မကွေးတိုင်းဒေသကြီး၊ မကွေးမြို့နယ်၊ ကမ်းရင်ကျေးရွာတွင် နှစ်စဉ် ဖရဲစိုက်ပျိုးလျက်ရှိပြီး မိုးရေသောက်စနစ်နှင့် မြေအောက်ရေသွင်းစနစ်ဟူ၍ တစ်နှစ်လျှင် နှစ်ကြိမ်စိုက်ပျိုးကြကြောင်း၊ ယခင်နှစ်တွင် စိုက်ဧက(၇၀)ခန့်မှ ယခုနှစ်တွင် စိုက်ဧက (၁၀၀)ကျော်စိုက်ပျိုးထားကြောင်းသိရသည်။
မျိုးအနေဖြင့် ဖရဲ(855) အလုံးကြီးမျိုးစေ့တစ်ထုပ်လျှင် ငွေကျပ် (၃၆၀၀၀-၄၂၀၀၀) နှင့် ဘာဟူဘာလီ(ဒုံးကျည်) မျိုးစေ့တစ်ထုပ်လျှင် ငွေကျပ်(၃၂၀၀၀-၃၅၀၀၀)ဖြင့် စိုက်ပျိုးရေးဆေးဆိုင်များမှ ဝယ်ယူစိုက်ပျိုးကြကြောင်း ဖရဲစိုက်တောင်သူ ဦးထွန်းထံမှသိရသည်။ ၎င်းအနေဖြင့် (၇)ဧကစိုက်ပျိုးထားကြောင်း၊ စိုက်ပျိုးရာတွင် မြေကိုထယ်ရေးညီအောင်ပြုပြင်၍ တန်းကြား ၅ပေ၊ ကျင်းကြား ၃ပေခြား၍ စိုက်ပျိုးကြောင်း၊ တစ်ဧကလျှင် ဖရဲ(855)မျိုးစေ့ (၄)ထုပ်ခန့်ကုန်ကျကြောင်းနှင့် ဘာဟူဘာလီ (ဒုံးကျည်)မျိုးစိုက်ပျိုးပါက မျိုးစေ့ (၅)ထုပ်ခန့်ကုန်ကျကြောင်း၊ မိုးရေသောက်စနစ်ဖြင့် ၂၀၂၄ခုနှစ်၊ မေလကုန်တွင် စတင်စိုက်ပျိုးပြီး ဩဂုတ်လတွင် ခူးဆွတ်ရောင်းချရကြောင်း၊ စိုက်ပျိုးမှုကုန်ကျစရိတ်အနေဖြင့် မျိုး၊ သွင်းအားစု၊ လုပ်သားခ၊ ထွန်ယက်ခအပါအဝင် တစ်ဧကလျှင် ငွေကျပ်၅၀၀၀၀၀ကျော်ကုန်ကျပြီး အထွက်နှုန်းအနေဖြင့် တစ်ဧကလျှင် ဖရဲ(855) မျိုးဆိုလျှင် အလုံး ၁၀၀၀ခန့်ထွက်ရှိကြောင်းနှင့် ဘာဟူဘာလီ(ဒုံးကျည်)မျိုးဆိုလျှင် အလုံးရေ(၁၃၀၀-၁၅၀၀) ထွက်ရှိကြောင်းသိရသည်။
ဈေးနှုန်းအနေဖြင့် ၂၀၂၄ခုနှစ်၊ ဩဂုတ်လ စတုတ္ထပတ်တွင် လက်ကားဈေးနှုန်း (အနိမ့်ဆုံး ၅ပိဿာရှိ) ဖရဲ(855) တစ်လုံးလျှင် ငွေကျပ်၂၅၀၀၊ (အနိမ့်ဆုံး ၂ပိဿာရှိ) ဘာဟူဘာလီ(ဒုံးကျည်) တစ်လုံးလျှင် ငွေကျပ်(၁၅၀၀-၁၈၀၀)ဖြင့်ရောင်းချရကြောင်း၊ ဖရဲစိုက်တောင်သူများအနေဖြင့် ဖရဲ(855) မျိုး တစ်ဧကလျှင် ငွေကျပ် (၂၀၀၀၀၀၀)၊ ဘာဟူဘာလီ(ဒုံးကျည်)မျိုး တစ်ဧကလျှင် ငွေကျပ် (၂၂၀၀၀၀၀)ခန့်အကျိုးအမြတ်ရရှိကြောင်း၊ ဈေးကွက်အနေဖြင့် မကွေး၊ မင်းဘူး၊ စကု၊ ရေနံချောင်း မြို့များအပြင် ရန်ကုန်မြို့သို့လည်းတင်ပို့ကြောင်း၊ ဖရဲစိုက်ပျိုးရာတွင် ကုန်ကျစရိတ်သက်သာပြီး အကျိုးအမြတ်များပိုမိုရရှိသောကြောင့် နှစ်စဉ်တိုးချဲ့စိုက်ပျိုးလျက်ရှိကြောင်းသိရှိရပါသည်။
DOCA(မကွေး)