ထိပ်စ(၁)ဖူးလျှင် (၁၅၀)ကျပ်၊ အလတ် စ(၁) ဖူးလျှင် (၁၀၀)ကျပ်၊ အောက်စ(၁)ဖူးလျှင် (၇၅)ကျပ် ဈေးကောင်းရရှိနေသည့်အတွက် ပြောင်းဖူးအထွက်နှုန်း ယခင်နှစ်များကဲ့သို့ အထွက်နှုန်းကောင်းလျှင် အကျိုးအမြတ်အနေဖြင့် လျော့ကျမသွားနိုင်ကြောင်း လေ့လာသုံးသပ်၍ (ထိုင်ဝမ်)ပြောင်းဖူး စိုက်ပျိုးခြင်းသည် စိုက်ပျိုးချိန် တိုတောင်းပြီး အကျိုးအမြတ်များလည်း အမှန်တကယ်ရရှိသည့်အတွက် အခြားတောင်သူ များလည်း စိုက်ပျိုးသင့်ကြောင်း ရေးသားလိုက်ရပါသည်။
DOCA(မန္တလေး)