ဖြေရှင်းဆောင်ရွက်ပေးမှုများ

        စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊   စားသုံးသူရေးရာဦးစီးဌာနအနေဖြင့် နိုင်ငံတကာအလေ့အကျင့်များအရ စားသုံးသူ၏နစ်နာဆုံးရုံးမှုများကိုအရေးဆိုတိုင်ကြားနိုင်ရန်၊ အာဆီယံ Guide Line အရ တိုင်ကြားမှုများကိုလက်ခံဖြေရှင်းနိုင်ရန်၊ စားသုံးသူအခွင့်အရေးများအပြည့်အဝရရှိနိုင်ရန်၊ စားသုံးသူ၏နစ်နာမှုများအား အချိန်တိုအတွင်း ကုစားဖြေရှင်းပေးနိုင်ရန်ရည်ရွယ်၍ တိုင်းဒေသကြီး/ ပြည်နယ်များနှင့် ခရိုင်များတွင် စားသုံးသူသတင်းပြန်ကြားရေးနှင့် တိုင်ကြားမှုလက်ခံဆောင်ရွက်ရေးစင်တာ (CICC)များဖွင့်လှစ်၍ဆောင်ရွက်ခဲ့ပါသည်။

      စစ်ကိုင်းတိုင်းဒေသကြီး၊ စားသုံးသူရေးရာဦးစီးဌာနအနေဖြင့် စားသုံးသူများဝယ်ယူသုံးစွဲသည့် ကုန်စည် (သို့မဟုတ်) ဝန်ဆောင်မှုများကြောင့် နစ်နာဆုံးရှုံးမှုဖြစ်ပေါ်၍ တိုင်ကြားလာမှုများအား အချိန်နှင့်တပြေးညီ လျင်မြန်စွာဖြေရှင်းဆောင်ရွက်ပေးလျက်ရှိရာ စစ်ကိုင်းခရိုင်၊ စစ်ကိုင်းမြို့နေ စားသုံးသူတစ်ဦးမှာ  ATOM Myanmar Limited ဝန်ဆောင်မှုအပေါ်  ကျေနပ်မှုမရှိပါသဖြင့် ငွေပြန်လည်ရယူလိုကြောင်း စားသုံးသူရေးရာဦးစီးဌာန၏ Website မှတစ်ဆင့် တိုင်ကြားလာမှုကိုဖြေရှင်းဆောင်ရွက်ရာ စားသုံးသူတိုင်ကြားရာတွင် ဖော်ပြထားသော လိပ်စာ၊ ဖုန်းနံပါတ်အားဆက်သွယ်မေးမြန်ခဲ့ရာ Myanmar Limited ဘက်မှ တာဝန်ရှိသူက ဖြတ်တောက်သွားသောငွေကြေးအား တိုင်ကြားသူ၏ဖုန်းထဲတွင် T0p Up ဖြင့် ငွေပြန်လည်ဖြည့်သွင်းပေးခဲ့ပြီး စားသုံးသူနစ်နာသော ငွေကြေးရယူလိုမှုအပေါ် တာဝန်ယူဖြေရှင်းပေးခဲ့ပြီး ကျေနပ်မှုရှိပါသဖြင့် အမှုအားပိတ်သိမ်း၍ နှစ်ဦးသဘောတူ ညှိနှိုင်းဖြေရှင်းဆောင်ရွက်ပေးခဲ့ကြောင်း သတင်းရရှိပါသည်။

DOCA(စစ်ကိုင်း)

     ရန်ကုန်တိုင်းဒေသကြီး၊ သင်္ဃန်းကျွန်းမြို့နယ်နေ တိုင်ကြားသူတစ်ဦးသည် မော်တော်ယာဉ်  ပြုပြင်ရန်အတွက် မော်တော်ယာဉ် ပြုပြင်ရေးလုပ်ငန်း တာဝန်ခံ (Mechanic) ထံတွင် အပ်နှံခဲ့ရာ မော်တော်ယာဉ်မှာ Gear Box Error ဖြစ်ပေါ်နေ သည့်အတွက် ပြုပြင်ခငွေကျပ် ၂,၃၈၀,၀၀၀/- အား ပေးချေခဲ့ရသော်လည်း ကောင်းမွန်လာမှုမရှိသည့်အပြင် ပိုင်ရှင်၏ ခွင့်ပြုချက်ရယူမှုမရှိဘဲ မော်တော်ယာဉ်၏ အရေးကြီးအစိတ်အပိုင်းများအား လဲလှယ်ပြုပြင်မှုများ ပြုလုပ်ခဲ့သည့်အတွက် စားသုံးသူရေးရာဦးစီးဌာန၊ Website Complaint System မှတဆင့် ဆက်သွယ်တိုင်ကြားလာပါသည်။

