EV ကားဝယ်ယူခြင်းနှင့် ပတ်သက်၍ တိုင်ကြားလာခြင်းအပေါ် ဖြေရှင်းပေးမှုအခြေအနေ
မန္တလေးတိုင်းဒေသကြီး၊ ချမ်းအေးသာစံမြို့နယ်နေ တိုင်ကြားသူတစ်ဦးသည် Car Showroom တစ်ခုထံမှ BYD Atto3 အမျိုးအစား EV ယာဥ်အား Pre-Order တင်ပြီး စရံငွေကျပ် ၂၉,၇၀၀,၀၀၀/-ကို ပေးချေခဲ့သော်လည်း ကားအပ်နှံခြင်းမရှိသောကြောင့် တိုင်ကြားလာပါသည်။
ဖြေရှင်းဆောင်ရွက်မှုအခြေအနေ။ တိုင်ကြားမှုနှင့် ပတ်သက်၍ တိုင်းဒေသကြီးဦးစီးမှူးရုံးမှ တာဝန်ရှိသူများမှ ၂၁-၅-၂၀၂၅ ရက်နေ့၌ တိုင်ကြားသူတင်ပြထားသည့် စာရွက်စာတမ်းများနှင့် ပြေစာအထောက်အထားများအား မှန်ကန်မှုရှိ/မရှိ စုံစမ်းစစ်ဆေးခြင်းများ ဆောင်ရွက်ခဲ့ရာ တိုင်ကြားသူမှ BYD Atto3 အမျိုးအစား EV ယာဉ်အား Pre-Order မှာယူစဥ်က ပေးအပ်ခဲ့သည့် စရံငွေကျပ် (၂၉၇)သိန်းနှင့် (၂)နှစ်ကျော်ကြာမြင့်သွားသဖြင့် နစ်နာဆုံးရှုံးမှုအတွက် ငွေကျပ် (၄၀၀)သိန်း၊ စုစုပေါင်းငွေကျပ် (၆၉၇)သိန်း ပေးလျော်စေလိုကြောင်း တင်ပြတောင်းဆိုပါသည်။ Car Showroom ပိုင်ရှင်မှလည်း ၎င်းတို့၏ ပြေစာအထောက်အထားများ မှန်ကန်ပါကြောင်း၊ စရံငွေလည်း အမှန်တကယ် လက်ခံရရှိထားပါကြောင်း၊ မူဝါဒအပြောင်းအလဲပေါ်တွင် လိုက်ပါဆောင်ရွက် ရသည့်အတွက် ကားအပ်နှံမည့်မေလကုန်တွင် ကားအပ်နှံနိုင်မှု မရှိခဲ့ပါကြောင်း တင်ပြဆွေးနွေး ခဲ့ပါသည်။ မန္တလေးတိုင်းဒေသကြီးဦးစီးမှူးရုံးမှ တာဝန်ရှိသူများက နှစ်ဦးနှစ်ဖက်တင်ပြချက်များအပေါ် စိစစ်ပြီးနောက် စရံငွေကျပ် (၂၉၇)သိန်းနှင့် နစ်နာဆုံးရှုံးမှုအတွက် ဒေါ်လာဈေး၊ ရွှေဈေး၊ ဘဏ်တိုးနှုန်းများကို အခြေခံတွက်ချက်ထားသည့် ပျမ်းမျှနှုန်းထားဖြစ်သည့် ငွေကျပ်(၂၂၅)သိန်း၊ စုစုပေါင်းငွေကျပ် (၅၂၂)သိန်းကို ငွေပြန်လည်ပေးစေရန် စီးပွားရေးလုပ်ငန်းရှင်အား ညှိနှိုင်းဆွေးနွေးမှုကို နှစ်ဦးနှစ်ဖက်သဘောတူလက်ခံခဲ့ပြီးည(၁၉-၆-၂၀၂၅)ရက်နေ့တွင် ဌာနမှ တာဝန်ရှိသူများ ရှေ့မှောက်၌ ပြန်လည်ပေးလျော်ခဲ့သဖြင့် တိုင်ကြားသူမှလည်း ကျေနပ်လက်ခံမှုရရှိခဲ့သဖြင့် တိုင်ကြားမှုကို ပိတ်သိမ်းဆောင်ရွက်ခဲ့ပါသည်။
