စားသုံးသူရေးရာဦးစီးဌာန၊ တောင်ငူမြို့နယ်တာဝန်ခံ ဦးမြင့်သူသည် ၂၀၂၄ခုနှစ်၊ ဩဂုတ်လ ၉ရက်နေ့၊ နံနက်ပိုင်းတွင် တောင်ငူမြို့၊ အမှတ်(၁)ရပ်ကွက်၊ ထီးလှိုင်ရှိ ပြည့်ဖြိုးကျော်အမှတ်တံဆိပ် ပေါင်မုန့်ကြော်လုပ်ငန်းသို့သွားရောက်၍ ထုတ်လုပ်ဖြန့်ဖြူးရောင်းဝယ်မှုအခြေအနေမျာကို ကွင်းဆင်းလေ့လာခဲ့ပါသည်။
ထိုသို့ကွင်းဆင်းလေ့လာရာ ပြည့်ဖြိုးကြော် ပေါင်မုန့်ကြော်လုပ်ငန်းသည် အလုပ်သမား(၅)ဦးဖြင့် ထုတ်လုပ်လျက်ရှိပြီး တစ်နေ့လျှင် ကုန်ကြမ်းအဖြစ် ကြက်ဥ(၁၂၀)လုံး၊ ဂျုံ ၁၀ကီလိုဂရမ်၊ သကြား ၂၅ကီလိုဂရမ်၊ ပွဆေးတစ်ထုပ်ခွဲ၊ မုန့်နုဆေး (Super-do) အိတ်တစ်ဝက်နှင့် ဆီ (၂၀)ပိဿာအသုံးပြုရကြောင်းသိရပါသည်။
ပုံမှန်အားဖြင့် တစ်ရက်လျှင် ပေါင်မုန့်ကြော် (၂၀၀၀)ခုထုတ်လုပ်ပြီး အော်ဒါအမှာရှိသည့်အခါမျိုးတွင် တစ်ရက်လျှင် (၂၅၀၀)ခုအထိထုတ်လုပ်ကြောင်း၊ ထုတ်လုပ်သည့် ပေါင်မုန့်ကြော်များအား ရပ်ကွက်တွင်းရှိ အိမ်ဆိုင်များနှင့် ဆိုင်ကယ်ဖြင့် ကျေးရွာများသို့ လှည့်လည်ရောင်းသူများအား ရောင်းချပေးကြောင်း၊ ဈေးနှုန်းအနေဖြင့် တစ်ခုလျှင် ၂၄၅ကျပ်ဖြင့်ရောင်းချပြီး တစ်ဆင့်ပြန်လည်ရောင်းသူများမှာ ၃၀၀ကျပ်ဖြင့်ရောင်းချကြကြောင်း လုပ်ငန်းရှင် ဒေါ်ဇင်မာမြင့်၏ ပြောပြချက်အရသိရပါသည်။
DOCA(ပဲခူး)