မကွေးတိုင်းဒေသကြီး၊ မင်းဘူးမြို့နယ်အတွင်းရှိ ပေါက်ပင်တွင်း၊ ရေမျက်နှင့် ကျောက်တန်းကျေးရွာတို့တွင် ခရမ်းချဉ်ကို အဓိကစိုက်ပျိုးလျက်ရှိပြီး ယခုနှစ်တွင် စိုက်ဧက (၁၂၀) ကျော်စိုက်ပျိုးထားကြောင်းသိရသည်။
မျိုးအနေဖြင့် LORA 909 (သီးစို) မျိုးကို စိုက်ပျိုးရေးဆေးဆိုင်များမှ ဝယ်ယူစိုက်ပျိုးကြကြောင်း၊ တစ်ဧကလျှင် LORA 909 မျိုးစေ့ (၅) ထုပ်ခန့်ကုန်ကျကြောင်း၊ စိုက်ပျိုးရာတွင် မျိုးစေ့ကို အိတ်ဖြင့်ပျိုးထောင်ကာ (၁၅)ရက်သားအရွယ်တွင် မြေချ၍ တိုင်ထောင်စနစ်ဖြင့်စိုက်ပျိုးကြောင်း၊ ၂၀၂၄ခုနှစ်၊ ဇွန်လတွင် စတင်စိုက်ပျိုးပြီး ဩဂုတ်လတွင် လှိုင်လှိုင်ထွက်ပေါ်လျက်ရှိကြောင်း၊ စိုက်ပျိုးမှုကုန်ကျစရိတ်အနေဖြင့် မျိုး၊ သွင်းအားစု၊ လုပ်သားခအပါအဝင် တစ်ဧကလျှင် ငွေကျပ် (၃၀၀၀၀၀၀) ခန့်ကုန်ကျပြီး အထွက်နှုန်းအနေဖြင့် တစ်ဧကလျှင် ပိဿာချိန် (၃၂၀၀-၃၅၀၀) ခန့်ထွက်ရှိကြောင်းသိရသည်။
ဈေးနှုန်းအနေဖြင့် ဩဂုတ်လ စတုတ္ထပတ်တွင် လက်ကားဈေး ခရမ်းချဉ်သီးတစ်ပိဿာလျှင် ငွေကျပ် (၁၈၀၀-၂၀၀၀) ဖြင့်ရောင်းချရကြောင်း၊ ခရမ်းချဉ်စိုက်တောင်သူများအနေဖြင့် တစ်ဧကလျှင် ငွေကျပ် (၄၀၀၀၀၀၀)ခန့်အကျိုးအမြတ်ရရှိကြောင်း၊ ဈေးကွက်အနေဖြင့် မကွေးမြို့နှင့် မင်းဘူးမြို့သို့ တင်ပို့ကြောင်း၊ ရာသီဥတုပြောင်းလဲမှုကြောင့် ယခင်နှစ်အောက် အထွက်နှုန်းလျော့နည်းသော်လည်း ခရမ်းချဉ်သီးထွက်ပေါ်ချိန်တွင် ဈေးနှုန်းကောင်းမွန်မှုကြောင့် အကျိုးအမြတ်များရရှိကြောင်းသိရှိရပါသည်။
DOCA(မကွေး)