ပဲခူးတိုင်းဒေသကြီး၊ နတ်တလင်းမြို့နယ်တွင် ကျွဲကော်သီး သီးနှံကို ဧကလိုက်သီးခြားစိုက်ပျိုးခြင်းမရှိဘဲ နေအိမ်ခြံဝန်းများအတွင်း တစ်ပင်မှ သုံးပင်ခန့် တစ်ပိုင်တစ်ပိုင် စိုက်ပျိုးကြပါသည်။ နတ်တလင်းမြို့နယ်တွင် ကျွဲကော်သီးများ အောက်တိုဘာလမှ စတင်ထွက်ရှိပြီး ယခု ဒီဇင်ဘာလ တတိယပတ်တွင် မြို့နယ်ဈေးကွက်အတွင်း အလုံးအရွယ်အစား၊ အရည်အသွေးနှင့် အရသာပေါ်မှုတည်၍ ကျွဲကော်သီးတစ်လုံးလျှင် (၁၅၀၀ ကျပ်မှ ၃၅၀၀ ကျပ်)အထိပေါက်ဈေးနှုန်း ရှိကြောင်းသိရပါသည်။
ကျွဲကော်သီးတွင် အဟာရဓာတ်များစွာပါဝင်သည့်အတွက်လူတို့၏ ကျန်းမာရေးကို များစွာအထောက်အကူပြုပေးသော်လည်း ဗီတာမင်စီ ကြွယ်ဝစွာပါဝင်သည့်အတွက် အလွန်အကျွံစားသုံးမိပါက ကျောက်ကပ်ကျောက်တည်ခြင်းနှင့် ဝမ်းချုပ်နိုင်ခြင်းစသည့် ဘေးထွက်ဆိုးကျိုးများ ဖြစ်စေနိုင်ကြောင်းသိရပါသည်။
ကျွဲကော်ပင်သည် နှစ်ရှည်ပင်အမျိုးအစားဖြစ်ပြီး အပင်ကိုသေချာစွာ ပြုစုပေးနိုင်ပါက အပင်သက်တမ်း နှစ်(၃၀) အထိကြာရှည်ကြောင်းသိရပါသည်။ ကျွဲကော်ပင်ကို အစေ့မှတိုက်ရိုက် စိုက်ပျိုးနိုင်သလို မြေထုပ်စီး ကိုင်းကူးပြီးလည်းစိုက်ပျိုးနိုင်ပါသည်။ ကိုင်းကူးစိုက်ပျိုးခြင်းသည် အပင်ဖြစ်ထွန်းမှုမြန်ဆန်ပြီး အစေ့မှတိုက်ရိုက်စိုက်ပျိုးခြင်းထက် အသီးသီးမှုလည်း မြန်ဆန်ကြောင်း သိရှိရပါသည်။
DOCA(ပဲခူး)