စားသုံးသူရေးရာဦးစီးဌာန၊ မကွေးတိုင်းဒေသကြီး၊ တိုင်းဒေသကြီးဦးစီးမှူး၏ လမ်းညွှန်မှုဖြင့် ပခုက္ကူခရိုင်ဦးစီးမှူးရုံးမှ ခရိုင်ဦးစီးမှူး ဦးဝေဠုအောင်ဦးဆောင်၍ ဒု-ခရိုင်ဦးစီးမှူး ဒေါ်မွန်မွန်စိုးနှင့် ဝန်ထမ်းများအဖွဲ့သည် စားသုံးသူ၏ အခွင့်အရေးများ၊ စီးပွားရေးလုပ်ငန်းရှင်၏တာဝန်များ၊ ကုန်အမှတ်တံဆိပ်တွင် ပါဝင်ရမည့် ကုန်အညွှန်းအမှတ်အသားများ၊ မြန်မာလိုထည့်သွင်း ဖော်ပြရမည့်အချက်အလက်များ အားသိရှိစေရန် ရည်ရွယ်၍ မတ်လ(၄)ရက်၊ နံနက်(၁၀:၀၀)နာရီအချိန်တွင် ပခုက္ကူမြို့၊ အမှတ်(၃)ရပ်ကွက်ရှိ “ရွှေဟင်္သာ”ပေါင်မုန့်/ကိတ်မုန့် လုပ်ငန်း၊ “မမီး”ခေါက်မုန့် လုပ်ငန်းနှင့်အမှတ်(၄)ရပ်ကွက်ရှိ “Happy Home” ပေါင်မုန့်၊ ကိတ်မုန့်လုပ်ငန်း ရှင်များနှင့် တွေ့ဆုံဆွေးနွေးအသိပညာပေးခဲ့ပါသည်။
မုန့်လုပ်ငန်းရှင်များနှင့် တွေ့ဆုံရာတွင် ခရိုင်ဦးစီးမှူးမှ ကုန်အမှတ်တံဆိပ်များအား နမူနာပြ၍ စားသုံးသူကာကွယ်ရေးဥပဒေ(၂၀၁၉)၊ အခန်း(၁၈)တွင် ပြဌာန်းထားသည့် ကုန်အညွှန်းအမှတ်အသားဖော်ပြခြင်းတွင်ပါဝင်သော ကုန်စည်၏တံဆိပ်အမှတ်အသား၊ အမျိုးအမည်၊ အရွယ်အစား၊ အရေအတွက်နှင့်အသားတင်ပမာဏ၊ ထားသိုသိမ်းဆည်းမှုအညွှန်း၊ သုံးစွဲပုံနည်းလမ်း၊ ထုတ်လုပ် သည့်ရက်စွဲ၊ သက်တမ်းကုန်ဆုံးသည့်ရက်စွဲ၊ ထုတ်လုပ်မှုအမှတ်စဉ်၊ တင်သွင်းသူ၏ အမည်နှင့် လိပ်စာ၊ လုပ်ငန်းအမည်နှင့်လိပ်စာ၊ ထုတ်လုပ်သည့်နေရာ၊ ပြန်လည်ထုပ်ပိုးသည့်နေရာ၊ ပါဝင်ပစ္စည်း၊ ဘေးထွက်ဆိုးကျိုး၊ ဓာတ်မတည့်ကြောင်းဖော်ပြချက်၊ ကြိုတင်သတိပေးချက်၊ အစိုးရဌာနများက သတ်မှတ်ထားသော အချက်အလက်များအား အသေးစိတ်ရှင်းလင်း ပြောကြားခဲ့ပါသည်။
မု့န်လုပ်ငန်းရှင်များအနေဖြင့် ကုန်အမှတ်တံဆိပ်တွင် ပြည့်စုံစွာထည့်သွင်းဖော်ပြပြီးလျှင် မိမိတို့ကုန်ပစ္စည်းသည် လုံခြုံစိတ်ချရမည်ဖြစ်ပြီး စားသုံးသူမှ ကုန်အမှတ်တံဆိပ်မပြည်စုံသည့် ကုန်စည်နှင့်နှိုင်းယှဉ်၍ ရွေးချယ်စားသုံးမည်ဆိုပါက လုံခြုံစိတ်ချမှုရှိသော ကုန်စည်ကိုသာ ရွေးချယ်စားသုံးရမည်ဖြစ်ကြောင်း၊ ကုန်အမှတ်တံဆိပ်များကို ပြည့်စုံစွာ ထည့်သွင်းပြီးလျှင် စားသုံးသူရေးရာ ဦးစီးဌာနသို့ လာရောက်၍ စိစစ်ခွင့်ပြုချက် လျှောက်ထားနိုင်ပါကြောင်း ဆွေးနွေးခဲ့ပါသည်။
