ဂေါ်ရခါးသီးအပင်သည် နှစ်ရှည်သီးနှံမျိုးဖြစ်ပြီး အကြမ်းခံသောအပင်အမျိုးအစားဖြစ်ပါသည်။ မြေအမျိုးအစားအမျိုးမျိုးတွင် စိုက်ပျိုးနိုင်ပြီး ဂေါ်ရခါးအညွှန့်ကို ချက်ပြုတ်စားသောက်နိုင်သလို အသီးကိုလည်းပုံစံအမျိုးမျိုးဖြင့် ချက်ပြုတ်စားသောက်နိုင်ပါသည်။ ဂေါ်ရခါးအသီးကို ပျိုးထောင်စိုက်ပျိုးနိုင်သလို အမြစ်အုံကိုသားခွဲယူ၍လည်း စိုက်ပျိုးနိုင်ပါသည်။အသီးကိုမြေပေါ်တွင် အလျားလိုက်ချ၍ အစေ့ကိုအပေါ်ဘက်တွင်ထားပြီး အသီးတစ်ဝက်ဖော်၍ စိုက်ပျိုးရပါသည်။ အသီးအပင်ပေါက်စဉ်ရေမလောင်းရပါ။ အစေ့အပင်ပေါက်လာပြီးနောက် ရေကိုသင့်တင့်စွာ လောင်းပေးရပါသည်။ မြေသြဇာအဖြစ်ယူရီယား၊ တီစူပါ၊ ပိုတက်ရှ် အစရှိသည့်မြေသြဇာများကို လိုအပ်သလို အသုံးပြုနိုင်ပါသည်။ အသီးကြီးထွားမှုမြန်ပါက (၁၅-၁၆)ရက်ကြာလျှင် ခူးဆွတ်နိုင်ပါသည်။ ယခုအချိန်တွင်ပြင်ဦးလွင်မြို့နယ်အနီးစခန်း၊ အောင်ချမ်းသာ ၊ ပြင်စာကျေးရွာများမှထွက်ရှိသာ ဂေါ်ရခါးသီးနှင့် အညွှန့်များကို ပြင်ဦးလွင်နှင့်မန္တလေးမြို့များသို့တင်ပို့ ရောင်းချလျက်ရှိကြောင်း၊ ဂေါ်ရခါးသီးစိုက်ပျိုးသည့် တောင်သူများနှင့်ဒေသထွက် ပစ္စည်းအမျိုးမျိုးရောင်းချသူများထံမှ သိရှိရပါသည်။ ဂေါ်ရခါးသီးစျေးအနေဖြင့်တစ်လုံးလျှင်လက်လီစျေး (၅၀၀-၆၀၀)ကျပ်အထိရောင်းချပြီး ဂေါ်ရခါးညွှန့်(၅၀)ကျပ်သား တစ်စီးလျှင်(၃၀၀၀)ကျပ်နှင့် နှစ်စီးလျှင် (၅၀၀၀)ကျပ် ရောင်းချလျက် ရှိကြောင်းသိရှိရပါသည်။
DOCA(မန္တလေး)