မန္တလေးတိုင်းဒေသကြီး၊ ကျောက်ဆည်ခရိုင်တွင် ကုလားပဲ(ဆောင်း)စိုက်ပျိုးမှုအနေဖြင့် ၂၀၂၀-၂၀၂၁ဘဏ္ဍာနှစ်တွင် (၈၆၉၆၈)ဧက စိုက်ပျိုးခဲ့ပြီး ၂၀၂၁-၂၀၂၂ ခုနှစ်တွင် ကျောက်ဆည်မြို့နယ်တွင် (၂၉၄၁၄)ဧက၊ စဉ့်ကိုင်မြို့နယ်တွင်(၁၅၀၁၂)ဧက၊ မြစ်သားမြို့နယ်တွင်(၃၁၅၅၆)ဧက၊ တံတားဦးမြို့နယ်တွင် (၁၁၆၀၁)ဧက၊ စုစုပေါင်း(၈၇၅၈၃)ဧက စိုက်ပျိုးနိုင်ခဲ့ရာ ယခင်နှစ်ထက်(၆၁၅)ဧကပိုမို စိုက်ပျိုးနိုင်ခဲ့ကြောင်း သက်ဆိုင်ရာဌာန၏ စာရင်းများအရ သိရှိရပါသည်။ ကုလားပဲကို မျိုးအနေဖြင့် (V2)မျိုးနှင့် ရိုးရိုးကုလားပဲလုံးသေးမျိုးဟူ၍ (၂)မျိုးရှိပြီး (V2)ကုလားပဲမျိုးကိုသာအများဆုံး စိုက်ပျိုးကြကြောင်းသိရှိရပါသည်။ (၁)ဧကလျှင် မျိုးစေ့(၁.၅-၂)တင်းနှုန်း ခန့်ကုန်ကျပြီး တောင်သူများအနေဖြင့် ကုလားပဲမျိုးကို မျိုးချန်စနစ်ဖြင့် စိုက်ပျိုးကြပြီး အချို့မှာစိုက်ပျိုးချိန်ရောက်မှ စျေးကွက်အတွင်း မှ ဝယ်ယူ၍စိုက်ပျိုးကြကြောင်း၊ ယခုနှစ်တွင် ကုလားပဲမျိုးတစ်တင်းလျှင် (၄၂၅၀၀/-)ကျပ်စျေးနှုန်းဖြင့် ဝယ်ယူစိုက်ပျိုးရပါသည်။ နှစ်စဉ် ကုလားပဲကို အောက်တိုဘာလနှင့် နိုဝင်ဘာလများတွင် စိုက်ပျိုးပြီး ယခုအချိန်တွင် ကျောက်ဆည်ခရိုင်အတွင်းရှိ ကုလားပဲ(ဆောင်း)စိုက်ဧကများမှာ စတင်ရိတ်သိမ်းလျက်ရှိပါသည်။ (၁)ဧကကုန်ကျစရိတ်အနေဖြင့် မျိုး၊ သွင်းအားစု၊ လုပ်သားခ စုစုပေါင်း(၁၈၀၀၀၀/-) ကျပ်ဝန်းကျင် ခန့်ကုန်ကျပြီး အထွက်နှုန်းအနေဖြင့်(၁၀-၁၂)တင်းခန့် ထွက်ရှိကြောင်း ၊ စျေးနှုန်းအနေဖြင့် ယခင်နှစ်တွင် ကုလားပဲ(V2)တစ်တင်းလျှင်(၂၇၀၀၀/-)ကျပ်၊ ကုလားပဲရိုးရိုးတစ်တင်းလျှင် (၂၄၀၀၀/-)ကျပ် စျေးနှုန်းရရှိခဲ့ပြီး ယခုနှစ်တွင်ကုလားပဲ(V2) တစ်တင်းလျှင်(၃၇၀၀၀/-)ကျပ်၊ ကုလားပဲ ရိုးရိုးတစ်တင်းလျှင် (၃၃၀၀၀/-)ကျပ် စျေးနှုန်းများဖြင့် အရောင်းအဝယ်ဖြစ်နေကြောင်း ယခင်နှစ်ထက် တောင်သူများအနေဖြင့် စျေးနှုန်းပိုမိုရရှိခဲ့ပြီး (၁)ဧက အကျိုးအမြတ်အနေဖြင့် (၂၂၇၀၀၀/-)ကျပ် ခန့်ရရှိကြောင်း တောင်သူတစ်ဦး၏ ပြောပြချက်အရသိရှိရပါသည်။
DOCA(မန္တလေး)