     တိုင်ကြားမှုနှင့်ပတ်သက်၍ တိုင်းဒေသကြီးဦးစီးမှူးရုံးမှ တာဝန်ရှိသူများက နှစ်ဦးနှစ်ဖက် စေ့စပ်ညှိနှိုင်းမှုများ ဆောင်ရွက်ခဲ့သော်လည်း ပြေလည်မှု မရရှိသည့်အတွက် မော်တော်ယာဉ်ပြုပြင်ရေးလုပ်ငန်း၊ တာဝန်ခံမှ “တိုင်ကြားသူက မော် တော်ယာဉ်ပြုပြင်ရန် ပေးအပ်ခဲ့သည့်ငွေကျပ် ၂,၃၈၀,၀၀ဝ/- (ငွေကျပ်နှစ်ဆယ့်သုံးသိန်း ရှစ်သောင်းတိတိ)ကို အပြည့်အဝပြန်လည်ပေးလျော်သွားရန်နှင့်ပေးလျော်မှုအား ၁၅-၁-၂၀၂၄ ရက်နေ့မတိုင်မီ ပြီးစီးအောင်ဆောင်ရွက်ပေးရမည်ဖြစ်ကြောင်း” စီမံခန့်ခွဲရေးဆိုင်ရာ အမိန့်အား ချမှတ်ခဲ့ပါသည်။ အမိန့်ချမှတ်ခဲ့မှုအပေါ် မော်တော်ယာဉ်ပြုပြင်ရေးလုပ်ငန်း တာဝန်ခံ (Mechanic)က လိုက်နာဆောင်ရွက်ပြီး ဖြစ်ကြောင်းကို ၂၉-၁-၂၀၂၄ ရက်နေ့တွင် ဌာနသို့ ဆက်သွယ်ပြောကြားလာသည့်အတွက် ဌာနမှတာဝန်ရှိသူက တိုင်ကြားသူထံ ဆက်သွယ် မေးမြန်းခဲ့ရာ ငွေကျပ် ၂၃၈၀၀၀ဝိ/- (ငွေကျပ်နှစ်ဆယ့်သုံးသိန်းရှစ်သောင်းတိတိ) ကို လက်ခံရရှိပြီးဖြစ်၍ တိုင်ကြားမှုအား ပိတ်သိမ်းလိုကြောင်း ပြန်လည်ပြောကြားခဲ့သောကြောင့် စားသုံးသူကာကွယ်ရေးဥပဒေအရ နစ်နာဆုံးရှုံးမှုနှင့်အညီ ငွေပြန်လည်ပေးစေခြင်းနည်းလမ်းဖြင့်  တိုင်ကြားမှုကို ပိတ်သိမ်းဆောင်ရွက်ခဲ့ပါသည်။

     ရှမ်းပြည်နယ်၊ ညောင်ရွှေမြို့နေ တိုင်ကြားသူတစ်ဦးသည် စိုက်ပျိုးရေးအရောင်းဆိုင်တစ်ခုထံမှ xxx အမှတ်တံဆိပ်ပါ ဓါတ်မြေသြဇာအား ဝယ်ယူခဲ့ရာ ယင်းဓါတ်မြေဩဇာသည် ယခင်အသုံးပြုခဲ့သော ပစ္စည်းနှင့် ပုံသဏ္ဍာန်၊အရောင်အသွေးကွဲလွဲမှုရှိခြင်း၊ အမဲရောင်အလုံးများ ရောနှောနေခြင်းတို့ကြောင့် ဝယ်ယူခဲ့သည့် ဆိုင်သို့သွားရောက်၍ ယခင်သုံးစွဲသော အမှတ်တံဆိပ်ပါ ဓါတ်မြေသြဇာနှင့်ကွဲလွဲနေကြောင်း ပြောကြားပြီး ပစ္စည်းအစစ်ကိုသာ ပြန်လဲပေးရန် တောင်းဆိုခဲ့သော်လည်း လဲလှယ်ပေးခြင်းမရှိသည့်အတွက် စားသုံးသူရေးရာဦးစီးဌာန၊ ပြည်နယ်ဦးစီးမှူးရုံးသို့ လူကိုယ်တိုင် လာရောက်တိုင်ကြားလာပါသည်။

