ပဲပင်ပေါက်ဟုဆိုသည်နှင့် ဈေးသက်သာပြီး အလွယ်တကူဝယ်ယူရရှိနိုင်သည့်အပြင် ကျန်းမာရေးအတွက်လည်း အထောက်အကူဖြစ်စေသော အစားအစာတစ်ခုဖြစ်သည်။ ပဲပင်ပေါက်ကို စီးပွားဖြစ်ဖောက်ကြပြီး ရောင်းချသူများရှိသကဲ့သို့ တစ်နိုင်တစ်ပိုင် အိမ်တွင်းတွင် ကိုယ်တိုင်ဖောက်၍ ရောင်းချသူများလည်းရှိကြသည်။ ပဲပင်ပေါက်သည် အာဟာရဓာတ်ကြွယ်ဝသည့်အပြင် ခန္ဓာကိုယ်အတွက် လိုအပ်သောဗီတာမင်နှင့် သတ္တုဓာတ်ကြွယ်ဝစွာပါဝင်သောကြောင့် ကျန်းမာရေးအတွက်လည်း အထောက်အကူဖြစ်စေနိုင်ပါသည်။ ပဲပင်ပေါက်ဖောက်ရာတွင် ပဲတီစိမ်း၊ မတ်ပဲတို့ကို အများဆုံးသုံးကြကြောင်းသိရှိရသည်။ ပဲပင်ပေါက်ဖောက်ရာတွင် ပဲ၊ စကာ သို့မဟုတ် ခြင်းတောင်းနှင့် သဲ သို့မဟုတ် ပြာတို့သာလိုအပ်သောကြောင့် ကုန်ကျစရိတ်နည်းပါး၍ အမြတ်အစွန်းများသော အစားအစာတစ်ခုဖြစ်ပေသည်။ ၂၀၂၄ခုနှစ်၊ သြဂုတ်လ၊ တတိယအပတ်တွင် ပဲပင်ပေါက်ဖောက်ရာတွင် ပဲတီစိမ်းတစ်ပြည်လျှင် ဈေးနှုန်းအနေဖြင့် (၄၇၀၀-၅၀၀၀) ကျပ်ကြားဝယ်ယူရပြီး ပဲတီစိမ်းတစ်ပြည်ဖောက်ရာတွင် ပဲပင်ပေါက် ၃ပိဿာရရှိပြီး ပဲပင်ပေါက် ၁ပိဿာလျှင် ၄၅၀၀ကျပ်ရရှိသောကြောင့် ပဲတီစိမ်းတစ်ပြည်ကို ပဲပင်ပေါက်ဖောက်ရာတွင် အမြတ်အစွန်းအနေဖြင့် ၈၅၀၀ကျပ်အမြတ်အစွန်းရရှိသောကြောင့် အိမ်ထောင်ရှင်မများအနေဖြင့် လုပ်ရလွယ်ကူပြီး ရက်တိုတိုနှင့် အမြတ်အစွန်းရသောပဲပင်ပေါက်ကို တစ်နိုင်တစ်ပိုင်ဖောက်၍လည်း ရောင်းချကြကြောင်းသိရှိရပါသည်။
DOCA(ပဲခူး)