မြန်မာပြည်ရဲ့ဆန်အိုးကြီးလို့ တင်စားခေါ်ဝေါပြီး ဆန်စပါးအများဆုံးစိုက်ပျိုးထွက်ရှိရာ နေရာ ဖြစ်သည့် ဧရာဝတီတိုင်းဒေသကြီးတွင် နွေစပါးကို နိုဝင်ဘာလ လဝက်လောက်တွင် စတင် စိုက်ပျိုး ကြပြီး ဧပြီလ ၊ လအစပိုင်းတွင် ရိတ်သိမ်းလျက်ရှိရာ ဒေသပေါက်ဈေးနှုန်းအနေဖြင့် ရက်(၉၀) စပါး ပေါင်(၅၀) ၁ တင်းလျှင် ကျပ် ၂၂၀၀၀/- ၊ တင်း ၁၀၀ လျှင် ငွေကျပ် သိန်း ၂၀ ကျော် ပေါက်ဈေးရှိပြီး ၊ သီးထပ်ရင် ပေါင်(၅၀) ၁ တင်းလျှင် ကျပ် ၁၆၀၀၀/-၊ တင်း ၁၀၀ လျှင် ငွေကျပ် ၁၆ သိန်းကျော် ရှိကြောင်းသိရှိပါသည်။
ကန်ကြီးထောင့်မြို့နယ်အနေဖြင့် စိုက်ပျိုး ဧက ၇၆၀၂၅ ဧက ၊ ရိတ်သိမ်းဧက ၇၂၁၆၇ ဧက ၊ တစ်ဧက ထွက်နှုန်း ၁၀၉.၂၁ ၊ စုစုပေါင်းအထွက်နှုန်း ၇၈၈၁၃၅၈ တင်းထွက်ရှိပြီး ၊ ရက်(၉၀)စပါး ၊ သီးထပ်ရင်စပါးကို များဆုံးစိုက်ပျိုးကြပြီး ၊ အခြားစပါးများကို အနည်းငယ်သာ စိုက်ပျိုးကြကြောင်း သိရှိရပြီး ယခုနှစ်တွင် စပါးဈေးကောင်းမွန် တာကြောင့် နွေစပါးစိုက်တောင်သူများမှာ ယခင်နှစ် ထက်ပို၍ နွေစပါးကို ကွင်းပြည့်၊ ကွက်ပြည့် စိုက်ပျိုးလာကြကြောင်း ၊ စိုက်ပျိုးစရိတ်မှာလည်း ယခင်နှစ်များထက် ပိုမိုမြင့်တက်ကြောင်း ဧရာဝတီတိုင်းဒေသကြီး ၊ ပုသိမ်ခရိုင် ၊ ကန်ကြီးထောင့်မြို့နယ် စပါးစိုက်တောင်သူ ဦးအောင်ကျော်ဖြိုးထံမှ သတင်းရရှိပါသည်။
DOCA(ဧရာဝတီ)