      တိုင်ကြားမှုနှင့်ပတ်သက်၍ ပြည်နယ်ဦးစီးမှူးရုံးမှ တာဝန် ရှိသူများက တိုင်ကြားခံရသူအား  ခေါ်ယူမေးမြန်းခဲ့ရာ ဓါတ်မြေသြဇာများကို တဆင့်ဝယ်ယူရောင်းချခြင်းကြောင့် အရည်အသွေးပြည့်မီခြင်းမရှိသော ဓါတ်မြေသြဇာများပါရှိလာသည်ကို မသိရှိပါကြောင်းနှင့် ဝယ်ယူသူကပြောကြားမှသာ အရည်အသွေးမပြည့်သည်ကို သိရှိရကြောင်း ဖြေကြားခဲ့သဖြင့် နောင်တွင်အရည်အသွေးမပြည့်သော ဓါတ်မြေသြဇာများကို ရောင်းချခြင်း မပြုပါကြောင်းနှင့် တောင်သူများနစ်နာဆုံးရှုံးမှုမရှိစေရန် မှန်ကန်ပြီး အရည်အသွေးပြည့်ဝ သော အာမခံချက်ရှိသည့် ဓါတ်မြေသြဇာများကိုသာ ရောင်းချသွားမည်ဖြစ်ကြောင်းကို ခံဝန်ကတိ လက်မှတ်ရေးထိုးစေခဲ့ပြီး စားသုံးသူကာကွယ်ရေးဥပဒေပုဒ်မ ၅၂၊ ပုဒ်မခွဲ (က) အရ သတိပေးခြင်း အမိန့်ကိုချမှတ်ခဲ့သည့်အတွက် တိုင်ကြားသူမှလည်း လက်ခံကျေနပ်မှုရှိသဖြင့် တိုင်ကြားမှုကို ပိတ်သိမ်းဆောင်ရွက်ခဲ့ပါသည်။

        မကွေးတိုင်းဒေသကြီး XXXXXXXX မြို့နေ၊ ဒေါ် XXXX သည်  XXXX မြို့ မှ XXXX ကျေးရွာသို့   XXXX ယာဉ်လိုင်းဖြင့် ယာဉ်စီး ကျပ်(၂၀၀၀)၊ တန်ဆာခ ကျပ်(၁၀၀၀)ပေး၍ စီးနင်းလိုက်ပါခဲ့ရာ XXXX အနီး၌ ဆင်းသွားခဲ့သော ခရီးသည်တစ်ဦးအား ၎င်း၏အိတ် (ဆာလာအိတ်ထုပ်) တန်ဖိုးအားဖြင့် (၁၅၇၅၀ဝိ/-) ကျပ်ကို ကားစပါယ်ယာက မှားယွင်းပေးလိုက်မိသောကြောင့် ယင်းပစ္စည်းထုပ်အား ပြန်လည်ရရှိရန် ဂိတ်သို့ အကြိမ်ကြိမ်ဖုန်းဆက်ပြောကြားခဲ့သော်လည်း တာဝန်ယူမှုမရှိသဖြင့် (၁-၄-၂၀၂၄)ရက်နေ့တွင် မကွေးတိုင်းဒေသကြီး၊ စားသုံးသူရေးရာဦးစီးဌာနသို့ တိုင်ကြားလာခဲ့ပါသည်။

