ရန်ကုန်တိုင်းဒေသကြီးနေ တိုင်ကြားသူတစ်ဦးသည်  ခရီးသွားဝန်ဆောင်မှုကုမ္ပဏီတစ်ခုထံမှ ပြည်ပခရီးအတွက် သံရုံး တွင် ဗီဇာတင်ပေးရန် ဝန်ဆောင်ခ USD 300$ အား ပေးသွင်းခဲ့ပြီး ဝန်ဆောင်မှု မပေးနိုင်သောကြောင့် ပေးသွင်းထားသော ဝန် ဆောင်ခကို ပြန်လည်တောင်းခံရာ ငွေပြန်မပေးခြင်း၊ ခြိမ်း  ခြောက်ပြောဆိုခြင်းများ ပြုလုပ်နေသောကြောင့် စားသုံးသူ ရေးရာဦးစီးဌာနသို့ ဆက်သွယ်တိုင်ကြားလာပါသည်။

ဖြေရှင်းဆောင်ရွက်မှုအခြေအနေ။     တိုင်ကြားမှုနှင့်ပတ်သက်၍ ဌာနမှ တာဝန်ရှိသူများက  ခရီးသွား ဝန်ဆောင်မှုကုမ္ပဏီမှ တာဝန်ရှိသူများနှင့် တိုင်ကြားသူတို့အား ခေါ်ယူ၍ စေ့စပ်ညှိနှိုင်းမှုများ ဆောင် ရွက်ပေးခဲ့ရာ ခရီးသွားကုမ္ပဏီက တိုင်ကြားသူပေးသွင်းခဲ့သည့် USD 300 $ နှင့် ညီမျှသည့် မြန်မာ ငွေကျပ် ၈၉၄,၀၀၀/- (ရှစ်သိန်းကိုးသောင်း လေးထောင်တိတိ)ကို ၂၇-၁-၂၀၂၅ ရက်နေ့တွင် ငွေသား ဖြင့် ပြန်လည်ပေးအပ်ရန်၊ လုပ်ငန်းရှင်မှ တိုင်ကြားသူအား တောင်းပန်သွားရန်၊ တိုင်ကြားသူမှလည်း လုပ်ငန်းရှင်ပေးအပ်သည့် ငွေကြေးနှင့်တောင်းပန်မှုကို ကျေနပ်လက်ခံပါကြောင်းနှင့် နောက်နောင် များတွင် လုပ်ငန်းရှင်နှင့် တိုင်ကြားသူ နှစ်ဦးနှစ်ဖက်တို့သည် ယခုဖြစ်စဉ်နှင့်ပတ်သက်၍ လူမှုကွန် ယက် စာမျက်နှာများပေါ်တွင် တိုက်ရိုက်ဖြစ်စေ၊ သွယ်ဝိုက်၍ဖြစ်စေ ရေးသားခြင်းများ မပြုလုပ်ရန် သဘောတူညီခဲ့ကြပြီး ၂၇-၁-၂၀၂၅ ရက်နေ့တွင် ခရီးသွားဝန်ဆောင်မှု ကုမ္ပဏီမှတာဝန်ရှိသူက တိုင် ကြားသူထံ ငွေကျပ် ၈၉၄,၀၀၀/- (ရှစ်သိန်း ကိုးသောင်း လေးထောင် တိတိ)ကို ဌာနမှတာဝန်ရှိသူများ ရှေ့မှောက်တွင် ပေးအပ်ခဲ့သဖြင့် တိုင်ကြားသူမှလည်း ကျေနပ်မှုရရှိပါသောကြောင့် တိုင်ကြားမှုကို စားသုံးသူကာကွယ်ရေးဥပဒေအရ စေ့စပ်ညှိနှိုင်းခြင်းနည်းလမ်းဖြင့် ဖြေရှင်းဆောင်ရွက်ခဲ့ပါသည်။

DOCA(CICC)

