ကယားပြည်နယ်တွင် ဆီထွက်သီးနှံတစ်မျိုးဖြစ်သည့် မြေပဲကိုလည်းအဓိကထား စိုက်ပျိုးလျှက်ရှိပြီး မိုးမြေပဲကို မေလနှင့်ဇွန်လမှာ စိုက်ပျိုးကြပြီး အောက်တိုဘာလတွင် ထွက်ရှိကြောင်း၊ ဆောင်းမြေပဲကို အောက်တိုဘာလမှာ စိုက်ပျိုးပြီး ဖေဖော်ဝါရီလတွင်ထွက်ရှိပြီး မြေပဲကို လွိုင်ကော် ခရိုင် လွိုင်ကော်မြို့နယ်၊ဒီးမော့ဆိုမြို့နယ်နှင့် ဖရူဆိုမြို့နယ်များတွင် အများဆုံးစိုက်ပျိုးကြပါသည်။ ၂၀၂၁-၂၀၂၂ခုနှစ် မြေပဲစိုက်ဧက (၉၈၀၆)ဧကစိုက်ပျိုးပြီး ထွက်ရှိနှုန်းမှာ(၄၄၁၅၃၂)တင်းထွက်ရှိပြီး ဆီထွက်နှုန်းမှာ(၆၇၇၀၈၄)ပိဿထွက်ရှိကြောင်း စိုက်ပျိုးရေးစာရင်းအရသိရှိရပြီး မတ်လမှမေလ အတွင်း မြေပဲဆံဈေးနှုန်းတစ်ပိသာလျှင် (၄၀၀၀)ကျပ်နှုန်း၊ မြေပဲဆီ တစ်ပိသာလျှင် (၁၀၀၀၀) ကျပ် ဈေးနှုန်းဖြင့် အရောင်းအဝယ်ဖြစ်လျှက်ရှိပြီး ယခင်ဇန်နဝါရီလမှ ဖေဖော်ဝါရီလအတွင်း မြေပဲဆံ တစ်ပိသာလျှင် (၃၁၀၀) ကျပ်နှုန်း၊ မြေပဲဆီ တစ်ပိသာလျှင် (၈၀၀၀)ကျပ်ဈေးနှုန်းဖြင့် အရောင်း အဝယ်ဖြစ်ခဲ့ကြောင်း ယခင်လများနှင့်နှိုင်းယှဉ်လျှင် မြေပဲဆံတစ်ပိသာလျှင် (၉၀၀) ကျပ်၊ မြေပဲဆီ တစ်ပိသာလျှင် (၂၀၀၀)ကျပ်ခန့် ဈေးနှုန်းမြှင့်တက်လျှက်ရှိကြောင်း ဆီစက်လုပ်ငန်းရှင် တစ်ဦးထံမှ သိရပါသည်။
DOCA(ကယား)