ရန်ကုန်တိုင်းဒေသကြီး၊ တွံတေးခရိုင်၊ ကော့မှူးမြို့နယ်၌ ၂၀၂၄-၂၀၂၅ ခုနှစ်အတွက် မိုးစပါးလျာထားဧက (၈၈၀၉၉)ဧကစိုက်ပျိုးပြီးစီးကြောင်း ကော့မှူးမြို့နယ်စိုက်ပျိုးရေးဦးစီးဌာန မြို့နယ်ဦးစီးမှူး ဦးသက်နိုင်၏ ပြောကြားချက်အရ သိရသည်။
ကော့မှူးမြို့နယ်၌ ၂၀၂၄-၂၀၂၅ ခုနှစ် မိုးစပါးစိုက်ပျိုးရာသီတွင် ဆန်စပါးစိုက်ပျိုးထုတ်လုပ်မှုကဏ္ဍတိုးတက်စေရန်နှင့် ဒေသအတွင်း စားနပ်ရိက္ခာဖူလုံစေရန်နှင့် ပြည်ပသို့တင်ပို့နိုင်ရေးအတွက်ရည်ရွယ်၍ ကော့မှူးမြို့နယ်ဒေသခံတောင်သူများက တစ်မြို့နယ်လုံး မိုးစပါးသီးနှံစိုက်ဧက (၈၈၀၉၉)ဧကလျာထားလျက် လျာထားချက်ရာနှုန်းပြည့်ကို အောင်မြင်ဖြစ်ထွန်းစွာစိုက်ပျိုးနိုင်ခဲ့ကြောင်းသိရသည်။
ကောမှူးမြို့နယ်၌ ယခုနှစ်မိုးစပါးစိုက်ပျိုးတောင်သူများကို မြို့နယ်စိုက်ပျိုးရေးဦးစီးဌာနမှ တာဝန်ရှိသူများက ဒေသနှင့်ကိုက်ညီသည့် မျိုးကောင်းမျိုးသန့်များရရှိရေး၊ စိုက်နည်းစနစ်များမှန်ကန်စေရေး၊ ပိုးမွှားကျရောက်မှုကင်းရှင်းစေရေး၊ ဓာတ်မြေဩဇာများကိုစနစ်တကျသုံးစွဲရေးနှင့် အထွက်နှုန်းကောင်းမွန်စေရေးတို့အတွက် သက်ဆိုင်ရာဆက်စပ်ဌာန၊ စိုက်ပျိုးမှုဆိုင်ရာကြီးကြပ်ကွပ်ကဲရေးအဖွဲ့များနှင့်ပူးပေါင်း၍ စိုက်ပျိုးရေးအသိပညာပေးလုပ်ငန်းများကိုလည်း တစ်မြို့နယ်လုံးအတိုင်းအတာအထိ ဆောင်ရွက်ပေးလျက်ရှိကြောင်းသိရှိရပါသည်။
DOCA(ရန်ကုန်)