၁။      စစ်ကိုင်းတိုင်းဒေသကြီးနေ တိုင်ကြားသူတစ်ဦးသည် Facebook Page တွင် ရောင်းချနေသော ယာဉ်လိုင်းတစ်ခု၏ (မန္တလေး-မော်လမြိုင်) ကားလက်မှတ် နှစ်စောင်ကို ငွေကျပ် ၈၂,၀၀၀/- ဖြင့် ဖုန်းနံပါတ် ၀၉-၆၇၇၀၉၇၀၈၆ သို့ Kpay ဖြင့် ငွေ ပေးချေဝယ်ယူခဲ့ရာ ငွေပေးချေပြီးနောက် ဆက်သွယ်မရတော့သ ဖြင့် စားသုံးသူရေးရာဦးစီးဌာနသို့ ဆက်သွယ်တိုင်ကြားလာပါ သည်။

ဖြေရှင်းဆောင်ရွက်မှုအခြေအနေ။     တိုင်ကြားမှုနှင့်ပတ်သက်၍ စစ်ကိုင်းခရိုင်ဦးစီးမှူးရုံးမှ တာဝန်ရှိ သူများက Online မှ တစ်ဆင့်ရောင်းချနေသော ဖုန်းနံပါတ် ၀၉-၆၇၇၀၉၇၀၈၆ သို့ ဆက်သွယ်၍ ခရီးသွားအသွင်ဆောင်ပြီး လက်မှတ်ဖြတ်ခဲ့ရာ K pay မှ ငွေလွှဲပြီး Viber သို့ ဆက်သွယ်ရန် ပြောကြား နေချိန် တိုင်ကြားမှုကိစ္စရပ်အား  ပြောကြားရာ၌ ဖုန်းချသွားခဲ့ပြီး အခြားဖုန်းများဖြင့် အကြိမ်ကြိမ် ဆက်သွယ်သော်လည်း တိုင်ကြားသော လက်မှတ်ကိစ္စ ပြောသည်နှင့်ဖုန်းချသွားခဲ့ပါသည်။ ဌာနမှ တာဝန်ရှိသူများက တိုင်ကြားခံရသည့်ယာဉ်လိုင်းဂိတ်မှူးထံသို့ ဆက်သွယ်မေးမြန်းခဲ့ရာ ၎င်းတို့ ကား ဂိတ်သည် facebook မှတစ်ဆင့် လက်မှတ်ရောင်းချခြင်းမရှိကြောင်း၊ ဂိတ်နာမည်အား အလွဲသုံးစား လုပ်၍ ရောင်းချနေခြင်းကိုလည်း သိရှိထား၍ မင်္ဂလာဒုံမြို့မရဲစခန်းတွင် အမှုဖွင့်ထားပါကြောင်း၊ ၎င်းတို့ ဂိတ်အမည်နှင့်ဖွင့်ထားသော အကောင့်မှလည်း လက်မှတ်များ လိမ်လည်ရောင်းချနေမှုကို အများပြည်သူများသိရှိရန် ရုပ်ရှင်သရုပ်ဆောင်များဖြင့် ဇာတ်လမ်းတိုရိုက်ကူးပြီး တင်ပြထားကြောင်း စုံစမ်းသိရှိရသည့်အတွက် တိုင်ကြားသူသို့ ဖုန်းဖြင့်ဆက်သွယ်၍ ရှင်းလင်းပြောကြားခဲ့ရာ တိုင်ကြားသူ မှ လိမ်လည်ခြင်းခံရသည်ကိုသိရှိရ၍ တိုင်ကြားမှုကို ပိတ်သိမ်းလိုကြောင်း ပြောကြားလာသဖြင့် ဌာနမှ တာဝန်ရှိသူက စားသုံးသူအနေဖြင့် အွန်လိုင်းပေါ်မှတစ်ဆင့် ဈေးဝယ်ခြင်းများ ဆောင်ရွက်ပါက ပစ္စည်းဝယ်ယူလိုသည့် online page ၏ ခိုင်မာမှု၊ like အရေအတွက်ရရှိထားမှု၊ လိပ်စာအတိအကျနှင့် ဖုန်းနံပါတ်များ ဖော်ပြထားခြင်းရှိ/မရှိတို့အား စစ်ဆေးခြင်း၊ အိမ်ရောက်ငွေချေစနစ်ဖြင့် ရောင်းချ သည့် ပစ္စည်းများကိုသာ ဦးစားပေးဝယ်ယူခြင်းနှင့် delivery မှတစ်ဆင့် ပစ္စည်းရောက်ရှိလာချိန်တွင် ပစ္စည်းအား ဖွင့်ဖောက်စစ်ဆေးအတည် ပြုပြီးမှသာလက်ခံခြင်း၊ အွန်လိုင်းမှတ်ပုံတင် ဆောင်ရွက် ထားမှု ရှိ/မရှိတို့ကိုစစ်ဆေးခြင်း စသည့်အချက်အလက်များအား စိစစ်ပြီးမှသာ ဝယ်ယူခြင်းပြုပါရန် တိုင်ကြားသူအား အသိပညာပေးဆွေးနွေးပြောကြားခဲ့ပြီး တိုင်ကြားမှုကို ပိတ်သိမ်းဆောင်ရွက်ခဲ့ပါ သည်။