ဖြေရှင်းဆောင်ရွက်မှုအခြေအနေ။ တိုင်ကြားမှုနှင့်ပတ်သက်၍ ခရိုင်ဦးစီးမှူးရုံးမှ တာဝန်ရှိသူများက တိုင်ကြားခံရသော အီလက်ထရောနစ်ဆိုင်သို့ စာဖြင့်အကြောင်းကြား၍သော်လည်းကောင်း၊ Viber မှစာပို့၍သော်လည်းကောင်း၊ အကြိမ်ကြိမ်ဆက်သွယ်ဆောင်ရွက်ခဲ့သော်လည်း လာရောက်ဖြေရှင်းမှု မရှိသည့်အတွက် ခရိုင်ဦးစီးမှူးရုံးမှ ရန်ကုန်တိုင်းဒေသကြီးဦးစီးမှူးရုံးသို့ ဆက်လက်တင်ပြခဲ့ပါသည်။ တိုင်းဒေသကြီးဦးစီးမှူးရုံးမှ တိုင်ကြားသူနှင့် တိုင်ကြားခံရသူတို့အား တိုင်းဦးစီးမှူးရုံးသို့ ခေါ်ယူခဲ့ရာ တွင် တိုင်ကြားသူမှ တိုင်ကြားမှုအခြေအနေများအား လာရောက်ရှင်းလင်း ပြောကြားခဲ့သော်လည်း အီလက်ထရောနစ်ဆိုင်မှ လာရောက်ခြင်းမရှိသည့်အပြင် တိုင်ကြားသူထံသို့ TV အပ်နှံခြင်း မရှိသည်ကို သိရှိခဲ့ရသောကြောင့် ရန်ကုန်တိုင်းဒေသကြီးစားသုံးသူရေးရာကော်မတီ၏ လုပ်ငန်းညှိနှိုင်းအစည်း အဝေးတွင် အမှာစာဖြင့် တင်ပြဆွေးနွေးခဲ့ရာ တိုင်းဒေသကြီးဦးစီးမှူးရုံးအနေဖြင့် စီမံခန့်ခွဲရေးဆိုင်ရာ အမိန့်ချမှတ်သွားရန် ဆုံးဖြတ်ချက်ချမှတ်ခဲ့သဖြင့် အီလက်ထရောနစ်ဆိုင်အား စားသုံးသူကာကွယ်ရေး ဥပဒေပုဒ်မ ၅၂ (ဃ)အရ “တိုင်ကြားသူထံသို့ TV အား ယခုအချိန်ထိ ပြန်လည် ပေးအပ်ခြင်းမရှိသည့် အတွက် ဝယ်ယူခဲ့သည့် TV တန်ဖိုး ငွေကျပ် ၈၅၀,၀၀ဝ/- မှ TV အသုံးပြုခဲ့သည့် (၆)လစာအား တစ်လ လျှင် ငွေကျပ် ၃၀,၀၀ဝ/- သတ်မှတ်၍ ငွေကျပ် ၁၈၀,၀၀ဝ/- ကို နှုတ်ယူ၍ ကျန် ငွေကျပ် ၆၇၀,၀၀ဝ/-အား ပြန်လည်ပေးအပ်ရန်” ဟူ၍ စီမံခန့်ခွဲရေးဆိုင်ရာအမိန့်အား ချမှတ်ခဲ့ပါသည်။ စီမံခန့်ခွဲရေးဆိုင်ရာ အမိန့်ချမှတ်ခဲ့မှုအပေါ် အီလက်ထရောနစ်ဆိုင်မှ တိုင်ကြားသူသို့ ငွေကျပ် ၆၇၀,၀၀ဝ/- ကို ပြန်လည် ပေးအပ်ခဲ့ပြီးဖြစ်သောကြောင့် တိုင်ကြားသူကငွေလက်ခံရရှိပြီး ကျေနပ်မှု ရှိပါသောကြောင့် တိုင်ကြား မှုကို ပိတ်သိမ်းဆောင်ရွက်ခဲ့ပါသည်။
