ပဲခူးတိုင်းဒေသကြီး၊ ပြည်ခရိုင် ရွှေတောင်မြို့နယ် ဝါးတော၊ ဝါးလည်ကျေးရွာများတွင် သီးနှံမျိုးစုံ စိုက်ပျိုးလျက်ရှိရာ ရာသီပေါ်သီးနှံတစ်မျိုးဖြစ်သော ပဲစောင်းခါးသီး (ကင်းပဲ)သီးနှံကို တောင်သူ (၁၇)ဦးမှ စိုက်ဧက(၅)ဧက ကို စိုက်ပျိုးထားရှိကြောင်းသိရှိရပါသည်။
ပဲစောင်းခါးသီး(ကင်းပဲ)ကို မိုးနှောင်းကာလဖြစ်သော စက်တင်ဘာလနှင့် အောက်တိုဘာ လများတွင် စတင်စိုက်ပျိုးကြပြီး စိုက်ပြီးချိန်မှ (၂)လအကြာတွင် စတင်ခူးဆွတ်ခွင့် ရပါသည်။ စတင် ခူးဆွတ်ချိန်မှ စ၍ (၂)ရက်ခြားတစ်ကြိမ်၊ တစ်လလျှင် (၁၀)ကြိမ်နှင့် (၃)လခန့် ခူးဆွတ်ရပါသည်။ စုစုပေါင်းအကြိမ် (၃၀)ခန့်ခူးဆွတ်ရပါသည်။
အထွက်နှုန်းအနေဖြင့် (၁)ဧကလျှင် တစ်ကြိမ်ခူးလျှင် ပိဿာ(၁၅၀)မှ ပိဿာ(၃၀၀)အထိ ထွက်ရှိပြီး အနည်းဆုံးပျမ်းမျှ ပိဿာ(၆၀၀၀)ခန့်ထွက်ရှိကြောင်းသိရပါသည်။ ပဲစောင်းခါးသီး (ကင်းပဲ)ကို ဈေးများတွင် ရောင်းချသောဈေးမှာ စတင်ပေါ် ပေါက်ချိန်က တစ်ပိဿာလျှင် ၁၇၀၀-၁၈၀၀ ကျပ်အထိ ရရှိခဲ့ပြီး ယခုအချိန်တွင် (၁)ပိဿာလျှင် (၁၀၀၀)ကျပ်သာရရှသဖြင့် စုစုပေါင်း ရောင်းရငွေမှာ သိန်း(၆၀)ခန့်ရရှိနိုင်ကြောင်းသိရပါသည်။ စိုက်ပျိုးထုတ်လုပ်မှု ကုန်ကျစရိတ် အနေဖြင့် မျိုးစေ့၊ သွင်းအားစု၊ ဝါးနှင့် လုပ်သားခများအပါအဝင် (၁၂)သိန်းခန့်ကုန်ကျပြီး အကျိုးအမြတ်အနေဖြင့် (၁)ဧက လျှင်(၄၈)သိန်းခန့်ရရှိကြောင်း သိရပါသည်။ ထွက်ရှိလာသော ပဲစောင်းခါးသီး(ကင်းပဲ)ကို သီးနှံကုန်စိမ်းဒိုင်များမှတဆင့် အနီးအနားရှိ မြို့များ နှင့် ရန်ကုန်မြို့ သို့တင်ပို့ရောင်းချကြကြောင်းသိရှိရပါသည်။
DOCA(ပဲခူး)