DOCA(CICC)

          စလင်းမြို့(xxx)လမ်းနေ ဒေါ်(xxx)သည် (၁၀.၁.၂၀၂၅)ရက်နေ့တွင် MBB Myanmar Broad Band(B2B Company) Facebook Page ၏ Chat Box မှတဆင့် B2B 1month Unlimited Free အားဝယ်ယူခဲ့ရာ ၎င်းကုမ္ပဏ္ဏီမှ ဖုန်းနံပါတ်၊ အမည်၊ လိပ်စာ၊ မှတ်ပုံတင်အမှတ်တို့အား တောင်းခံခဲ့ပြီး B2B Register ပြုလုပ် ရမည်ဖြစ်ပါ၍ K Pay No.(xxx)ထံသို့ ငွေကျပ်(၁၈၀၀၀)အား ပေးပို့စေခဲ့ပါသည်။ ကုမဏ္ဏီမှ (၂၄)နာရီ အတွင်း SMS ရောက်ရှိလာပါက စတင်အသုံးပြု၍ရပြီဖြစ်ကြောင်း ပြောကြားခဲ့ သော်လည်း (၁၀.၁.၂၀၂၅) ရက်နေ့၊ နေ့လယ်(၁၄း၀၇)မိနစ်အချိန်တွင် ထပ်မံ၍ မှတ်ပုံတင်နံပတ် တောင်းခံခဲ့ပါသည်။ ထို့နောက် AnyDesk Remote Desktop Software အား Download ၍ Accept နှင့် Start Now Click လုပ်ခိုင်းပြီး Link တစ်ခုထဲသို့ ဝင်ရောက်၍ Google Form ဖြည့်ခိုင်းခဲ့ရာတွင် ဖုန်းမှ ဒေတာအချက်အလက်များအား Share သည့်ပုံစံမျိုးဖြစ်နေ၍  Page Chat Box သို့မေးမြန်းရာ၌ ပြန်လည်ဖြေကြားခြင်းမရှိဘဲ မိမိ အကောင့်အား ဘလော့သွားသောကြောင့် ထိုကဲ့သို့သော လိမ်လည်မှု ဖြစ်စဉ်မျိုး ထပ်မံမဖြစ်ပေါ်စေရေး ဖြေရှင်းဆောင်ရွက်ပေးနိုင်ပါရန် (၁၃.၁.၂၀၂၅)ရက်နေ့ တွင် မကွေးတိုင်းဒေသကြီး၊ စားသုံးသူရေးရာဦးစီးဌာနသို့ ဆက်သွယ်တိုင်ကြားလာပါသည်။

