မြို့နယ်အတွင်းရှိ ပြည်တွင်းစားဆန်များတည်ငြိမ်မှန်ကန်မှုရှိစေရေးအတွက် မြို့နယ်ကုန်ဈေးနှုန်းတည်ငြိမ်ရေးလုပ်ငန်းအဖွဲ့ဝင်များသည် (၂၆-၆-၂၀၂၄ )ရက်နေ့၊ နံနက် ၀၈:၃၀ နာရီအချိန်တွင် နွားထိုးကြီးမြို့ပေါ်ရှိဆန်အရောင်းဆိုင်များသို့ သွားရောက်ကွင်းဆင်းစစ်ဆေးခဲ့ကြပါသည်။
ထိုသို့ ကွင်းဆင်းစစ်ဆေးဆောင်ရွက်မှုတွင် မြို့နယ်အထွေထွေအုပ်ချုပ်ရေးဦးစီးဌာန၊ မြို့နယ်စည်ပင်သာယာရေးအဖွဲ့၊ မြို့နယ်စားသုံးသူရေးရာဦးစီးဌာနများမှ တာဝန်ရှိသူများသည် နွားထိုးကြီးမြို့မဈေးရှိဆန်ဆိုင်များ၊ ရပ်ကွက်များအတွင်းရှိ ဆန်ဆိုင်များသို့ကွင်းဆင်း၍ ဆန်ရောင်းချမှုအခြေအနေများနှင့် အများပြည်သူသို့ ဆန်များရောင်းချရာ၌ ဈေးနှုန်းမြှင့်တင်ရောင်းချမှုမရှိစေရေး၊ သတ်မှတ်ရည်ညွှန်းဈေးများနှင့်အညီရောင်းချစေရန်နှင့် ဈေးကစားရန်ရည်ရွယ်၍ သိုလှောင်ခြင်းများမပြုလုပ်ကြရန် ရှင်းလင်းပြောကြားခဲ့ကြပါသည်။ နွားထိုးကြီးမြို့နယ်ရှိ စားသုံးသူပြည်သူများသည် ဒေသထွက်ဆန်များအပြင် ကျောက်ဆည်၊ မြင်းခြံ၊ ရွှေဘို၊ မြောင်းမြ၊ ဝမ်းတွင်း၊ မြစ်သား စသည့်အခြားဒေသများမှ ထွက်ရှိသောဆန်များကို စားသုံးမှုများသည့်အတွက် ဝယ်ယူရောင်းချကြကြောင်းသိရှိရပါသည်။
DOCA(မန္တလေး)