မကွေးတိုင်းဒေသကြီး၊ ပခုက္ကူခရိုင်၊ ပခုက္ကူဈေးကွက်၌ အခြေခံစားသောက်ကုန်များ ရောင်းချလျက်ရှိသော အရောင်းဆိုင်များတွင် နေ့စဉ်ခေါက်ဆွဲခြောက်ထုပ်များလည်း အရောင်းအဝယ်သွက်လျက်ရှိသည်။ ခေါက်ဆွဲကို ဂျုံသီးနှံကုန်ကြမ်းမှ ကုန်ချောအဖြစ် ထုတ်လုပ်ခြင်းဖြစ်၍ ဂျုံသီးနှံစိုက်ပျိုးမှုများသော စစ်ကိုင်းတိုင်းဒေသကြီး၊ မုံရွာမြို့မှခေါက်ဆွဲခြောက်များဝင်ရောက်ကြောင်း၊ စားသုံးသူများအတွက် ခန္ဓာကိုယ်အားဖြစ်စေပြီး ကျန်းမာရေးနှင့်ညီညွှတ်ပြီး ဈေးနှုန်းသင့်တင့်မျှတစွာဖြင့် အလွယ်တကူဝယ်ယူမှုများကြောင်း၊ စားသုံးသူများအနေဖြင့် ခေါက်ဆွဲသုပ်၊ ခေါက်ဆွဲကြော်၊ ခေါက်ဆွဲ အရည်ပျော်ပြုလုပ်၍ မြန်မာ့ရိုးရာအစားအစာအဖြစ် ရှေးယခင်နှစ်များစွာကတည်းက အသုံးပြုမှုများကြောင်း သိရှိရသည်။
ဈေးနှုန်းအနေဖြင့် ၂၀၂၄ခုနှစ်၊ ဩဂုတ်လ(ဒုတိယပတ်)တွင် ခေါက်ဆွဲခြောက်ထုပ်များ ဈေးနှုန်းမြင့်တက်ကြောင်း၊ ခေါက်ဆွဲတွင် အဝါရောင်နှင့်အဖြူရောင် နှစ်မျိုးရှိကြောင်း၊ ရောင်းချရာတွင် အခေါက် ဆွဲသား အကောင်းနှင့်စက်ကျအကျိုးအကြေနှစ်မျိုး ခွဲခြားပြီးရောင်းချကြောင်း၊ ရွှေဒင်္ဂါးအဝါရောင် ခေါက်ဆွဲခြောက်တစ်စီးလျှင် ကျပ်(၈၀၀)၊ (၂၅)ထုပ်ပါ အစီးတစ်စီးလျှင် ကျပ်(၁၈၈၀၀)၊ ခေါက်ဆွဲကျိုးစက်ကျ တစ်ပိဿာလျှင် ကျပ်(၆၀၀၀) ဈေးဖြင့်အရောင်းအဝယ်ဖြစ်ကြောင်း၊ စွမ်းထက်ခေါက်ဆွဲဖြူ တစ်ပိဿာလျှင် ကျပ်(၇၄၀၀)၊ ခေါက်ဆွဲကျိုးစက်ကျတစ်ပိဿာလျှင် ကျပ်(၅၅၀၀)၊ ခေါက်ဆွဲအလုံး စည်းတစ်စည်းလျှင် ကျပ်(၆၀၀) အသီးသီးအရောင်းအဝယ်ဖြစ်ကြောင်း၊ တစ်လအတွင်း ခေါက်ဆွဲခြောက် ဝါနှင့်အဖြူတစ်ပိဿာလျှင် ပျမ်းမျှ ကျပ်(၂၀၀၀)၊ ခေါက်ဆွဲကျိုးစက်ကျ တစ်ပိဿာလျှင် ကျပ်(၁၅၀၀)ခန့် ဈေးတက်ပြီး အရောင်းအဝယ်ဖြစ်နေကြောင်း၊ ယခုတစ်ပတ်အတွင်း ခေါက်ဆွဲဈေးနှုန်းများ မြင့်တက်ရခြင်းမှာ သယ်ယူစရိတ်မြင့်တက်ခြင်းနှင့် ခေါက်ဆွဲပြုလုပ်ရာတွင် ကုန်ကြမ်းသီးနှံဈေးနှုန်းများ မြင့်တက်ခြင်းကြောင့် ဈေးတက်ကြောင်း၊ ယခုအချိန် စာသင်ကျောင်းများ ဖွင့်လှစ်နေပြီဖြစ်၍ ကျောင်းဈေးတန်းများတွင် ခေါက်ဆွဲသုပ်များရောင်းချမှုများခြင်းကြောင့် အရောင်းအဝယ်သွက်ကြောင်း၊ မြိုင်၊ ရေစကြို၊ ယောနယ်ဒေသများမှလည်း ကုန်ကားများမှတဆင့်မှာယူပြီး ဝယ်ယူမှုများကြောင်း၊ တစ်ပတ်အတွင်း ခေါက်ဆွဲခြောက်ပိဿာ (၁၅၀-၂၀၀) ရောင်းချရကြောင်း ဈေးကွက်မှ သိရှိရပါသည်။
DOCA(မကွေး)