မကွေးတိုင်းဒေသကြီး၊ သရက်ခရိုင်၊ အထက်မင်းလှမြို့နယ်၊ ပန်းတော်ပြင်ကျေးရွာကျေးအုပ်စုရှိ ပန်းတော်ပြင်ကျေးရွာတွင် မိုးနှမ်းကို တောင်သူ(၁၅၀)ဦးက စိုက်ဧက(၈၅၀)ဧကကို ၂၀၂၄ခုနှစ်၊ မေလ၌ စတင်စိုက်ပျိုးပြီး ဩဂုတ်လ(စတုတ္ထပတ်)တွင် ရိတ်သိမ်းကြောင်းသိရသည်။
ပန်းတော်ပြင်ကျေးရွာ၌ မိုးနှမ်းစိုက်ပျိုးရာတွင် နှမ်းနီကိုအများဆုံးစိုက်ပျိုးကြောင်း၊ တောင်သူ ဦးတင်မိုးလှိုင်က ၎င်းအနေဖြင့် နှမ်းနီ(၃)ဧကခန့်ကို ထွန်ကြောင်းဆွဲအစေ့ချစနစ်ဖြင့် စိုက်ပျိုးကြောင်း၊ ယခင်နှစ်တွင် နှမ်းစိုက်ခင်းမှထွက်ရှိသည့် နှမ်းစေ့များကို မျိုးအဖြစ်ဖယ်ချန်၍ စိုက်ပျိုးခြင်းဖြစ်ကြောင်း၊ (၁)ဧကလျှင် မျိုး(၂)ပြည်ခွဲခန့်ကုန်ကျကာ အထွက်နှုန်းအနေဖြင့် (၁၂)တင်းထွက်ရှိကြောင်း၊ (၁)တင်းလျှင် ကျပ်(၁၁၅၀၀၀)ဈေးရရှိကြောင်း၊ ကုန်ကျစရိတ်အနေဖြင့် လုပ်အားခနှင့် အခြားသွင်းအားစုစရိတ်အပါအဝင် နှမ်းခင်းပေါင်းရှင်းခပေါ်မူတည်၍ (၁)ဧကလျှင် စုစုပေါင်း ကျပ်(၃၅၀၀၀၀ မှ ၅၀၀၀၀၀) ထိကုန်ကျကြောင်း၊ အကျိုးအမြတ်အနေဖြင့် (၁)ဧကလျှင် ကျပ်(၈)သိန်းမှ (၁၀)သိန်းကျော်ထိရရှိကြောင်း၊ ဈေးကွက်အနေဖြင့် အထက်မင်းလှမြို့ရှိပွဲရုံများသို့ ရောင်းချကြောင်းသိရှိရပါသည်။
DOCA(မကွေး)