ဟင်္သာတခရိုင်နှင့် မြန်အောင်ခရိုင်သည် မိုးစပါးစိုက်ရာသီပြီးချိန်တွင် သီးထပ်အဖြစ် ပဲမျိုးစုံနှင့် အစေ့ထုတ်ပြောင်းများကို ဒေသအလိုက် ရေမြေပေါ်လိုက်၍ စိုက်ပျိုးကြပါသည်။ အစေ့ထုတ်ပြောင်းသည် မြေတွင်းအာဟာရဓာတ်ကို စုပ်ယူမှုများသောသီးနှံဖြစ်သည့်အတွက် နုန်းမြေ၊ နုန်းမြေစေး၊ သဲနုန်းမြေများ၌ စိုက်ပျိုးဖြစ်ထွန်းပါသည်။ အစေ့ထုတ်ပြောင်းကို နုန်းတင်မြေနုကျွန်းများ၊ သဲဆန်သောမြေများ၌ အများဆုံးစိုက်ပျိုးကြပြီး (၂၀၂၃-၂၀၂၄)ဘဏ္ဍာနှစ် စိုက်ပျိုးရာသီ၌ ဟင်္သာတမြို့နယ်တွင် ၃၁၁၆ဧက၊ ဇလွန်မြို့နယ်တွင် ၁၅၅၅၄ဧက၊ မြန်အောင်မြို့နယ်တွင် ၃၀၄၁ဧက၊ အင်္ဂပူမြို့ နယ်တွင် ၉၇၈၄ဧကနှင့် စုစုပေါင်း ပြောင်းစိုက်ဧက (၃၁၄၉၅)ဧကစိုက်ပျိုးခဲ့ပြီး (၂၀၂၂-၂၀၂၃) ဘဏ္ဍာနှစ်ထက် (၁၂၀၇) ဧကတိုးတက်စိုက်ပျိုးခဲ့ပါသည်။
ဟင်္သာတခရိုင်နှင့် မြန်အောင်ခရိုင်တွင် အစေ့ထုတ်ပြောင်းကို မိုးစပါးပြီးချိန်နှင့် မြစ်ရေကျချိန် အောက်တိုဘာလဆန်းတွင် အစောဆုံးသီးထပ်စိုက်ဧကအဖြစ် စိုက်ပျိုးကြသည့်ဒေသများ၌ ဇန်နဝါရီကုန် ဖေဖော်ဝါရီလဆန်းတွင် စတင်ထွက်ရှိပြီး မြေနုကျွန်းများ၌ ပဲမျိုးစုံနှင့်ကိုင်းသီးနှံ တစ်ကြိမ်စိုက်ပျိုးပြီးချိန် နိုဝင်ဘာလ နောက်ဆုံးပတ်တွင် နောက်ကျသီးထပ်စိုက်ဧကအဖြစ် ထပ်မံစိုက်ပျိုးကြသည့် ဒေသများတွင်မူ မတ်လကုန် ဧပြီလဆန်းတွင် စတင်ထွက်ရှိ ပါသည်။
ဟင်္သာတခရိုင်နှင့် မြန်အောင်ခရိုင်ရှိ ပြောင်းစိုက်တောင်သူများသည် မျိုးအဖြစ် CP 808,112၊ AWBA 612,625၊ GT 722, 822 မျိုးများကို အများဆုံးစိုက်ပျိုးကြပါသည်။ အစေ့ထုတ်ပြောင်းသည် လေဖြင့်ဝတ်မှုန်ကူးသည့် အပင်ဖြစ်သည့်အတွက် လေသွားလမ်းကြောင်အား ကန့်လန့်ဖြတ်စိုက်ပျိုးကြပြီး မိုးရေချိန် (၂၂-၂၅)လက်မရရှိရန်လိုအပ်သည့်အတွက် ဆောင်းရာသီတွင်စိုက်ပျိုးသော ဟင်္သာတခရိုင်နှင့် မြန်အောင်ခရိုင်တို့တွင် လစဉ်ရေတင်ပေးရပါသည်။ အစေ့ထုတ်ပြောင်းစိုက်ပျိုးရာတွင် (မြေပြင်၊ မျိုးစေ့၊ ပေါင်းလိုက်၊ ရေတင်၊ မြေဩဇာ၊ ဆေးကျွေး၊ ရိတ်ခြွေ) စသည်တို့အတွက် တစ်ဧကကုန်ကျစရိတ်မှာ ပျမ်းမျှ (၁၃၀၀၀၀၀) ကျပ်ခန့်ရှိပြီး သွင်းအားစုပိုမိုသုံးစွဲခြင်း၊ ရေတင်အကြိမ်ရေပိုများသည့် စိုက်ခင်းများတွင် တစ်ဧကကုန်ကျစရိတ်မှာ ၁၅၀၀၀၀၀သိန်းကျပ် ခန့်ကုန်ကျနိုင်ပါသည်။ ဟင်္သာတခရိုင်နှင့် မြန်အောင်ခရိုင်တို့တွင် အစေ့ထုတ်ပြောင်းတစ်ဧကထွက်နှုန်းမှာ ပျမ်းမျှ တင်း(၁၀၀) ကျင်ခန့်ရှိသည့်အတွက် ၂၀၂၄ခုနှစ်၊ မတ်လကုန်တွင် အစေ့ထုတ်ပြောင်းတစ်တင်းလျှင် ကွင်းပေါက်ဈေး (၁၈၅၀၀)ကျပ်ဖြင့်တွက်ပါက ပြောင်းတစ်ဧကအတွက် ၁၈၅၀၀၀၀ကျပ်ရရှိနိုင်ပြီး၊ အကျိုးအမြတ်အနေဖြင့် တစ်ဧကလျှင် ခြောက်သိန်းကျပ်ခန့်ရရှိနိုင်ပါသည်။
ဟင်္သာတခရိုင်နှင့် မြန်အောင်ခရိုင်တို့မှထွက်ရှိသော အစေ့ထုတ်ပြောင်းများကို ယခုအခါ ရန်ကုန်တိုင်းဒေသကြီး၊ မှော်ဘီမြို့နယ်ရှိ အစာစပ်စက်ရုံများ၊ မင်္ဂလာဒုံမြို့နယ်ရှိ အစာစပ်စက်ရုံများသို့ နယ်ဝယ်လက်များမှတစ်ဆင့် တင်ပို့ရောင်းချခြင်းနှင့်၊ ရွှေပြည်သာမြို့နယ်ရှိ အစေ့ထုတ်ပြောင်းသိုလှောင်ရုံများသို့လည်း တင်ပို့ရောင်းချလျက်ရှိပါသည်။
ယခင်နှစ်ကာလတူ ၂၀၂၃ခုနှစ်၊ ဧပြီလဆန်းတွင် အစေ့ထုတ်ပြောင်းတစ်တင်းလျှင် ကွင်းပေါက်ဈေး ၂၂၅၀၀ကျပ်ရှိခဲ့သည့်အတွက် ယခုနှစ် ပြောင်းစိုက်တောင်သူများအနေဖြင့် ယခင်နှစ်ဈေးနှုန်းနှင့်နှိုင်းယှဉ်ပါက တစ်တင်းလျှင် (၄၀၀၀) ကျပ်ခန့်လျော့နည်းရလျက်ရှိပါသည်။ မြန်အောင်ခရိုင်၊ မြန်အောင်မြို့နယ်၊ သပြေကုန်းကျေးရွာရှိ ပြောင်းစိုက်တောင်သူလည်းဖြစ်၊ မြန်မာနိုင်ငံပြောင်းလုပ်ငန်းအသင်းနာယကလည်းဖြစ်သူ ဦးမင်းခိုင်က ယခုနှစ်တွင် အစေ့ထုတ် ပြောင်းဈေးမှာ စပေါ်ချိန်ကတည်းက တစ်တင်းလျှင် ကွင်းပေါက်ဈေး (၁၈၅၀၀) ကျပ်၊ ဟင်္သာတကုန်စည်ဒိုင်ပေါက်ဈေး (၁၉၅၀၀) ကျပ်ခန့်ဖြင့် ဈေးငြိမ်နေသဖြင့် စိုက်ဧကများသည့် တောင်သူများသာအကျိုးအမြတ်ရရှိကြပြီး ဧကနည်းစိုက်ပျိုးသည့် တောင်သူများအနေဖြင့် ထင်သလောက် အကျိုးအမြတ်မရရှိကြကြောင်းပြောကြားခဲ့ပါသည်။ ယခုအခါ လက်ရှိပေါက်ဈေးကို မကြိုက်သောကြောင့် မရောင်းကြသေးသော အစေ့ထုတ်ပြောင်းသိုလှောင်ထားသူ တောင်သူကြီးများနှင့် သီးထပ်နောက်ကျစိုက်တောင်သူများကပါ ယခင်နှစ်ကဈေးနှုန်းကဲ့သို့ ပြန်ဖြစ်လာမလားဟု မျှော်လင့်လျက်ရှိကြောင်း သုံးသပ်တင်ပြလိုက်ရပါသည်။
DOCA(ဧရာဝတီ)