ပြည်ခရိုင်၊ ရွှေတောင်မြို့နယ်ရှိ တောင်လုံးညိုရွာတွင် သစ္စာပန်းများစိုက်ပျိုးထားရှိသဖြင့် တောင်သူဒေါ်အေးဝင်း၏ သစ္စာပန်းစိုက်ခင်းသို့ စားသုံးသူရေးရာဦးစီးဌာန၊ ပြည်ခရိုင်ဦးစီးမှူးရုံးရှိ ဝန်ထမ်းများနှင့် မြို့နယ်တာဝန်ခံတို့သည် (၂၀-၈-၂၀၂၄)ရက်နေ့၊ နေ့လယ် (၁၃:၃၀) နာရီအချိန်တွင် သွားရောက်လေ့လာခဲ့ပါသည်။ စိုက်ပျိုးသောသစ္စာပန်းမျိုးမှာ အဖြူမျိုးဖြစ်ပြီး မျိုးဥကို တင်းချိန်ဖြင့်ဝယ်ယူရပြီး သစ္စာပန်းမျိုးတစ်တင်းကို ၅၀၀၀၀ကျပ်ဖြင့်ဝယ်ယူရပါသည်။ စိုက်ပျိုးချိန်မှာ ကဆုန်လတွင် စတင်စိုက်ပျိုး၍ စိုက်ပျိုးပြီး (၃)လခွဲအကြာဖြစ်သော ဝါခေါင်လဆန်းတွင် စတင်၍ခူးဆွတ်ရပါသည်။ သစ္စာပန်းစိုက်ပျိုးရာတွင် မျိုး(၃)တင်းစိုက်ပျိုးထားရှိပြီး ကုန်ကျစရိတ်မှာ (၄၅၀၀၀၀)ကျပ်ခန့်ကုန်ကျကြောင်းသိရှိရပါသည်။ သစ္စာပန်းထွက်ပေါ်ချိန်တွင် နေ့စဉ်ခူးဆွတ်ရပြီး တစ်နေ့လျှင် အတံ(၆၀၀၀)ကျော်ခန့်ခူးဆွတ်ရရှိပါသည်။ သစ္စာပန်းများကိုရောင်းချသောဈေးမှာ ပန်းရောင်းချသည့်ဆိုင်များမှ ၁၀တံစည်းတစ်စည်းကို (၈၀၀)ကျပ်ဖြင့် လက်ကားလာရောက်ဝယ်ယူကြပြီး သစ္စာပန်းလက်လီဈေးမှာ (၁၀)တံစည်းတစ်စည်းကို (၁၂၀၀)ကျပ်ဖြင့်ရောင်းချကြောင်းသိရပါသည်။ သစ္စာပန်းကို စတင်ပေါ်စမှ အပွင့်တုန်းချိန်အထိ (၁)လခန့်ကြာခူးဆွတ်ရရှိပါသည်။ သစ္စာပန်းစိုက်ပျိုးခြင်းဖြင့် အကျိုးအမြတ်မှာ အများအပြားရရှိကြောင်းသိရှိရပါသည်။
DOCA(ပဲခူး)