![](http://www.doca.gov.mm/sites/default/files/styles/consumer_inner_image__847x424_/public/မြေပဲ_1.jpg?itok=LBpx3k6Z)
စစ်ကိုင်းတိုင်းဒေသကြီး၊ ကလေးခရိုင်၊ မင်းကင်းမြို့နယ်သည် လယ်ယာစိုက်ပျိုးရေးဖြင့် အဓိကအသက်မွေးဝမ်းကျောင်းပြုကြပြီး စိုက်ပျိုးရန် မြေဆီ၊ မြေနှစ်ကောင်းမွန်ခြင်းနှင့် အခြားဒေသ များထက် ရာသီဥတုပုံမှန်ပြီး မိုးကောင်းသောကြောင့် စပါး၊ ပဲမျိုးစုံ၊ နေကြာ၊ နှမ်း အစရှိသည့် သီးနှံများကို စိုက်ပျိုးကြသည်။
စိုက်ပျိုးမြေကောင်းမွန်ပြီး နုန်းတင်မြေနုခင်းများလည်း ရှိသောကြောင့် ဆီထွက်သီးနှံဖြစ် သော မြေပဲကိုလည်း အဓိကသီးနှံအဖြစ် စိုက်ပျိုးကြသည်။ ရေ၊ မြေ၊ ရာသီဥတု ကွာခြားမှုတို့ကြောင့် မင်းကင်းမြို့နယ်မှ ထွက်ရှိသောမြေပဲမှာ အခြားဒေသများ၏ မြေပဲများထက် အရည်အသွေးကောင်း ပြီး ဆီထွက်နှုန်းကောင်းကြောင်း သိရသည်။ မင်းကင်းမြို့နယ်မှ ထွက်ရှိသော မြေပဲဆီသည်လည်း ပဲစိုက်တောင်သူများက မိမိတို့၏ ရပ်ကွက်၊ ကျေးရွာများတွင်သာရှိသော ဆီကြိတ်ခွဲစက်များနှင့် ဆုံများတွင်သာ ကြိတ်ခွဲကြသောကြောင့် မည်သည့်အရောအနှောမှ မပါဝင်ပဲ ပဲဆီသန့်သန့်ကိုသာ ရရှိကြောင်းလည်းသိရသည်။
ဆောင်းမြေပဲကို တန်ဆောင်မုန်းလတွင် စတင်စိုက်ပျိုးကြပြီး တပေါင်းလသည် ပဲသိမ်းချိန် ဖြစ်သည်။ မိုးများသည့်ဒေသဖြစ်သဖြင့် မိုးမြေပဲစိုက်ပျိုးမှု နည်းကြောင်းလည်းသိရသည်။ မိုးမြေပဲ စိုက်ပျိုးရာတွင် ပေါင်းထူခြင်း၊ ပဲနေလှန်းရန်မလွယ်ကူခြင်း၊ ပဲဆံမအောင်ခြင်း စသည့်အခက်အခဲ များကြောင့် စိုက်ပျိုးမှုနည်းခြင်းဖြစ်ကြောင်းလည်း ထပ်မံသိရှိရသည်။
ယခုနှစ် ဆောင်းမြေပဲစိုက်ပျိုးရာတွင် ယခင်နှစ်များထက် ရာသီဥတု သင့်တင့်မျှတသော ကြောင့် ပဲစိုက်တောင်သူတိုင်း ပဲအထွက်နှုန်းကောင်းကြကြောင်း သိရသည်။ တစ်ဧကလျှင် ပဲဆံ နှစ်တင်းခွဲ စိုက်ပျိုးရပြီး အထွက်နှုန်းမှာ နုန်းတင်မြေနုခင်းဖြစ်လျှင် ပဲဆံ တင်းနှစ်ဆယ် ထွက်ရှိပြီး ၊ မြေနုခင်းမဟုတ်သည့် အခြားအခင်းများတွင် ပဲဆံ ဆယ့်ငါးတင်းခန့် ထွက်ရှိကြောင်းလဲ သိရှိရသည်။ မင်းကင်းမြို့နယ်မှ စိုက်ပျိုးထွက်ရှိသော ပဲမျိုးစုံတို့ကို ကလေးဝ၊ ကလေးမြို့၊ မုံရွာ စသည့်မြို့များရှိ ပွဲရုံများသို့တင်ပို့ ရောင်းချကြောင်းသိရသည်။
ယခုနှစ်တွင် မြေပဲ အနီလုံးဆံ ၁ ပိဿာလျှင် ၃၃၀၀/၃၃၇၅၊ အနီဆီဆံ ၁ ပိဿာလျှင် ၃၂၀၀ နှင့် အနီရွေးဆံ ၁ ပိဿာလျှင် ၃၂၅၀ အစရှိသည့်ဈေးများနှင့် ယခင်နှစ်ထက်ဈေးအနည်းငယ် ပိုရသော်လည်း ကိုဗစ်-၁၉ ကပ်ရောဂါနှင့် အခြားသောအကြောင်းအမျိုးမျိုးတို့ကြောင့် အမြို့မြို့ အနယ်နယ်တိုင်း၏ စက်သုံးဆီဈေးနှုန်းများမှာ မြင့်တက်နေပြီး သယ်ယူပို့ဆောင်ခများလဲ မြင့်တက် လာသောကြောင့် မင်းကင်းမြို့နယ်မှ မုံရွာမြို့ရှိပွဲရုံများသို့ စပါး၊ ပဲစသည်တို့ကို တင်ပို့ရောင်းချရာတွင် ကုန်တင်ကားများ၏ သယ်ယူပို့ဆောင်ခဈေးမြင့်တက်မှုတို့ကြောင့် တောင်သူများ အခက်တွေ့ ရကြောင်းကိုလဲ တောင်သူတစ်ဦး၏ ပြောကြားချက်အရ သိရှိရသည်။
DOCA(စစ်ကိုင်း)