မြန်မာနိုင်ငံမှ ပြည်ပနိုင်ငံများသို့ လယ်ယာထွက်ကုန်သီးနှံများ နှစ်စဥ်တင်ပို့မှုရှိရာ ၂၀၂၂ ခုနှစ် ဧပြီလမှစတင်၍ မြန်မာနိုင်ငံမှ တရုတ်ပြည်သူ့သမ္မတနိုင်ငံ (GACC) တို့ လက်မှတ်ရေးထိုးထားသည့် SPS Protocol အရ တရုတ်နိုင်ငံသို့ ပြောင်းဆံတင်ပို့ရန် အဆိုပြုလွှာများ ခေါ်ယူခဲ့ရာ မြန်မာနိုင်ငံ ပဲမျိုးစုံနှင့် နှမ်းကုန်သည်များ အသင်းမှ ကုမ္ပဏီ (၁၁၁) ခုနှင့် ပြောင်းလုပ်ငန်းအသင်းမှ ကုမ္ပဏီ (၃၀) ခု စုစုပေါင်း ကုမ္ပဏီ (၁၄၁) ခုအား စစ်ဆေးပေးနိုင်ရန် အဆိုပြုလွှာ တင်သွင်းလာပါသည်။
ပြည်ထောင်စုနယ်မြေ၊ နေပြည်တော်၊ စားသုံးသူရေးရာဦးစီးဌာန၊ နေပြည်တော်ဦးစီးမှူးနှင့်အဖွဲ့မှ SPS Protocol အရ တရုတ်နိုင်ငံသို့ ပြောင်းဆံတင်ပို့နိုင်ရေး စနစ်တကျ ဆောင်ရွက်နိုင်ရန် ၂၉-၄-၂၀၂၂ ရက်နေ့တွင် Myanmar Agribusiness Public Co,Ltd တည်ရှိရာ ပျဥ်းမနားမြို့နယ်၊ မယ်ဇလီကုန်းကျေးရွာရှိ MAPCO ဆန်စက်ဝင်းအတွင်း ပြောင်းဆံထားရှိမည့် သိုလှောင်ရုံ၏ အကျယ်အဝန်း၊ လေဝင်လေထွက်နှင့် သန့်ရှင်းမှု ရှိ/မရှိ၊ ငှက်တား ဇကာများထားရှိမှု ရှိ/မရှိ၊ ဖျက်ပိုးနှင့် ကြွက်နှိမ်နှင်းမှု ရှိ/မရှိ၊ ကြမ်းခင်း၊ အမိုး၊ အကာ၊ ပြတင်းပေါက် ထားရှိမှု၊ ကုန်ကြမ်း ထားရှိမှု သိုလှောင်ရုံနှင့် ကုန်ချောထားရှိမည့် သိုလှောင်ရုံ အနေအထား၊ စားသောက်ကုန် အန္တရာယ်ကင်းစင်ရေး စနစ်တကျဆောင်ရွက်မှု ရှိ/မရှိ၊ စားသောက်ကုန်အန္တရာယ်ကင်းစင်ရေး အသိအမှတ်ပြု လက်မှတ်ရရှိထားမှု၊ ပြောင်းဆံလှန်းကွင်းနှင့် ပြောင်းဆံအခြောက်ခံစက်ထားရှိမှု၊ အဝတ်လဲခန်းနှင့် သန့်စင်ခန်းထားရှိမှု အခြေအနေများအား ကွင်းဆင်းစစ်ဆေး၍ လိုအပ်သည်များမှာကြား ဆောင်ရွက်ခဲ့ပါသည်။
နေပြည်တော်၊ လယ်ဝေးမြို့နယ်၊ အေလာမြို့ရှိ Top Partner Co,Ltd ကုမ္ပဏီသို့ ၂-၅-၂၀၂၂ ရက်နေ့တွင်လည်းကောင်း၊ ၁၂-၅-၂၀၂၂ ရက်နေ့တွင် နေပြည်တော်၊ ပုပ္ဗသီရိမြို့နယ်ရှိ Bailongma Co,Ltd များသို့ ပြောင်းဆံထားရှိနိုင်မှု အခြေအနေများနှင့် သိုလှောင်ရုံ အကျယ်အဝန်း လုံလောက်မှု ရှိ/မရှိ၊ SPS Protocol ပါသတ်မှတ်ချက်များနှင့် ကိုက်ညီမှု ရှိ/မရှိ သွားရောက်စစ်ဆေးပြီး လိုအပ်သည်များအား အချိန်မီဆောင်ရွက်နိုင်ရေး အလေးထားဆောင်ရွက်သွားရန် တိုက်တွန်းမှာကြားခဲ့ပါသည်။
DOCA(ပြည်ထောင်စုနယ်မြေ)