မကွေးတိုင်းဒေသကြီး၊ သရက်ခရိုင်၊ အထက်မင်းလှမြို့၊ မန်းသံပုရာကန်ကျေးရွာအုပ်စုရှိ မန်းသံပုရာကန်ကျေးရွာတွင် မိုးနှမ်းကို ၂၀၂၄ခုနှစ်၊ ဇွန်လ(ပထမပတ်)မှစတင်၍ တောင်သူ(၅၅)ဦးမှာ စိုက်ဧက(၃၀၀)ဧကကျော်စိုက်ပျိုးထားကြောင်း၊ နှမ်းနီနှင့်နှမ်းဖြူမျိုးကို အများဆုံးစိုက်ပျိုးကြပြီး ပဲစင်းငုံသီးနှံကိုလည်း သီးညှပ်အဖြစ်ရော၍ စိုက်ပျိုးကြကြောင်းသိရပါသည်။
ထွန်ကြောင်းဆွဲ၍ အစေ့ချစနစ်ဖြင့်စိုက်ပျိုးပြီး နှမ်းစိုက်(၁)ဧကလျှင် မျိုး(၂)ပြည်မှ (၃)ပြည်ခန့်ကုန်ကျကြောင်း၊ ယခင်နှစ်တွင် လက်ကျန်မျိုးများကို ပြန်လည်အသုံးပြုပြီး စိုက်ပျိုးကြသည့်အပြင် နှမ်းစိုက်တောင်သူအချင်းချင်းဆီမှလည်း မျိုးကိုပြန်လည်ဝယ်ယူ၍ စိုက်ပျိုးကြကြောင်း၊ ၎င်းအနေဖြင့် နှမ်းနီ (၂)ဧကခွဲနှင့် နှမ်းဖြူ(၁)ဧကခန့်၌ ယခင်နှစ်မျိုးအဟောင်းများကိုအသုံးပြု၍ စိုက်ပျိုးထားကြောင်း၊ နှမ်းဖြူမှာ စိုက်ပျိုးပြီး ရက်ပေါင်း (၇၅)ရက်၊ နှမ်းနီမှာ ရက်ပေါင်း(၈၀)ရက်အကြာတွင် ရိတ်သိမ်းရကြောင်း၊ ကုန်ကျစရိတ်အနေဖြင့် ယခင်နှစ်တွင် နှမ်းဖြူ၊ နှမ်းနီ(၁)ဧကလျှင် ကျပ်(၈၀၀၀၀) သာကုန်ကျခဲ့ပြီး ယခုနှစ်တွင် သွင်းအားစုစရိတ်မြင့်တက်လာ၍ မြေပြုပြင်ခ၊ လုပ်အားခအပါအဝင် နှမ်းဖြူ၊ နှမ်းနီ(၁)ဧကလျှင် ကျပ်(၁၂၀၀၀၀)ထိကုန်ကျကြောင်း၊ အထွက်နှုန်းအနေဖြင့် ယခင်နှစ်တွင် နှမ်းဖြူ၊ နှမ်းနီစိုက်ခင်း(၁)ဧကလျှင် (၁၀)တင်းခန့်ထွက်ရှိခဲ့ပြီး ဈေးနှုန်းအနေဖြင့် နှမ်းဖြူ(၁) တင်းလျှင် ကျပ်(၁၂၀၀၀၀)၊ နှမ်းနီ ကျပ်(၁၁၀၀၀၀)ထိဈေးနှုန်းရရှိခဲ့ကြောင်း၊ ဈေးကွက်အနေဖြင့် မင်းလှမြို့နှင့် မကွေးမြို့သို့တင်ပို့ရောင်းချကြောင်း မန်းသံပုရာကန်ကျေးရွာနေ မိုးနှမ်းစိုက်တောင်သူ ဦးသိန်းဝင်းထံမှသိရှိရပါသည်။
DOCA(မကွေး)