မွန်ပြည်နယ်၊ စားသုံးသူရေးရာဦးစီးဌာန၊ ဘီးလင်းမြို့နယ်တာဝန်ခံရုံးမှ ဝန်ထမ်းများသည် ၃.၃.၂၀၂၂ ရက်နေ့တွင် ဘီးလင်းမြို့နယ်၊ နှင်းပုလဲကျေးရွာရှိ ပိန္နဲသီးစိုက်ပျိုးရေးခြံများသို့ သွားရောက် လေ့လာခဲ့ကြသည်။
ထိုသို့ လေ့လာရာတွင် ပိန္နဲခြံစိုက်ပျိုးသောလုပ်ငန်းရှင်တစ်ဦး၏ ဆွေးနွေးချက်အရ ပိန္နဲပင် မျိုးများကို မြဝတီဘက်မှ မှာယူ၍ ပျိုးပင်တစ်ပင်လျှင် (၅၅၀၀) ကျပ်ခန့် ပေးရကြောင်း၊ ပိန္နဲပင် စိုက်ပျိုးရာတွင် တစ်ပင်နှင့်တစ်ပင် ပေ (၂၀) ခြားစိုက်ပျိုးလျှင် တစ်ဧကတွင် (၁၀၈) ပင်ခန့် ဝင်ဆန့် ကြောင်း၊ သွင်းအားစုအနေဖြင့် သဘာဝမြေဩဇာနှင့် ဓာတ်မြေဩဇာများကို တစ်နှစ်လျှင် (၂) ကြိမ်ခန့် ကျွေးရကြောင်း၊ စိုက်ပျိုးချိန်မှ အသီးသီးချိန်ထိ (၂) နှစ်ခန့်သာ ကြာမြင့်ကြောင်း၊ ပိန္နဲသီး များမှာ စက်တင်ဘာလတွင် စတင်သီးပြီး ဇန်နဝါရီ ၊ ဖေဖော်ဝါရီလများတွင် စတင်မှည့်ကာ ဧပြီ၊ မေလ များတွင် လှိုင်လှိုင်ပေါကြောင်း၊ ပိန္နဲသီး စတင်ပေါ်ချိန် ကာလတွင် အလုံးကြီး မှာ (၉၀၀၀-၉၅၀၀) ကျပ်၊ အလတ် (၈၀၀၀-၈၅၀၀) ကျပ်၊ အသေး (၆၀၀၀) ကျပ်ခန့်ဈေးရရှိကြောင်း၊ အလုံးကြီး (ခေါင်သီး) များကို ရန်ကုန်၊ မန္တလေး သို့ တင်ပို့ပြီး အလတ်၊ အသေးများကို ဒေသတွင်း ရန်ကုန်-မော်လမြိုင်လမ်းဘေးဝဲယာဆိုင်ခန်းများ၌ ရောင်းချကြကြောင်း သိရှိရသည်။
အဆိုပါ ပိန္နဲသီးမျိုးများမှာ စိုက်ပျိုးချိန်မှ အသီးသီးချိန်ထိ (၂)နှစ် ခန့်သာ ကြာမြင့်ခြင်း၊ ပြုစု ပျိုးထောင်ရာတွင် လွယ်ကူခြင်း၊ အသီးများမှာ ဈေးကောင်းရရှိခြင်း တို့ကြောင့် စိုက်ပျိုးသူ ခြံပိုင်ရှင်များအနေဖြင့် တွက်ခြေကိုက်သဖြင့် ဘီးလင်းမြို့နယ်တွင် ပိန္နဲခြံစိုက်ပျိုးခြင်းကို ပိုမိုလုပ်ကိုင် လာကြကြောင်း သိရှိရပါသည်။
DOCA(မွန်)