ရေးမြိုနယ်သည် မွန်ပြည်နယ်၏ တောင်ဘက်အစွန်းတွင်ရှိသောမြို့နယ်တစ်ခုဖြစ်သည်။ သီးစုံဥယျာဥ်ခြံများပေါများပြီး ဒူးရင်းသီးစိုက်မျိုးထုတ်လုပ်မှုတွင်လည်း အဓိကကျသော မြို့တစ်မြို့ဖြစ်သည်။ ရေးမြို့နယ်တွင် ဒူးရင်းသီး စိုက်ဧရိယာ(၂၃၄၄)ဧကရှိပြီး အထွက်နှုန်းမှာ တစ်ဧကလျှင် (၂၄၇၈) လုံးထွက်ရှိရာ စုစုပေါင်းထွက်ရှိမှု (၅၈၀၈၄၃၂) လုံးထွက်ရှိကြောင်း မြို့နယ်မြေစာရင်းဦးစီးဌာနမှ သိရှိရသည်။
ရေးမြို့နယ်မှထွက်ရှိသည့် ဒူးရင်းသီးများသည် ဒေသမျိုးများဖြစ်၍ အရသာကောင်းပြီး စားသုံးသူများကြိုက်နှစ်သက်ကြသဖြင့် မြို့နယ်အသီးသီးမှကုန်သည်များ လာရောက်၀ယ်ယူပြီး မော်လမြိုင်၊ရန်ကုန်၊မန္တလေးမြို့ကြီးများသို့တင်ပို့ရောင်းချလျက်ရှိသည်။ မြို့နယ်အတွင်း၌လည်း အ၀ယ်ဒိုင်များဖွင့်လှစ်လျက်ရှိသဖြင့် ခြံရှင်များအနေဖြင့် အလွယ်တကူလာရောက် ရောင်းချနိုင်ကြောင်း သိရှိရသည်။
ဒူးရင်းသီးထွက်ရှိချိန်မှာ ဧပြီလမှဇွန်လအကုန်ထိဖြစ်ပြီး ဧပြီလပိုင်းထွက်သည့်ဒူးရင်းသီးများမှာ တစ်လုံးလျှင် ပျမ်းမျှ၈၀၀၀ကျပ်မှ ၁၂၀၀၀ကျပ်ထိရရှိပြီး မေလတွင် တစ်လုံးပျမ်းမျှဈေးနှုန်းမှာ ၆၀၀၀ကျပ်မှ ၉၀၀၀ကျပ်အထိရရှိကြောင်း ခြံရှင်များထံမှ သိရှိရပါသည်။ ယခုကဲ့သို့ ဒူးရင်းသီးများ စျေးကောင်းများရရှိသဖြင့် ခြံရှင်များအနေဖြင့် အကျိုးအမြတ်များခံစားရကြောင်း သိရှိရပါသည်။
DOCA(မွန်)