စစ်ကိုင်းတိုင်းဒေသကြီး၊ စားသုံးသူရေးရာဦးစီးဌာန၊ ကျွန်းလှမြို့နယ်တာဝန်ခံသည် ကျွန်းလှမြို့နယ်တွင် အသားတိုးဝက်များမွေးမြူရေးလုပ်ငန်းဆောင်ရွက်နေသည့် ဦးကျော်သူနှင့်သွားရောက်တွေ့ဆုံခဲ့ရာ ကန့်ဘလူမြို့နှင့် ကျွန်းလှမြို့ဒေသများ၌ မျိုးမြင့်ဝက်များဖြစ်သည့် လင်းဒရေစ့်၊ ပီယာထရိန်း ၊ ဂျူး စသည့်ဝက်ပေါက် တစ်လခွဲသားလေးများကို တစ်ကောင်လျှင် (၁)သိန်းကျပ်နှုန်းဖြင့် ရောင်းချလျက်ရှိကြောင်းသိရှိရပါသည်။
၎င်းဝက်ပေါက်လေးများမွေးမြူရာတွင် ဝက်ခြံများကို ကွန်ကရစ်အခင်းများဖြင့် လေဝင်လေထွက်ကောင်းမွန်သော အဆောက်အဦများနှင့် သန့်ရှင်းသပ်ရပ်စွာမွေးမြူဆောင်ရွက်ထားရန်လိုအပ်ကြောင်း၊ ဝက်ပေါက်ကလေးများကို အစာအိတ် ဒီဟတ်အမျိုးအစား နံပါတ် 3825 အိတ်၊ နံပါတ် 3835 တစ်အိတ်၊ 3845 တစ်အိတ်နှင့် 3855 တစ်အိတ်၊ စုစုပေါင်း ဒီဟတ်အမျိုးအစား အစာအိတ် (၄)အိတ်ကုန်သည်အထိကျွေးရပြီး အစာအိတ်တစ်အိတ်လျှင် (၅၁၇၀၀)ကျပ်နှင့် (၅၂၀၀၀)ကျပ်နှုန်းခန့်ရှိသဖြင့် အစာအိတ် (၄)အိတ်ကုန်ကျစရိတ်မှာ (၂၀၈၀၀၀)ကျပ်နှင့် ဝဲဆေး၊ သန်ချဆေးထိုးပါက (၁၀၀၀၀) ကျပ်ခန့်ထပ်မံကုန်ကျပြီး ဝက်ပေါက်တစ်ကောင်ဝယ်ယူလျှင် ကျပ်(၁၀၀၀၀၀)နှင့် စုစုပေါင်း ဝက်တစ်ကောင်၏ ကုန်ကျစရိတ်မှာ ကျပ်(၃၂၀၀၀၀)ခန့်ကုန်ကျမည်ဖြစ်ကြောင်းသိရှိရပါသည်။
ဝက်၏အသက်နှင့် အရွယ်အစားမှာ ၃လခွဲ/ ၄လသားရှိပါက ရောင်းတန်းဝင် အသားတိုးဝက်ဖြစ်ပြီး အလေးချိန်အားဖြင့် ပိဿာ(၅၅/၆၀)ထွက်ရှိလာကြောင်း၊ ယခုအချိန်တွင် ဝက်သားများ ဈေးကောင်းရရှိနေသဖြင့် အရှင်ဝက်သားဈေးကတ္တားဈေးမှာ တစ်ပိဿာလျှင် (၉၈၀၀/၁၀၀၀၀) ကျပ်နှုန်းဖြင့်ရောင်းချရကြောင်း၊ ဝက်တစ်ကောင်ကို တစ်ပိဿာလျှင် (၉၈၀၀)ကျပ်နှုန်းဖြင့် ပျမ်းမျှတွက်ကြည့်မည်ဆိုပါက ပိဿာချိန် (၅၅)ပိဿာထွက်ရှိပြီး ကျပ်(၅၃၉၀၀၀)ရရှိကာ ဝက်တစ်ကောင်၏ ကုန်ကျစရိတ် (၃၂၀၀၀၀)ကျပ်နှင့်နှိုင်းယှဉ်ကြည့်ပါက ဝက်တစ်ကောင်၏ အကျိုးအမြတ်ငွေမှာ (၂၁၉၀၀၀)ကျပ်အထိ အမြတ်ငွေများရရှိပြီး ဝက်အကောင်ရေများများမွေးမြူနိုင်ပါက အကျိုးအမြတ်များစွာရရှိမည်ဖြစ်၍ တစ်နိုင်တစ်ပိုင်မှသည် စီးပွားဖြစ်သည်အထိ မွေးမြူသင့်ကြောင်း အသားတိုးဝက်မွေးမြူသူတစ်ဦး၏ ပြောပြချက်အရသိရှိရပါသည်။
DOCA(စစ်ကိုင်း)