စားသုံးသူရေးရာဦးစီးဌာန၊ တောင်ငူခရိုင်ဦးစီးမှူး ဦးမျိုးအောင်သည် ဌာနခွဲတာဝန်ခံများနှင့် တောင်ငူမြို့နယ်တာဝန်ခံတို့နှင့်အတူ ဒီဇင်ဘာလ ၁၁ ရက်နေ့ မွန်းလွဲပိုင်းတွင် တောင်ငူမြို့ပေါ်ရှိ ဆန်အရောင်းဆိုင်များနှင့် စားသုံးဆီအရောင်းဆိုင်များသို့ ဈေးကွက်စောင့်ကြည့်စစ်ဆေးခဲ့ကြောင်းသိရသည်။
ခရိုင်ဦးစီးမှူးသည် ဆန်အရောင်းဆိုင်ကြီးများ၌ ဈေးနှုန်းဈေးကွက်အခြေအနေများ၊ ဆန် ၂၅ တန်နှင့်ညီမျှသည့်ဆန်အိတ် ၅၀၀ သိုလှောင်နိုင်သည့် ဆန်အရောင်းဆိုင်ကြီးများ မြန်မာဆန်စပါး (MyRO)တွင် မှတ်ပုံတင်ထားရှိသည့်အခြေအနေများကိုမေးမြန်းပြီး ကုန်ဈေးနှုန်းတည်ငြိမ်မှုရှိစေရေးအတွက် ပေါ်ဆန်းဆန်များအပါအဝင် ပြည်တွင်းစားသုံးဆန်များ သတ်မှတ်ရည်ညွှန်းဈေးထက် ပိုမိုရောင်းချခြင်းမပြုရန် အသိပညာပေးခဲ့ကြောင်းသိရသည်။
ထို့အတူ စားသုံးဆီအရောင်းဆိုင်များတွင် ရည်ညွှန်းဈေးဖြင့် ဝယ်ယူခွင့်ရရှိသည့် စားအုန်းဆီများအား စားသုံးသူပြည်သူများသို့ စနစ်တကျပြန်လည်ရောင်းချဖြန့်ဖြူးခြင်း၊ အမှတ်တံဆိပ်ပါစားသုံးဆီများ ကုန်အညွှန်းအမှတ်အသားများကို ညွှန်ကြားချက်နှင့်အညီ ဖော်ပြထားခြင်းများကို ကြည့်ရှုစစ်ဆေးပြီး ရည်ညွှန်းဈေးဖြင့်ဝယ်ယူခွင့်ရရှိသည့် စားအုန်းဆီများအား ဝယ်ရင်းဈေးအပေါ် သယ်ယူစရိတ်ပေါင်းပြီး နှစ်ရာခိုင်နှုန်းထက်မပိုသော အမြတ်ဖြင့်ရောင်းချရေး ညွှန်ကြားချက်ကိုတိကျစွာလိုက်နာဆောင်ရွက်ရန်၊ တရားမဝင်စားသုံးဆီများကို ရောင်းချခြင်းမပြုရန် ဆိုင်ပိုင်ရှင်နှင့် ဆိုင်ကိုယ်စားလှယ်များအား အသိပညာပေးခဲ့ကြောင်း သိရှိရပါသည်။
DOCA(ပဲခူး)