မကွေးတိုင်းဒေသကြီး၊ ပခုက္ကူခရိုင်၊ ဆိပ်ဖြူကြက်သွန်နီဈေးကွက်၌ ၂၀၂၄ခုနှစ်၊ ဒီဇင်ဘာလ (ဒုတိယပတ်)မှစတွင် ကြက်သွန်နီဈေးနှုန်းကျဆင်းပြီး အရောင်းအဝယ်ဖြစ်လျက်ရှိပါသည်။ ကြက်သွန်နီ ဈေးကွက်သို့ နွေကြက်သွန်နီ အဟောင်းများအပြင် မိုးကြက်သွန်နီအသစ်များလည်း စတင်ဝင်ရောက် ကြောင်း၊ ဆိပ်ဖြူမြို့နယ်အတွင်းရှိ ကြက်သွန်နီစိုက်ပျိုးထွက်ရှိရာ ဒေသများနှင့် အခြားမြို့နယ်များ ဖြစ်သည့် ပခုက္ကူ၊ ချောက်၊ ဆင်ဖြူကျွန်း၊ စလင်း၊ တညောင်မြို့နယ်ဒေသထွက် ကြက်သွန်နီများလည်း ဝင်ရောက်အရောင်းအဝယ်ဖြစ်လျက်ရှိကြောင်း၊ ယခုအချိန်တွင် ကြက်သွန်နီအဟောင်းများ ကုန်ဆုံး ရာသီချိန်ဖြစ်၍ ဝင်ရောက်မှုနည်းကြောင်း၊ တစ်ရက်လျှင် ကြက်သွန်နီ ပျမ်းမျှကုန်ချိန်ပိဿာ (၁)သောင်း ခွဲခန့် တစ်ပတ်အတွင်း ပိဿာချိန်(၁)သိန်းခန့် ဈေးကွက်သို့ ဝင်ရောက်အရောင်းအဝယ်ဖြစ်ကြောင်း သိရှိ ရသည်။
ဈေးနှုန်းအနေဖြင့် ၂၀၂၄ခုနှစ်၊ ဒီဇင်ဘာလ(ဒုတိယပတ်)တွင် နွေကြက်သွန်နီအဟောင်းမှာ ဈေးကျ ဆင်းပြီး ရောင်းအဝယ်ဖြစ်လျက်ရှိကြောင်း၊ ကြက်သွန်နီအရည်အသွေးနှင့် အရွယ်အစားလိုက်၍ တောဈေး(ဂျွန်) တစ်ပိဿာလျှင် ကျပ်(၂၃၀၀-၁၆၀၀)ဈေးအသီးသီးဖြင့် အရောင်းအဝယ်ဖြစ်ကြောင်း၊ ပွဲရုံများမှ ပြန်လည်သန့်စင်ပြီး ဥအကြီးအရွယ်အစား၊ အရောင်အဆင်းလိုက်၍ ကြက်သွန်နီ တစ်ပိဿာ လျှင် ကျပ်(၃၅၀၀-၂၅၀၀) ဈေးဖြင့် အရောင်းအဝယ်ဖြစ်ကြောင်း၊ မိုးကြက်သွန်နီအသစ် တစ်ပိဿာ လျှင် တောဈေး(ဂျွန်) ကျပ်(၂၈၀၀-၂၂၀၀)ဈေးဖြင့် အရောင်းအဝယ်ဖြစ်လျက်ရှိပြီး ပွဲရုံမှ ပြန်လည် ရောင်းချ ဈေးတစ်ပိဿာလျှင် ကျပ်(၃၅၀၀-၂၈၀၀)ဈေးဖြင့် အရောင်းအဝယ်ဖြစ်လျက်ရှိကြောင်း၊ (ပထမပတ်)နှင့် နှိုင်းယှဉ်ပါက နွေကြက်သွန်နီအဟောင်းတစ်ပိဿာလျှင် ကျပ်(၄၀၀)ခန့် ကျဆင်းအရောင်းအဝယ် ဖြစ်ကြောင်း၊ မိုးကြက်သွန်နီအသစ်များ ဈေးကွက်သို့ဝင်ရောက်မှုနည်းသေးကြောင်း၊ ဇန်နဝါရီလအတွင်း စိုက်တောင်သူများမှ မိုးကြက်သွန်နီအသစ်များ လှိုင်လှိုင်တူးဖော်မည်ဖြစ်၍ ဈေးကွက်သို့ ဝင်ရောက်မှု များလာမည်ဖြစ်ကြောင်း သိရှိရသည်။
ဈေးကွက်အနေဖြင့် ဆိပ်ဖြူဒေသထွက် ကြက်သွန်နီများကို ရန်ကုန်ဘုရင့်နောင်ပွဲရုံ၊ ပြည်၊ ပုသိမ်မြို့များသို့ တင်ပို့လျက်ရှိပြီး ပြည်ပပို့ကုန်အဖြစ် မြဝတီ၊ မော်လမြိုင်မြို့များမှတစ်ဆင့် ထိုင်း၊ ဗီယက်နမ်၊ ဘင်္ဂလားဒေ့ရှ်နိုင်ငံများသို့ တင်ပို့လျက်ရှိကြောင်း၊ ဒီဇင်ဘာလ(ဒုတိယပတ်)တွင် ကြက်သွန်နီ ကုန်ချိန်ပိဿာ(၁)သိန်း၊ တန်ချိန်အားဖြင့် (၁၆၃)တန်ခန့် ကုန်စည်စီးဆင်းခဲ့ကြောင်း ဈေးကွက်မှ သိရှိရပါ သည်။
DOCA(မကွေး)