၂၀၂၄ခုနှစ်၊ စစ်ကိုင်းတိုင်းဒေသကြီး၊ ကန့်ဘလူခရိုင်၊ ကန့်ဘလူမြို့၊ မြို့မစည်ပင်သာယာဈေးကွက်အတွင်းသို့ ရှမ်းပြည်နယ် အောင်ပန်းတို့မှထွက်ရှိသော ခရမ်းချည်သီးများကို မန္တလေးတိုင်းဒေသကြီးမှ မှာယူရောင်းချပြီး အရောင်းအဝယ်ဖြစ်လျက်ရှိကြောင်းသိရှိရပါသည်။
ခရမ်းချည်သီးများသည် ယခုအချိန် မိုးရာသီတွင် ဒေသထွက်ခရမ်းချည်သီးများ ဈေးကွက်အတွင်းသို့ ဝင်ရောက်မှုမရှိသည့်အတွက် ရှမ်းပြည်နယ် အောင်ပန်းဒေသထွက် ခရမ်းချည်သီးများကို မန္တလေးမြို့မှ မှာယူရောင်းချရပါသည်။ ရှမ်းပြည်၊ အောင်ပန်းဒေသထွက် ခရမ်းချည်သီးများမှာ ရာသီမရွေး ဝယ်ယူစားသုံးနိုင်ပြီး အခွံထူ၍ အချည်အရသာနည်းသည့်အပြင် အလုံးအရွယ်အစားလှခြင်း၊ အထားခံခြင်းတို့ကြောင့် လူအများက ကြိုက်နှစ်သက်လျက်ရှိရာ ယခင်ဩဂုတ်လ၊ စက်တင်ဘာလများတွင် ခရမ်းချည်သီးဈေးနှုန်းများမှာ တစ်ပိဿာလျှင် (၃၀၀၀/၃၅၀၀)ကျပ်တို့ဖြစ်ခဲ့ကြောင်းသိရှိရပါသည်။
ယခု မန္တလေးမြို့မှ ဖောက်သည်မှာယူရသည့် ခရမ်းချည်သီးဈေးနှုန်းမှာ တစ်ပိဿာလျှင် (၃၅၀၀) ကျပ်ဖြင့်မှာယူရကြောင်း၊ ရှမ်းပြည်နယ်၌ ရေကြီးရေလျှံဖြစ်ခြင်း၊ လမ်းပမ်းဆက်သွယ်ရေးအခက်အခဲများကြောင့်လည်း ဈေးနှုန်းများမြင့်တက်လာပြီး ယခုအောက်တိုဘာလ၊ ဒုတိယအပတ်တွင် ခရမ်းချည်သီးဈေးနှုန်းအနေဖြင့် တစ်ပိဿာလျှင် (၄၅၀၀)ကျပ်၊ (၂၅)ကျပ်သားလျှင် (၁၂၀၀)ကျပ်ဈေးနှုန်းတို့ဖြင့် အရောင်းအဝယ်ဖြစ်လျက်ရှိကြောင်းသိရှိရပါသည်။
DOCA(စစ်ကိုင်း)