မန္တလေးတိုင်းဒေသကြီး၊ မိတ္ထီလာခရိုင်၊ မိတ္ထီလာမြို့နယ် ရေချိုကျေးရွာသည် မိတ္ထီလာမြို့မှ ၁၀ မိုင်ခန့်ကွာဝေးသောရွာလေးတစ်ရွာ ဖြစ်ပါသည်။ရေချိုကျေးရွာသည် မိတ္ထီလာ-မြင်းခြံကားလမ်း ပေါ်တွင် တည်ရှိပါသည်။ရေချိုကျေးရွာသည် ဒေသထွက်ကုန်တမျိုးဖြစ်သည့် စာလေးခွေလုပ်ငန်းကို One Village One Product အဖြစ် တစ်ရွာလုံးနီးပါးထုတ်လုပ်လျက်ရှိရာ(၄.၂.၂၀၂၂) ရက်နေ့တွင် မိတ္ထီလာခရိုင် စားသုံးသူရေးရာဦးစီးဌာနမှ ဦးစီးအရာရှိနှင့်ဝန်ထမ်းများသည် ရေချိုကျေးရွာရှိ စာလေးခွေလုပ်ငန်းသို့ သွားရောက် ကွင်းဆင်းလေ့လာခဲ့ပါသည်။
ရေချိုစာလေးခွေလုပ်ငန်းမှာ မိသားစုတစ်နိုင်တစ်ပိုင် စီးပွားရေးလုပ်ငန်းဖြစ်ပြီး လုပ်ငန်းရှင်တစ်ဦးလျှင် စာလေးခွေ(၅) ခုပါ တစ်ထုပ်လျှင် (၅၀၀)ကျပ်ဖြင့်တစ်ရက်လျှင် အထုပ် (၂၀၀)ခန့် ထုတ်လုပ်နေကြောင်းသိရပါသည်။ ထွက်ရှိသော စာလေးခွေများကို မိတ္ထီလာ၊ မလှိုင် မြို့များနှင့် ကျေးရွာများသို့လည်း သွားရောက်ရောင်းချကြောင်းနှင့် ခရီးသွားပြည်သူများကလည်း အိမ်အပြန် လက်ဆောင်အဖြစ်ဝယ်ယူကြကြောင်း သိရှိရပါသည်။ စာလေးခွေပြုလုပ်ရာတွင် အဓိကကုန်ကြမ်းဖြစ်သော ကုလားပဲမှုန့်ကို မလှိုင်မြို့မှ ဝယ်ယူပြီး စားသုံးဆီကို မိတ္ထီလာမြို့မှ ဝယ်ယူရကြောင်း တစ်ရက် အမြတ်ငွေ(၁၀၀၀၀)ကျပ် နီးပါးခန့်ရရှိကြောင်းသိရပြီး စာလေးခွေအပြင် တို့ဟူးခြောက်ကြော်၊ ငါးမုန့်ကြော်များလည်း ရောင်းချကြောင်း သိရှိရ ပါသည်။
ရေချိုကျေးရွာနေပြည်သူများသည် စာလေးခွေလုပ်ငန်းကို မိသားစုတစ်နိုင်တစ်ပိုင်အဖြစ် အသက်မွေးလုပ်ကိုင်ကြပြီး တစ်ဖက်တစ်လမ်းမှလည်း တောင်သူလုပ်ငန်းနှင့် ဆိတ်၊သိုး မွေးမြူးရေး လုပ်ငန်းကိုလုပ်ကိုင်ပြီး အသက်မွေးဝမ်းကျောင်း ပြုလုပ်ကြကြောင်းသိရှိရပါသည်။ ရေချိုစာလေးခွေကို ယခုထက်ပိုမို စျေးကွက်ရရှိနိုင်ရေးအတွက် ခေတ်မှီထုပ်ပိုးမှုပုံစံများဖြင့် ပိုမိုသပ်ရပ်စွာထုပ်ပိုးပြီး နယ်ကိုယ်စားလှယ်များကို ဖြန့်ဝေနိုင်မည်ဆိုပါက ယခုထက်ပိုမို၍ ဈေးကွက်ဝယ်လိုအား ရရှိလာသကဲ့သို့ ထုတ်လုပ်မှုများပြားလာပြီး အလုပ်အကိုင်အခွင့်အလမ်းများပိုမို ရရှိနိုင်မည်ဖြစ်ကြောင်း ဆွေးနွေးပြောကြားခဲ့ပါသည်။
စားသုံးသူရေးရာဦးစီးဌာန
မန္တလေးတိုင်းဒေသကြီး