ကြောင်လျှာပင်သည် မြန်မာနိုင်ငံအနှံ့အပြားတွင် ပေါက်ရောက်နိုင်ပြီး အသီး၊ အပွင့်၊ အမြစ်၊ အခေါက်အားလုံးတို့ကို စားဖွယ်၊ သောက်ဖွယ်နှင့် ဆေးအဖြစ် အသုံးပြုကြပါသည်။ ကြောင်လျှာသီးသည် မိုးရာသီတွင် လှိုင်လှိုင်ပေါများပြီး ဇွန်လတွင် စတင်ထွက်ရှိပါသည်။ ကြောင်လျှာသီးသည် ဖန်၊ ချို၊ ခါးစသောအရသာရှိပြီး လူကြိုက်များသော အသီးအနှံတစ်မျိုးလည်း ဖြစ်ပါသည်။ ကြောင်လျှာပွင့်နှင့်အရွက်ကို ပြုတ်၍ဖြစ်စေ ရေနွေးဖျော၍ဖြစ်စေ သုပ်စားခြင်း၊ အတို့အမြုပ်လုပ်စားခြင်းများပြုလုပ်ကြပြီး ကြောင်လျှာသီးကို အစိမ်းသုပ်စားခြင်း၊ ချဉ်ဖက်ထည့်ခြင်း၊ ကြော်စားခြင်း၊ မီးဖုတ်စားသုံးခြင်းအပြင် အသား/ငါးဟင်းလျာများနှင့်လည်း ရောနှောချက်ပြုတ်ကာ စားသုံးကြကြောင်းသိရှိရပါသည်။
နတ်တလင်းမြို့နယ်အတွင်းရှိ ကျေးရွာအချို့မှ ကြောင်လျှာသီးများ မြို့နယ်ဈေးကွက်အတွင်းသို့ ဇွန်လအတွင်း စတင်ဝင်ရောက်လာရာ ပေါ်ဦးပေါ်စအချိန်တွင် ကြောင်လျှာသီးတစ်တောင့်လျှင် အရွယ်အစားအပေါ်မူတည်၍ (၇၀၀-၈၀၀)ကျပ်ဖြင့် ဈေးကောင်းရရှိခဲ့ပြီး ယခုဩဂုတ်လနောက်ဆုံးအပတ် အသီးများလှိုင်လှိုင်ပေါများစွာထွက်ရှိချိန်တွင် ကြောင်လျှာသီးတစ်တောင့်လျှင် ခြံပေါက်ဈေး(လက်ကားစျေး) (၂၅၀-၃၅၀)ကျပ်နှင့် ဈေးကွက်အတွင်းတွင် လက်လီစျေးနှုန်းအနေဖြင့် (၄၀၀-၅၀၀)ကျပ်နှုန်းဖြင့် ရောင်းချနေကြောင်း သိရှိရပါသည်။
DOCA(ပဲခူး)