မွန်ပြည်နယ် ပေါင်မြို့နယ်အနီး ဝန်းကျင်နှင့်ကျေးလက်ဒေသများတွင် တိုင်ထောင် ပဲတောင့်ရှည်စိုက်တောင်သူများ ဈေးကောင်းရရှိသဖြင့် မိသားစုတစ်ပိုင်တစ်နိုင် စိုက်ပျိုးရာမှ စီးပွားဖြစ် တိုးချဲ့စိုက်ပျိုးလာကြကြောင်း သိရသည်။
တိုင်ထောင်ပဲတောင့်ရှည်ပင်များကို မစိုက်မီမြောင်းပေါင်ကို အရင်ဆုံးပြုပြင်ရပြီး စိုက်ပေါင်များအတွင်း မြေခံကြက်ချေး သို့မဟုတ် နွားချေးနှင့် ဆန်စက်မှရရှိသည့် ဖွဲမှုန့်များကို ရောစပ်ထည့်ပေးရကြောင်း၊ ပဲမျိုးစေ့များကို အစေ့ချစနစ်ဖြင့် စိုက်ပျိုးကာ တစ်ပင်နှင့်တစ်ပင် တစ်တောင်ခြား စိုက်ပျိုးရကြောင်း၊ အပင်ကြီးထွားမှုနှင့် လေဝင်လေထွက်ကောင်းရန် ဂရုစိုက်ရပြီး ရက် (၄၀) ခန့်အကြာတွင် စတင်အသီးသီးကာ ရက် (၅၀) ကြာလျှင် အသီးလှိုင်လှိုင် ထွက်ရှိကြောင်းနှင့် နှစ်ရက်ခြားတစ်ခါခူး၍ ရောင်းချရပြီး နှစ်လကြာအထိ ခူးဆွတ်ရောင်းချရပြီး တိုင်ထောင်ပဲတောင့်ရှည်ပင်များကို ရာသီမရွေး စိုက်ပျိုးရကြောင်း၊ ဒေသပေါက်စျေး တစ်ပိဿာလျှင် (၅၀၀၀) ဆယ်တောင့်တစ်စည်းလျှင် ငွေကျပ် (၅၀၀) ရရှိကြောင်း တောင်သူတစ်ဦးထံမှ သိရသည်။
DOCA(မွန်)