မြန်မာနိုင်ငံတွင်မေမြို့ပန်း(Aster)ကို ပြင်ဦးလွင်(မေမြို့)တွင်သာမက ယခုအခါ တိုင်းဒေသကြီးနှင့် ပြည်နယ်အနှံ့အပြား၌ အများအပြားစိုက်ပျိုးဖြစ်ထွန်းလျက်ရှိကြောင်း သိရသည်။ မေမြို့ပန်းသည် အခိုင်လိုက် အစုလိုက်ပွင့်သော ပန်းဖြစ်ပြီး အရောင်အသွေးအားဖြင့် အဖြူ၊အနီ၊ ပန်းရောင်၊ဗေဒါရောင်တို့ရှိသည်။မေမြို့ပန်းသည် မျိုးစေ့ကို အရင်ပျိုးထားပြီးနောက် ပျိုးပင် သက်တမ်း(၃၀)ရက်အကြာတွင် စတင်စိုက်ပျိုးရပါသည်။ မေမြို့ပန်းအမျိုးအစားများတွင်မျိုးအား ဖြင့်အက်စတာ(အနီ)၊အက်စတာ(အဖြူ)၊ မော့စ်၊ရိုးစိမ်းကျောက်နီ၊ကြက်လည်ဆံ၊ ပင်ကား၊ပင်ထောင်၊ ပွမ်ပွမ်စသည်ဖြင့် အပွင့်အရောင်ပန်းပွင့်ပုံကိုမူတည်၍ မြန်မာအခေါ်အဝေါ်များရှိသည်။ အများအားဖြင့် တိုင်းဒေသကြီး/ပြည်နယ်အနှံ့အပြားတွင် အက်စတာမျိုးကိုသာစိုက်ပျိုးကြသည်။ မေမြို့ပန်း သည်စနစ်တကျစိုက်ပျိုးပါက တောင်သူများနှစ်စဉ်ဝင်ငွေရရှိနိုင်သည့်အပြင် ခြံလုပ်သားများ အတွက်လည်း အလုပ်အကိုင် အခွင့်အလမ်းများကို ဖော်ဆောင်ပေးနိုင်သည်။
ပြင်ဦးလွင်မြို့ရှိ အက်စတာမေမြို့ပန်းများကိုသီတင်းကျွတ်လ၌စတင်စိုက်ပျိုးပြီး ပြာသိုလ တွင်အပင် လိုက်နှုတ်စည်း၍စတင်ရောင်းချကြပါသည်။မေမြို့ပန်းသည် တစ်ဧကလျှင်အပင်ရေ (၁၇၀၀၀)ခန့်စိုက်ပျိုးရပြီး၊ (၁)ဧကစိုက်ပျိုးစရိတ်မှာသွင်းအားစုနှင့်လုပ်အားခအပါအဝင် ကျပ် သိန်း၅၀ခန့်ကုန်ကျကြောင်း၊မေမြို့ပန်းသည် စိုက်ပျိုးပြီးနောက်(၃)လအကြာတွင် စတင်နှုတ်ယူ ခူးဆွတ်နိုင်ကြောင်း၊ နေ့စဉ်နှုတ်ယူခူးဆွတ်ရသောအပင်များဖြစ်၍ တစ်ရက်လျှင်အစည်းရေ (၁၀၀/၂၀၀) ပုံမှန်နှုတ်ယူခူးဆွတ်လျက်ရှိကြောင်း၊ ပြင်ဦးလွင်မှထွက်ရှိသောမေမြို့ပန်းများအား အောင်ချမ်းသာကျေးရွာ၊ အနီးစခန်းကျေးရွာ၊ ကျောက်မီးကျေးရွာ၊ လက်ကောင်းကျေးရွာများ နှင့် မန္တလေးပန်းတန်းရှိကုန်သည်ပွဲစားများက စိုက်ခင်းသို့ လက်ကားဈေး လက်ဆုတ်စည်းအကြီး တစ်စည်းလျှင် ကျပ်(၁၂၀၀၀/-)ဝန်းကျင်ခန့်ဖြင့်လာရောက်ဝယ်ယူလျက်ရှိကြောင်းသိရပါသည်။ ဈေးနှုန်းအားဖြင့်နှိုင်းယှဉ်ပါက မေမြို့ပန်းပေါ်ကာစအချိန်တွင် ကျပ်(၁၂၀၀၀/-)ခန့်ရှိသော်လည်း ပေါ်များသည့်အချိန်တွင်ဈေးမှာအချိန်ရာသီပေါ်မူတည်၍ (၁၁၀၀၀/-) ဝန်းကျင်ခန့်အနည်းငယ် ကျဆင်းလျက်ရှိပါသည်။
ယခုအခါမေမြို့ပန်းကို ဘုရားပန်း၊အလှူ၊မင်္ဂလာဆောင်ဧည့်ခံပွဲများတွင် အမြတ်တနိုးထားအလှဆင်မှု များပြားလာကြသောကြောင့် ဈေးကွက်ဝင်ပန်းတစ်မျိုး ဖြစ်လာသည့်အပြင် ဈေးကွက်ဝယ်လိုအားကောင်းလာပြီး အကျိုးအမြတ်များစွာ ရရှိသည့်အတွက် ပြင်ဦးလွင်မြို့တွင်သာမက တိုင်းဒေသကြီး/ ပြည်နယ်အနှံ့အပြားတွင် မေမြို့ပန်းများကို တစ်နိုင်တစ်ပိုင်ဖြင့် စိုက်ပျိုးလျက်ရှိကြောင်းသိရသည်။
DOCA(မန္တလေး)