        ဌာနအနေဖြင့် တိုင်ကြားမှုနှင့်ပတ်သက်၍ စားသုံးသူကာကွယ်ရေးဥပဒေအရ စားသုံးသူထိခိုက်နစ်နာမှုရှိ/မရှိစိစစ်ခဲ့ပြီး (၂-၄-၂၀၂၄)ရက်နေ့တွင် တိုင်ကြားခံရသည့် ယာဉ်လိုင်းသို့ လာရောက်ညှိနှိုင်းဖြေရှင်းပေးနိုင်ရေး အကြောင်းကြားစာပေးပို့ခဲ့ပါသည်။ (၄-၄-၂၀၂၄)ရက်နေ့တွင်  ပို့ဆောင်ရေးစီမံကိန်းဦးစီးဌာန၊ မော်တော်ယာဉ်လိုင်းများကြီးရေးကော်မတီမှ တာဝန်ရှိသူများ၊ တိုင်ကြားသူ၊ တိုင်ကြားခံရသူတို့အား ညှိနှိုင်းရန်ခေါ်ယူခဲ့ရာ တိုင်ကြားသူက ယင်းနေ့တွင်ပင် ဖုန်းဖြင့်ဆက်သွယ်၍ တိုင်ကြားမှုနှင့်စပ်လျဉ်းပြီး ဆက်လက်ဆောင်ရွက်လိုခြင်းမရှိပါ၍ အမှုအားပိတ်သိမ်းပါကြောင်းပြောကြားလာခဲ့ပါသည်။ ဌာနအနေဖြင့် XXXX ယာဉ်လိုင်းမှ တာဝန်ရှိသူအား ကုန်စည်များသယ်ယူပို့ဆောင်ရာတွင် လမ်းခရီး၌ မမြင်နိုင်သော သဘာဝဘေးအန္တရာယ်ကြောင့် ဖြစ်ပေါ်လာသော အခြေအနေတစ်ရပ်မှအပ ပစ္စည်းများပျောက်ဆုံးခြင်း၊ ပျက်ဆီးခြင်းမျိုးမဖြစ်ပေါ်စေရေးနှင့် သယ်ဆောင်လာသော ကုန်စည်များကိုလည်း ပစ္စည်းပို့ဆောင်သူ၏ ရှေ့မှောက်တွင် စနစ်တကျဖွင့်ဖောက်စစ်ဆေးပြီးမှသာ ကုန်စည်၏တန်ဖိုးကိုလိုက်၍ တန်ဆာခတောင်းခံကာ သယ်ဆောင်ခြင်းဝန်ဆောင်မှုကို ဆောင်ရွက်ပေးသွားမည်ဖြစ်ကြောင်း၊ ဝန်ဆောင်မှုပေးရာတွင်လည်း တာဝန်ခံမှု၊ တာဝန်ယူမှုအပြည့်ဖြင့် ဆောင်ရွက်သွားမည်ဖြစ်ကြောင်း၊ သက်ဆိုင်ရာဌာနတာဝန်ရှိသူများ၏ ဆက်သွယ်အကြောင်းကြားမှုအပေါ်တွင်လည်း ခြိမ်းခြောက်ခြင်း၊ မချေမငံဆက်ဆံခြင်းမျိုးများ နောက်နောင်မဖြစ်ပေါ်စေရေး ဝန်ခံကတိလက်မှတ်ရေးထိုးစေလျက် အမှုအား ပိတ်သိမ်းနိုင်ခဲ့ကြောင်းသိရှိရပါသည်။

DOCA(မကွေး)

     မကွေးတိုင်းဒေသကြီး၊ မကွေးမြို့နေတိုင်ကြားသူသည် မော်တော်ယာဉ်လိုင်းတစ်ခုဖြင့် ကျောက်ပန်းတောင်းမြို့မှ မကွေးမြို့သို့ လိုက်ပါခဲ့ရာ ကားနောက်ဖုံးထဲ၌ တင်ဆောင်လာသော ကတ္တားခေါင်းတစ်ခု တန်ဖိုးငွေ ကျပ်(၁)သိန်းခန့်၊ Service ကဒ်(၂)ကဒ် တန်ဖိုးငွေကျပ် (၁)သိန်းခန့်၊ ပုဆိုးသစ်(၃)ကွင်း တန်ဖိုး ငွေကျပ်၂၁,၀၀၀/- ၊ ဝမ်းဆက် (၃)စုံ တန်ဖိုးငွေကျပ် ၃၁,၈၀၀/-၊ စောင်တစ်ထည်တန်ဖိုးငွေကျပ် ၁၀,၀၀၀/-၊ စုစုပေါင်းတန်ဖိုးငွေကျပ်၂၆၂,၈၀၀/-အပြင် ငွေသား (၄၃) သိန်းပါသော ခရီးဆောင်အိတ်မှာ ကားနောက်ဖုံးလှပ်၍ ပြုတ်ကျခဲ့ပါ သဖြင့် တိုင်ကြားသူမှ ယာဉ်မောင်းအား မည်ကဲ့သို့ တာဝန်ယူပေးမည်နည်းဟု မေးမြန်းခဲ့ရာ ယာဉ်မောင်းမှ ငွေသား(၄၃)သိန်း အိတ်ထဲပါလာသည်ကို  ခရီးသည်မှပြောကြားမှု မရှိသည့် အတွက် မသိရှိပါကြောင်း၊ တန်ဆာခလည်း ပေးချေထားခြင်းမရှိ၍ လျော်ကြေးပေးရန်မှာလည်း မဖြစ်နိုင်ပါကြောင်း ပြန်လည်ပြောကြားခဲ့သောကြောင့် ခရီးဆောင်အိတ်ပြုတ်ကျခဲ့သည့်အပေါ် ယာဉ်လိုင်းမှ တာဝန်ခံမှု/ တာဝန်ယူမှု မရှိသည့်အတွက် တိုင်ကြားခြင်းဖြစ် ပါသည်။