“Happy Home” ပေါင်မုန့်၊ ကိတ်မုန့် လုပ်ငန်းရှင်မှ မိမိတို့မုန့်လုပ်ငန်းတွင် ထုတ်ကုန်(၆)မျိုး ထုတ်လုပ်ကြောင်း၊ ပေါင်မုန့်၊ ကိတ်မုန့်(အစို)၊ကိတ်မုန့်(အခြောက်)၊ကွတ်ကီး၊နှမ်းကွတ်ကီး၊ ဆီကြော်မုန့်တို့ဖြစ်ကြောင်း၊ ဈေးနှုန်းမှာ ပေါင်မုန့်(၇၀၀)ကျပ်၊ ကိတ်မုန့်နှင့်အခြားမုန့်များမှာ (၁၃၀၀)ကျပ် ရောင်းချကြောင်း၊ ဈေးကွက်အနေဖြင့် မြိုင်မြို့နယ်၊ ညောင်ဦး၊ ကျောက်ပန်းတောင်း၊ မုံရွာ၊ မြင်းမူစသည်တို့တင်ပို့ရောင်းချပါကြောင်း၊ ကုန်အမှတ်တံဆိပ်နှင့်ပတ်သက်၍လည်း ပြည့်စုံစွာထည့်သွင်းဖော်ပြပြီးလျှင် စိစစ်ခွင့်ပြုချက်လာရောက် လျှောက်ထားမည်ဖြစ်ပါကြောင်း ဆွေးနွေးပါသည်။
“မမီး” ခေါက်မုန့်ဖြန့်ဖြူးရောင်းချသူအနေဖြင့်လည်း ခေါက်မုန့်လုပ်ငန်းသည် မိမိ၏ ဆွေမျိုးများနေထိုင်ရာ ထားဝယ်မြို့နယ်၊ နဘူးကျေးရွာမှ ထုတ်လုပ်သည်ဖြစ်ပါကြောင်း၊ မိသားစုတစ်ပိုင် တစ်နိုင်လုပ်ငန်းဖြစ်ပြီး မိမိမှ မှာယူသောအခါမှသာ လုပ်ကိုင်သည်ဖြစ်ကြောင်း၊ ပခုက္ကူမြို့သို့ ရောက် သည့်အခါမှ မိမိ၏ ကုန်အမှတ်တံဆိပ်ဖြင့် ပြန်လည်ဖြန့်ဖြူးရောင်းချသည်ဖြစ်ကြောင်း၊ ဈေးနှုန်းမှာ ယခင်က တစ်ဘူးကို ခေါက်မုန့် (၂၀)ခုထည့်ပြီး (၁၀၀၀)ကျပ်သာရောင်းချပြီး ယခုတွင် မုန့်(၁၇)ခုပါ တစ်ဘူး(၁၂၀၀)ကျပ်ရောင်းချပါကြောင်း၊ ခေါက်မုန့်လုပ်သော နဘူးရွာမှ ထားဝယ်သို့လည်းကောင်း၊ ထားဝယ်မှပခုက္ကူမြို့သို့လည်းကောင်း သယ်ယူစရိတ်ကြီးမြင့်ပြီး ပါကင်ဘူးဈေးနှုန်းမှာ ထက်ဝက်ကျော် ဈေးတက်နေသောကြောင့် ဈေးနှုန်းတက်ရောင်းချရကြောင်း၊ စူပါမားကတ်များကို တင်၍ ရောင်းချနေသည့်အတွက် ကုန်အမှတ်တံဆိပ်နှင့်ပတ်သက်၍ လိုအပ်သည့်အချက်များ ပြည့်စုံစွာ ဖော်ပြပြီးလျှင် စိစစ်ခွင့်ပြုချက်ရရှိအောင် လိုက်နာဆောင်ရွက်သွားမည်ဖြစ်ပါကြောင်း ပြန်လည်ဆွေးနွေးခဲ့ပါသည်။
DOCA(မကွေး)