မကွေးတိုင်းဒေသကြီး၊ XXXXXX မြို့နေ ဦးXXXXXX သည် အွန်လိုင်းမှတစ်ဆင့် ပဲခူးမြို့၊ ရွှေမောဓောဘုရားအနီးရှိ XXXXXX အမည်ဖြင့် မီနီအိုးဝေ ရောင်းဝယ်ရေးဆိုင်မှ သုံးဘီးတစ်စီးအားမှာယူခဲ့ရာ စရံငွေ(၃)သိန်းကျပ်အား Wave Money ဖြင့် (၁၅.၁.၂၀၂၄)ရက်နေ့တွင် ငွေလွှဲပေးပို့ခဲ့ကြောင်း၊ ငွေလွှဲပြီး (၁)နာရီအကြာတွင် ဖုန်းနံပါတ် XXXXXX ဖြင့် XXXXXX မှဟုဆိုကာ ဦး XXXXXX မှ XXXXXX မြို့သို့ ပို့ဆောင်ပေးရမည့် သုံးဘီးအား ကားပေါ်သို့ တင်ပေးပြီးဖြစ်ကြောင်း၊ တန်ဆာခပေးချေ ထားသည့် ချလံအား ပေးပို့လာကာ ကျန်ရှိနေသော ငွေကျပ်(၂၆)သိန်းအား ထပ်မံပေးပို့ပေးပါရန် တောင်းဆိုလာပါ သဖြင့် ငွေကျပ်(၂၆)သိန်းအား Wave Money ဖြင့် ငွေလွှဲပေးပို့ခဲ့ကြောင်း၊ ကားရောက်ရှိရမည့်အချိန်တွင် ဆက်သွယ်လာခြင်းမရှိပါသဖြင့် ဦး XXXXXX အား ဆက်သွယ်ရာတွင် ၎င်း၏ဖုန်းအား block သွားသောကြောင့် ငွေထုတ်ယူရာ နေရာသို့သိရှိနိုင်ရန် Wave Call Center သို့ ဆက်သွယ်မေးမြန်းခဲ့ရာ မန္တလေးမြို့၊ XXXXXX မြို့နယ်၊ XXXXXX လမ်းကြား၊ XXXXXX စားသောက်ဆိုင်မှ ထုတ်ယူသွားကြောင်း သိရှိရသည့်အတွက် ထိုကဲ့သို့သော လိမ်လည်ခံရသည့် ဖြစ်စဉ်မျိုး ထပ်မံပေါ်ပေါက်မလာစေရန် (၉.၄.၂၀၂၄)ရက်နေ့တွင် စားသုံးသူရေးရာဦးစီးဌာနရုံးသို့ ဖုန်းဖြင့် ဆက်သွယ်တိုင်ကြားလာပါသည်။
တိုင်ကြားမှုနှင့်စပ်လျဉ်း၍ ဌာနမှ စားသုံးသူကာကွယ်ရေးဥပဒေနှင့်ကိုက်ညီမှု ရှိ/မရှိ စိစစ်လက်ခံခြင်းများဆောင်ရွက်ခဲ့ပြီး ပဲခူးတိုင်းဒေသကြီး၊ စားသုံးသူရေးရာဦးစီးဌာနသို့ တိုင်ကြားသူ ပေးပို့ခဲ့သည့် လိပ်စာဖြစ်သော ပဲခူးမြို့ ရွှေမောဓော ဘုရားအနီးတွင် XXXXXX အမည်ဖြင့် သုံးဘီး ရောင်းဝယ်သည့်ဆိုင် မြေပြင်နေရာတွင် ရှိ/မရှိနှင့် XXXXXX ဂိတ်အနေဖြင့် (၁၅.၁.၂၀၂၄)ရက်နေ့တွင် ပဲခူးမှ တောင်တွင်းကြီး မြို့သို့ သုံးဘီးတင်ပို့မှု ရှိ/မရှိ စုံစမ်းပေးနိုင်ပါရန် ညှိနှိုင်းစာပေးပို့ခဲ့ရာ ပဲခူးမြို့ ရွှေမောဓောဘုရားအနီးတွင် XXXXXX အမည်ဖြင့် သုံးဘီးရောင်းဝယ်သည့်ဆိုင်မရှိပါကြောင်းနှင့် သုံးဘီး တင်ပို့ခဲ့သည့် XXXXXX အမည်ဖြင့် ဂိတ်မှာလည်း ဖွင့်လှစ်ထားခြင်းမရှိပါကြောင်း ပြန်ကြားလာပါသည်။
(၂၆.၄.၂၀၂၄)ရက်နေ့တွင် မန္တလေးတိုင်းဒေသကြီး၊ စားသုံးသူရေးရာဦးစီးဌာနသို့ လိမ်လည်သူ ငွေထုတ်ယူခဲ့သော မန္တလေးမြို့၊ XXXXXX လမ်းကြားရှိ XXXXXX စားသောက်ဆိုင်အား တိုင်ကြားမှု နှင့်စပ်လျဉ်း၍ စုံစမ်းစစ်ဆေးပေးနိုင်ရေး ညှိနှိုင်းစာပေးပို့ခဲ့ရာ မြေပြင်ကွင်းဆင်းခဲ့မှုအရ ၎င်းစားသောက် ဆိုင်မှာ မရှိပါကြောင်း ပြန်ကြား လာပါသည်။
ဌာနမှ (၂၀.၅.၂၀၂၄)ရက်နေ့တွင် တိုင်ကြားသူထံဆက်သွယ်၍ တိုင်ကြားစာပါ စီးပွားရေး လုပ်ငန်း ဆောင်ရွက်နေသည့် လိပ်စာသို့ သွားရောက်စုံစမ်းရာတွင် တိုင်ကြားခံရသည့် စီးပွားရေး လုပ်ငန်းနှင့် စီးပွားရေးလုပ်ငန်းရှင်အား မတွေ့ရှိရပါသဖြင့် အမှုအား ပိတ်သိမ်းရမည်ဖြစ်ပါကြောင်း၊ လုပ်ငန်းမှတ်ပုံတင်မရှိပါက အွန်လိုင်းမှတစ်ဆင့် ဝယ်ယူအသုံးမပြုသင့်ကြောင်း၊ စီးပွားရေးနှင့်ကူးသန်း ရောင်းဝယ် ရေးဝန်ကြီးဌာန၊ ကုန်သွယ်ရေးဦးစီးဌာနမှလည်း အွန်လိုင်းစနစ်ဖြင့် ဝယ်ယူအသုံးပြု မည်ဆိုပါက မှတ်ပုံတင်လက်မှတ်ရရှိပြီးသော လုပ်ငန်းရှင်များမှတစ်ဆင့်သာ ဝယ်ယူအသုံးပြုသင့် ကြောင်း သတိပြုဆင်ခြင်ဖွယ်တို့ကို အသိပေးရှင်းလင်းဆွေးနွေးခဲ့ပြီး တိုင်ကြားသူမှလည်း စိတ်ကျေနပ် မှုရရှိသဖြင့် အမှုအားပိတ်သိမ်းနိုင်ခဲ့ပါသည်။
DOCA(မကွေး)