“ သုံးခွမြို့နယ်ရှိ ဆန်ဆိုင်များ၏ ဆန်ရောင်းချနေမှုအခြေအနေအား ကွင်းဆင်းစစ်ဆေးခြင်း ”

    ရန်ကုန်တိုင်းဒေသကြီး၊ သန်လျင်ခရိုင်၊ သုံးခွမြို့နယ်၊ စည်ပင်သာယာမြို့မဈေးအတွင်း/အပြင်ရှိ ဆန်ဆိုင်များသို့ စားသုံးသူရေးရာဦးစီးဌာန၊ ရန်ကုန်တိုင်းဒေသကြီးဦးစီးမှူးရုံး၏ လမ်းညွှန်ချက်နှင့်အညီ ဆန်အပါအဝင် အခြေခံစားသောက်ကုန်ပစ္စည်းများပြတ်လပ်မှုမရှိစေရေး၊ ဈေးနှုန်းမြင့်တက်မှုမရှိစေရေးနှင့် ဈေးနှုန်းများတည်ငြိမ်မှုရှိစေရေးတို့အတွက် စားသုံးသူရေးရာဦးစီးဌာနအနေဖြင့် ကြပ်မတ်ဆောင်ရွက်လျက်ရှိပြီး ယခုအခါဆန်ဈေးနှုန်းများမြင့်တက်လာမှုရှိသည့်အတွက် ဈေးနှုန်းမြင့်တက်ရောင်းချခြင်းအလို့ငှာ သိုလှောင်ခြင်း၊ ဖြန့်ဖြူးရောင်းချခြင်းများရှိ/မရှိကို ဆက်စပ်ဌာနများနှင့်ပူးပေါင်း၍ ၂၀၂၄ခုနှစ်၊ ဇွန်လ(၆) ရက်နေ့၊ နံနက်(၁၁:၃၀)နာရီအချိန်တွင် ဆန်ဆိုင်ပိုင်ရှင်လုပ်ငန်းရှင်များနှင့် သွားရောက်တွေ့ဆုံဆွေးနွေး ကွင်းဆင်းစစ်ဆေးခဲ့ကြောင်းသိရသည်။

    ထိုသို့ကွင်းဆင်းစစ်ဆေးရာတွင် မြို့နယ်စည်ပင်သာယာရေးအဖွဲ့မှဝန်ထမ်းများ၊ စားသုံးသူရေးရာဦးစီးဌာနမှ မြို့နယ်တာဝန်ခံနှင့်ဝန်ထမ်းများသည် စည်ပင်သာယာမြို့မဈေးအတွင်း/အပြင်ရှိ ဧရာမင်းဆန်ဆိုင်၊ ကျော်ဆန်ဆိုင်၊ ငြိမ်းချမ်းဆန်ဆိုင်၊ မွှေးဆန်ဆိုင်တို့၏ ဝယ်ယူဖြန့်ဖြူးရောင်းချမှု အနေဖြင့် ဆန်အမျိုးအစားအလိုက် ဝယ်ယူထားသည့်အိတ်၊ ရောင်းချနေသည့်အိတ်၊ ဆန်လက်ကျန်အိတ်၊ ဆန်ဝယ်ယူရသည့်ဒေသနှင့်သိုလှောင်သည့်နေရာ၊ ယခင်အပတ်ဈေးနှုန်းနှင့် ယခုအပတ်ဈေးနှုန်းများ၊ ဘောင်ချာရက်စွဲများမှာ ထူးခြားပြောင်းလဲမှုမရှိဘဲ ပုံမှန်အတိုင်း ဝယ်ယူဖြန့်ဖြူးရောင်းချပေးလျက်ရှိကြောင်း၊ သုံးခွမြို့နယ်ဆန်ဆိုင်များအနေဖြင့် ဒေသအတွင်းရှိဆန်စက်များ၊ ကျောက်တန်းမြို့နယ်၊ မင်္ဂလွန်းကျေးရွာနှင့် ဘုရင့်နောင်ပွဲရုံ၊ ရန်ကုန်မြို့တို့မှ ဝယ်ယူဖြန့်ဖြူးရောင်းချပေးနေခြင်းဖြစ်ကြောင်းသိရှိရပါသည်။

DOCA(ရန်ကုန်)