![](http://www.doca.gov.mm/sites/default/files/styles/consumer_inner_image__847x424_/public/၃၉၀.jpg?itok=hFQj70O3)
စစ်ကိုင်းတိုင်းဒေသကြီး၊ စားသုံးသူရေးရာဦးစီးဌာန၊ ကန့်ဘလူမြို့နယ်တာဝန်ခံရုံးသည် တိုင်းဒေသကြီးဦးစီးမှူး၏လမ်းညွှန်မှု၊ ခရိုင်ဦးစီးမှူး၏ကြီးကြပ်မှုတို့ဖြင့် စားသုံးသူကာကွယ်ရေးလုပ်ငန်းများအပြင် အခြားသောသတင်းအချက်အလက်များကိုလည်း သိရှိလေ့လာနိုင်စေရန်ရည်ရွယ်၍ ဒေသတွင်းရှိ စိုက်ပျိုးမွေးမြူရေးလုပ်ငန်းများ၏ စိုက်ပျိုးထုတ်လုပ်မှု၊ အကျိုးအမြတ်ရရှိမှုတို့ကို ကွင်းဆင်းလေ့လာပြီး ရေးသားတင်ပြလျက်ရှိကြောင်းသိရသည်။
ကန့်ဘလူမြို့နယ်တွင် စိုက်ပျိုးရလွယ်ကူပြီး မြေနေရာအကျယ်အဝန်းအများကြီးမလိုသော ရုံးပတီသီးများကိုစိုက်ပျိုးကြသည်။ ရုံးပတီသီးသည် မိသားစုစားသုံးရန်အတွက် ဟင်းတစ်ခွက်ရရုံသာမက ရောင်းချခြင်းဖြင့် မိသားစုအပိုဝင်ငွေရရှိသောကြောင့် စိုက်ပျိုးသင့်ကြောင်း၊ စိုက်ပျိုးစရိတ်ကုန်ကျမှုနည်းပြီး စိုက်ပျိုးသော မျိုး၊ နည်းစနစ်နှင့် အပင်ပြုစုမှုတို့အပေါ်မူတည်၍ တစ်ဧကလျှင် (၁၀၀၀-၂၅၀၀)ပိဿာခန့်ထွက်ရှိကြောင်းသိရသည်။
မြန်မာလူမျိုးများသည် ရုံးပတီသီးကိုနှစ်သက်စွာချက်ပြုတ်စားသောက်ကြကြောင်း၊ ယခုအခါ စားသောက်ဆိုင်များ၊ အကင်ဆိုင်များတွင် ရုံးပတီသီးသည် လူအများကြိုက်နှစ်သက်သည့် အစားအစာဖြစ်ကြောင်း၊ ကန့်ဘလူမြို့မဈေးတွင် ရုံးပတီသီး (၅)တောင့်ပါတစ်စီးလျှင် ငွေကျပ် (၂၀၀)၊ (၁)ပိဿာလျှင် ငွေကျပ်(၂၀၀၀)ဖြင့်ရောင်းချကြောင်း၊ မိမိတို့နေအိမ်ခြံဝန်းတွင်လည်းကောင်း၊ ယာကွက်များတွင်လည်းကောင်း စိုက်ပျိုးထွက်ရှိသည့်အတွက် စားစရာဟင်းတစ်ခွက်အပြင် အသီးကိုခူးဆွတ်ရောင်းချခြင်းဖြင့် မိသားစုဝင်ငွေရရှိကြောင်းသိရှိရပါသည်။
DOCA(စစ်ကိုင်း)