ပဲခူးတိုင်းဒေသကြီး၊ ပြည်ပဲမျိုးစုံဈေးကွက်၌ နေ့စဉ် ပဲကြော်ဖိုလုပ်ငန်းသမားများဖြင့် အရောင်းအဝယ်ဖြစ်နေသောပဲသီးနှံမှာ ပဲကြီးသီးနှံဖြစ်ပြီး ပဲလက်ကျန်များမှာ နေ့စဉ်အရောင်းအဝယ် ဖြစ်နေခဲ့ပါသည်။ ၂၀၂၄ခုနှစ်၊ မေလတွင် ဒေသတွင်းပဲကြော်ဖိုလုပ်ငန်းသမားများ အဓိကဝယ်ယူမှုရှိကာ တစ်ရက်လျှင် အိတ် (၂၀၀/၃၀၀)_ ကျော်ရောင်းဝယ်မှုဖြစ်ခဲ့ပြီး ပဲဈေးမှာ (ရွှေကျွန်း) တစ်တင်းလျှင် ၉၂၀၀၀ကျပ်၊ (ကမ်းနား) တစ်တင်းလျှင် ၈၅၀၀၀ကျပ်ဖြင့်ရောင်းဝယ်နေခဲ့ကြပါသည်။ ယခင်နှစ်တွင် ပဲကြီးသီးနှံသည် မတ်ပဲသီးနှံထက်ပင် ဈေးပိုမြင့်ခဲ့သော်လည်း ယခုနှစ်တွင်မူ ပဲကြီးသီးနှံဈေးနှုန်းမှာ သိသိသာသာမြင့်တက်လာခြင်းမရှိဘဲ မတ်ပဲသီးနှံအနေဖြင့် ယခုနှစ်၌ ပဲဈေးနှုန်းများသိသိသာသာမြင့်တက်လာခဲ့ကာ ကျပ်၁သိန်းကျော်အထိရရှိလာသည့်အတွက် ပဲကြီးသီးနှံဈေးနှုန်းထက် ဈေးပိုသွားခဲ့ပါသည်။ ယခင်နှစ် ကာလတူချိန်၌ ပဲကြီးသီးနှံဈေးနှုန်းမှာ (ရွှေကျွန်း) တစ်တင်းလျှင် ၁၀၀၀၀၀ကျပ်၊ (ကမ်းနား)တစ်တင်းလျှင် ၉၅၀၀၀ကျပ်ဖြင့် အသီးသီးရောင်းဝယ်မှုဖြစ်ခဲ့ကြသည့်အတွက် ယခုနှစ်ပဲကြီးဈေးနှုန်းမှာ ယခင်နှစ်ထက်ပင် ဈေးနှုန်းလျော့နည်းနေခဲ့ကြောင်းသိရှိရပါသည်။
DOCA(ပဲခူး)