   ဖြေရှင်းဆောင်ရွက်မှုအခြေအနေ။     တိုင်ကြားမှုနှင့်ပတ်သက်၍ ဌာနမှတာဝန်ရှိသူများက စိစစ်၍ အမြန်ယာဉ်အသင်းမှ တာဝန်ရှိသူအား အကြောင်းကြား ဆောင်ရွက်ခဲ့ပြီး ၂၂-၂-၂၀၂၄ ရက်နေ့တွင် တိုင်ကြားသူ၊ တိုင်ကြားခံရသူ၊ ပို့ဆောင်ရေးနှင့်စီမံကိန်းဦးစီးဌာန၊ ယာဉ်လိုင်းကြီးကြပ်ရေး ကော်မတီတို့မှ တာဝန်ရှိသူများအား ဖိတ်ခေါ်၍ စေ့စပ်ညှိနှိုင်းခြင်းများ ဆောင် ရွက်ခဲ့မှုအရ ယာဉ်လိုင်းအနေဖြင့် ခရီးဆောင်အိတ်ပြုတ်ကျခဲ့မှုအပေါ် တာဝန်ရှိသည့်အတွက် ပစ္စည်းတန်ဖိုးငွေကျပ် ၂၆၂,၈၀၀/- အား တာဝန်ယူသွားမည်ဖြစ်သော်လည်း အိတ်ထဲတွင်ပါရှိ သည်ဆိုသော ငွေသား (၄၃)သိန်းမှာ ခရီးသည်မှ ကြိုတင် ပြောဆိုထားခြင်းမရှိသည့်အတွက် တာဝန်မယူနိုင်ပါကြောင်း၊ တိုင်ကြားသူမှလည်း ငွေသား (၄၃) သိန်းအား ပေးလျော်ရန် တောင်းဆိုခြင်းမပြုပါကြောင်း၊ ယာဉ်လိုင်းမှ တိုင်ကြားသူသို့ ငွေကျပ် ၂၆၀,၀၀၀/- အား ပေးလျော်သွားမည်ဖြစ်ကြောင်းကို တိုင်ကြားသူမှ သဘောတူလက်ခံခဲ့ပြီး ၂၆-၂-၂၀၂၄ ရက်နေ့တွင် ပေးလျော်သွားမည်ဖြစ်ကြောင်း ညှိနှိုင်းရရှိခဲ့ပါသည်။ သို့သော် တိုင်ကြားသူမှ ခရီးဆောင်အိတ် ပြုတ်ကျနေခဲ့ကြောင်း လူမှုကွန်ယက်စာမျက်နှာပေါ်တွင် Post တင်ခဲ့သည့် အတွက် ၂၅-၂-၂၀၂၄ ရက်နေ့တွင် ကျောက်ပန်းတောင်းမြို့၊ ဂိတ်ပေါင်းစုံ လက်မှတ်အရောင်း ဌာနခွဲမှ ခရီးဆောင်အိတ်ရထားကြောင်း တိုင်ကြားသူထံသို့ဆက်သွယ်လာသဖြင့် သွားရောက် ယူဆောင်၍ ပစ္စည်းများစစ်ဆေးရာ ငွေသား(၄၃)သိန်းနှင့်အတူ ပါရှိပစ္စည်းများ ပြန်လည်ရရှိ ကြောင်းကို တိုင်ကြားသူက စားသုံးသူရေးရာဦးစီးဌာနသို့ အကြောင်းကြားလာခဲ့ပါသည်။ ဦးစီးဌာနမှတာဝန်ရှိသူများကတိုင်ကြားခံရသည့် ယာဉ်လိုင်းအနေဖြင့်ပစ္စည်းတန်ဖိုးပေးလျော် ရန်မရှိသော်လည်း ခရီးဆောင်အိတ်ပြုတ်ကျခဲ့မှုအပေါ် တာဝန်ရှိသည့်အတွက် နောင်အလား တူဖြစ်စဉ်မျိုး မဖြစ်ပွားစေရန် ယာဉ်မောင်းနှင့် ယာဉ်နောက်လိုက်များအား သေချာစွာ ကြီးကြပ်ကွပ်ကဲဆောင်ရွက်ရန်၊ ဝန်ဆောင်ခရယူ၍ သယ်ယူပို့ဆောင်ရသည့် ကုန်စည်များ ပျောက်ဆုံးမှုမရှိစေရေး ဂရုပြုဆောင်ရွက်ရန် ခံဝန်ကတိပြုလက်မှတ်ရေးထိုးစေခဲ့ပြီး တိုင် ကြားသူမှလည်း ကျေနပ်မှုရှိပါသောကြောင့် တိုင်ကြားမှုအား ပိတ်သိမ်းဆောင်ရွက်ခဲ့ပါသည်။