          ဌာနမှ တိုင်ကြားမှုနှင့်ပတ်သက်၍ စားသုံးသူကာကွယ်ရေးဥပဒေအရ စားသုံးသူထိခိုက်နစ်နာမှု ရှိ/ မရှိ စိစစ်ခဲ့ပြီး (၁၃.၁.၂၀၂၅)ရက်နေ့တွင် Myanmar Broad Band (MBB) B2B Company ၏ Email လိပ်စာ သို့ တိုင်ကြားမှုနှင့်စပ်လျဉ်း၍ ညှိနှိုင်းဖြေရှင်းပေးနိုင်ပါရန် အကြောင်းကြားစာပေးပို့ခဲ့ရာ mail လိပ်စာမှာ မှန်ကန်မှုမရှိပါ၍ ဆက်သွယ်၍ မရရှိခဲ့မှုအပေါ် ၎င်းကုမ္ပဏ္ဏီ မြေပြင်တွင် အမှန်တစ်ကယ်ရှိ/မရှိ စုံစမ်းစစ် ဆေးပေးနိုင်ပါရန်နှင့် ညှိနှိုင်းဆောင်ရွက်ပေးနိုင်ပါရန် မန္တလေးတိုင်းဒေသကြီး၊ စားသုံးသူရေးရာ ဦးစီးဌာနသို့ ညှိနှိုင်းအကြောင်းကြားစာပေးပို့ခဲ့ရာ (၂၀.၁.၂၀၂၅)ရက်နေ့တွင် မြေပြင်ကွင်းဆင်းစစ်ဆေးခဲ့ မှုအရ မြေပြင်တွင်မရှိကြောင်းနှင့် ၎င်းနေရာရှိ အနှေးယာဉ်မောင်းသည့် လုပ်သားတစ်ဦးအား မေးမြန်းခဲ့ရာ Myanmar Broad Band (MBB) B2B Company ဟုမရှိကြောင်းနှင့် မကြားဖူးကြောင်း၊ မိမိထံသို့လည်း  Myanmar Broad Band (MBB) B2B Company နှင့်ပတ်သက်၍ လာရောက်စုံစမ်းသူ များလည်းရှိသည် ဟု ပြောကြားလာကြောင်း အကြောင်းပြန်ကြားလာပါသည်။

          (၂၁.၁.၂၀၂၅)ရက်နေ့တွင် တိုင်ကြားသူထံသို့ဆက်သွယ်၍ စားသုံးသူရေးရာဦးစီးဌာန၊ မန္တလေး တိုင်းဒေသကြီးဦးစီးမှူးရုံးမှ တိုင်ကြားစာပါ စီးပွားရေးလုပ်ငန်းဆောင်ရွက်နေသည့် လိပ်စာသို့ မြေပြင် ကွင်းဆင်းစစ်ဆေးရာတွင် မတွေ့ရှိရသဖြင့် အမှုအားပိတ်သိမ်းရမည်ဖြစ်ပါကြောင်း၊ လုပ်ငန်းမှတ်ပုံတင် လက်မှတ်မရှိပါက အွန်လိုင်းမှတစ်ဆင့် ဝယ်ယူအသုံးမပြုသင့်ကြောင်း၊ စီးပွားရေးနှင့် ကူးသန်းရောင်းရေး ဝန်ကြီးဌာန၊ ကုန်သွယ်ရေးဦးစီးဌာနမှလည်း အွန်လိုင်းစနစ်ဖြင့် ရောင်းချခြင်းလုပ်ငန်း မှတ်ပုံတင်လက် မှတ် စိစစ်ထုတ်ပေးလျက်ရှိကြောင်းနှင့် စားသုံးသူရေးရာဦးစီးဌာနမှ မြေပြင်ကွင်းဆင်းစစ်ဆေးမှုများ ဆောင်ရွက်ပြီး သက်ဆိုင်ရာဥပဒေဖြင့် အရေးယူဆောင်ရွက်သွားမှာဖြစ်ကြောင်း၊ နောက်နောင် အွန်လိုင်း စနစ်ဖြင့်ဝယ်ယူအသုံးပြုမည်ဆိုပါက မှတ်ပုံတင်လက်မှတ်ရရှိပြီးသော လုပ်ငန်းရှင်များမှတစ်ဆင့်သာ ဝယ်ယူအသုံးပြုသင့်ကြောင်း သတိပြုဆင်ခြင်ဖွယ်တို့ကို အသိပေးရှင်းလင်းဆွေးနွေးခဲ့ပြီး ဌာနအနေဖြင့် လည်း စားသုံးသူများသို့ Talk Show အပါအဝင် အသိပညာပေးဆွေးနွေးဟောပြောမှုများ ဆောင်ရွက်ရာ တွင် အလားတူ Online မှ လိမ်လည်ခြင်းမရှိစေရေး ထည့်သွင်းဆွေးနွေးဟောပြောလျက်ရှိပါကြောင်း ဆွေးနွေးခဲ့ရာ တိုင်ကြားသူမှလည်း စိတ်ကျေနပ်မှုရရှိသဖြင့် အမှုအား ပိတ်သိမ်းနိုင်ခဲ့ပါသည်။

