စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာ၊ ညောင်ဦးခရိုင်ဦးစီးမှူးရုံးမှ ဦးသန်းစိုး(လက်ထောက်ညွှန်ကြားရေးမှူး)သည် ခရိုင်ရုံးအစည်းအဝေးခန်းမတွင် (၂၇-၆-၂၀၂၄)ရက်နေ့၊ နံနက် ၁၀:၀၀ နာရီအချိန်၌ ညောင်ဦးမြို့နယ်ရှိ MSMEs စီးပွားရေးလုပ်ငန်းရှင်များနှင့်တွေ့ဆုံ၍ စားသုံးသူကာကွယ်ရေးအသိပညာပေးဟောပြောပွဲကျင်းပပြုလုပ်ခဲ့ပါသည်။
အဆိုပါဟောပြောဆွေးနွေးပွဲတွင် စားသုံးသူရေးရာဦးစီးဌာန၊ ညောင်ဦးခရိုင်ဦးစီးမှူးရုံးမှ လက်ထောက်ညွှန်ကြားရေးမှူးက စားသုံးသူကာကွယ်ရေးနှင့်ပတ်သက်၍ အသိပညာပေးဟောပြောဆွေးနွေးရာ၌ ယခုဟောပြောပွဲကိုတက်ရောက်လာသည့်လုပ်ငန်းရှင်များအနေဖြင့် မိမိတို့ထုတ်လုပ်သောကုန်စည်များ၊ ဝန်ဆောင်မှုများနှင့်ပတ်သက်၍သာ လုပ်ငန်းရှင်ဟုခေါ်ဆိုသတ်မှတ်သော်လည်း အခြားကုန်စည်နှင့်ဝန်ဆောင်မှုများနှင့်ပတ်သက်လျှင်မူ မိမိတို့သည်လည်း စားသုံးသူများသာဖြစ်ပါကြောင်း၊ သို့ဖြစ်၍ လုပ်ငန်းရှင်များအနေဖြင့် မိမိတို့ကိုယ်တိုင်စားသုံးသူများဖြစ်သည့်အခါတွင် ကုန်စည်နှင့်ဝန်ဆောင်မှုတို့နှင့်ပတ်သက်၍ စားသုံးသူဘက်မှ ကိုယ်ချင်းစာစိတ်ဖြင့် စာနာနားလည်မှုရှိရန် လွန်စွာမှအရေးကြီးကြောင်း၊ ခေတ်နှင့်အညီ ဖွံ့ဖြိုးတိုးတက်ပြောင်းလဲလာမှုများနှင့်အတူ အသုံးအဆောင်ပစ္စည်းများ၊ အစားအသောက်များကိုလည်း နည်းလမ်းမျိုးစုံဖြင့် ထုတ်လုပ်သုံးစွဲစားသုံးလာကြသည့်အခါ တချို့သော ဝိသမလောဘသားလုပ်ငန်းရှင်များအနေဖြင့် မိမိတို့၏ကိုယ်ကျိုးသာရှေ့ရှုအလေးထားပြီး စားသုံးရန်နှင့်သုံးစွဲရန်မသင့်သော ကုန်ပစ္စည်းများကို ထည့်သွင်း၍သော်လည်းကောင်း၊ ပြုပြင်၍သော်လည်းကောင်း လုပ်ကိုင်ဆောင်ရွက်ကြသည့်အတွက် စားသုံးသူများအနေဖြင့် ကျန်းမာရေးများထိခိုက်ပြီး၊ အသက်အန္တရာယ်များဆုံးရှုံးသည်အထိ နစ်နာမှုများဖြစ်ပေါ်လျက်ရှိကြောင်း၊ သို့ဖြစ်ပါ၍ သက်ဆိုင်ရာဌာနအသီးသီးမှ ဥပဒေများ၊ နည်းဥဒေများပြဋ္ဌာန်းပြီး စားသုံးသူများအားထိခိုက်နစ်နာမှုမရှိစေရန် ဆောင်ရွက်လျက်ရှိရာ လုပ်ငန်းရှင်များအနေဖြင့် မိမိတို့နှင့်သက်ဆိုင်သည့် ဥပဒေများ၊ နည်းဥပဒေများကိုသိရှိနားလည်၍ လိုက်နာဆောင်ရွက်ကြရန်လိုအပ်ပြီး စားသုံးသူအနေဖြင့်လည်း စားသုံးသူ၏အခွင့်အရေးများကိုသိရှိပြီး နစ်နာဆုံးရှုံးမှုများကို အရေးဆိုနိုင်ရန်လိုအပ်ကြောင်း၊ မိမိတို့ထုတ်လုပ်သော ကုန်စည်နှင့်ပတ်သက်၍ စားသုံးသူအား စိတ်စေတနာအပြည့်အဝထား၍ ဥပဒေများပါပြဋ္ဌာန်းချက်များ၊ ညွှန်ကြားချက်များအတိုင်း လုပ်ကိုင် ဆောင်ရွက်ကြခြင်းဖြင့် မိမိတို့၏စားသုံးသူများ၊ မိမိဒေသနှင့်နိုင်ငံအတွက် အကျိုးပြုနိုင်သော စီးပွားရေးလုပ်ငန်းရှင်များဖြစ်ပေါ်လာစေရန် ကြိုးစားဆောင်ရွက်ကြရန်နှင့် စားသုံးသူကာကွယ်ရေးဥပဒေပါ စီးပွားရေးလုပ်ငန်းရှင်များ သိရှိလိုက်နာဆောင်ရွက်ရမည့်အချက်များအား အကျယ်တဝင့်ဟောပြောဆွေးနွေးခဲ့ပါသည်။ အဆိုပါဟောပြောဆွေးနွေးပွဲသို့ MSMEs လုပ်ငန်းရှင်များ(၄၀)ဦးတက်ရောက်ခဲ့ကြောင်းသိရှိရပါသည်။
DOCA(မန္တလေး)