DOCA(မကွေး)

၂။       နေပြည်တော်၊ ဇမ္ဗူသီရိမြို့နယ်နေ တိုင်ကြားသူ တစ်ဦးသည် ကားအရောင်းစင်တာတစ်ခုမှ ကားတစ်စီး ဝယ်ယူခဲ့သည့် ကိစ္စနှင့်ပက်သက်၍ နစ်နာမှုများ ပေါ် ပေါက်လာသောကြောင့် Email မှတဆင့် တိုင်ကြားလာ ပါသည်။

ဖြေရှင်းဆောင်ရွက်မှုအခြေအနေ။          တိုင်ကြားမှုနှင့်ပတ်သက်၍ အနောက်ပိုင်းခရိုင်ဦးစီးမှူးရုံးမှ တာဝန်ရှိသူများသည် ၁၈-၁၁-၂၀၂၄ ရက်နေ့တွင် တိုင်ကြားခံရသည့် ကားအရောင်းစင်တာမှတာဝန် ရှိသူတို့အား အနောက်ပိုင်းခရိုင်ဦးစီးမှူးရုံးသို့ ခေါ်ယူတွေ့ဆုံဆွေးနွေးခဲ့ရာ မိမိတို့ Car showroom အနေဖြင့် Use Car ရောင်းချလိုက်ခြင်းဖြစ်ကြောင်း၊ ကညနတွင် တရားဝင်စစ်ခိုင်းပါကြောင်း၊ Plus ကောင်း/မ ကောင်းမမြင်နိုင်ပါကြောင်း၊ Battery မှာလည်း ဝယ်ယူသူရှေ့တွင် စက်ဖွင့်စမ်းသပ်နိုင်ပါ ကြောင်း၊တာယာ(၂)လုံးအားလည်း ပုံစံတူလဲပေးလိုက်ပါကြောင်း၊ ဝယ်ယူသူကိုယ်တိုင် စိတ်ကြိုက် အလုံးစုံ စစ်ဆေးစမ်းသပ်ပြီးမှ စရံငွေပေးချေရခြင်းဖြစ်ပြီး ၁၃-၉-၂၀၂၄ ရက်နေ့ ငွေအားလုံးပေးချေပြီး ကားအပ်လိုက်ခြင်းဖြစ်ပါကြောင်း၊ မိမိတို့ Showroom အနေဖြင့်ဖွင့်လှစ်ရောင်းချနေသည့် သက်တမ်း တွင် တိုင်ကြားခံရခြင်းမျိုး မရှိခဲ့ဖူးကြောင်း၊ ယခုဖြစ်စဉ်မှာ ပထမဆုံးဖြစ်ပြီး လိမ်လည်ရောင်းချခြင်း မျိုးလည်းမပြုလုပ်ခဲ့ပါကြောင်း ပြောကြားခဲ့ပြီး  Battery နှင့် တာယာလဲလှယ်ထားသော ကုန်ကျ ငွေကျပ် ၇၅၀,၀၀၀-/ကျပ်ကို ၂၈-၁၁-၂၀၂၄ ရက်နေ့ တွင် K pay ဖြင့် လွှဲပေးမည်ဖြစ်ပါကြောင်းနှင့် နောက်နောင်အလားတူ ဖြစ်စဉ်မျိုး မဖြစ်ပေါ် စေရန် အလေးထားဆောင်ရွက်သွားမည်ဖြစ်ပါကြောင်း ပြောကြားခဲ့ပါသည်။ ဌာနမှ တာဝန်ရှိသူက တိုင်ကြားသူထံ ဖုန်းဖြင့်ဆက်သွယ်ပြောကြားခဲ့ရာ ကျေနပ်မှုရှိပါကြောင်း ပြောကြားခဲ့ပါသဖြင့် တိုင်ကြားမှုအား ပိတ်သိမ်းဆောင်ရွက်ခဲ့ပါသည်။

DOCA(Consumer)