မကွေးတိုင်းဒေသကြီး၊ ပခုက္ကူခရိုင်၊ ပခုက္ကူမြို့တွင် ဥစားကြက်မွေးမြူရေးလုပ်ငန်း လုပ်ကိုင်မှု နည်းပါးခြင်းကြောင့် ဒေသတွင်း စားသုံးမှု မလုံလောက်၍ မန္တလေးတိုင်းဒေသကြီး၊ ပြင်ဦးလွင်မြို့နှင့် ရှမ်းပြည်နယ် တောင်ကြီးမြို့တို့မှ ဝယ်ယူ၍ အရောင်းအဝယ်ဖြစ်လျက်ရှိကြောင်း သိရသည်။
ဈေးနှုန်းများအနေဖြင့်၂၀၂၅ခုနှစ်၊ ဇန်နဝါရီလ(ဒုတိယပတ်)တွင် ကြက်ဥဈေးနှုန်း ဆက်လက် မြင့်တက်ပြီး အရောင်းအဝယ်ဖြစ်လျက်ရှိပြီး ကြက်ဥအကြီးအသေး မူတည်၍ ကြက်ဥ(၁၀)လျှင် ကျပ် (၅၂၀၀)ဈေးရှိပြီး တစ်ပိဿာလျှင် ကျပ်(၁၀၄၀၀)၊ ယခင်ဒီဇင်ဘာ(ဒုတိယ)ပတ်နှင့် ဈေးနှုန်း နှိုင်းယှဉ်ပါက တစ်ပိဿာလျှင် ကျပ်(၉၀၀)ခန့် ဈေးတက်ပြီး အရောင်းအဝယ်ဖြစ်လျက်ရှိကြောင်း၊ ဈေးနှုန်း မြင့်တက်ရခြင်းမှာ ကြက်မွေးမြူရေးလုပ်ငန်းရှင်များအနေဖြင့် ကြက်စာဈေးနှုန်းကြီးမြင့်ခြင်းနှင့် သယ်ယူစရိတ်ကြီးမြင့်ခြင်းတို့ကြောင့် ဈေးနှုန်းမြင့်တက်ရခြင်းဖြစ်ကြောင်း၊ ဈေးနှုန်းမြင့်တက်သော် လည်း ကြက်ဥသည် ကျန်းမာရေးနှင့် ညီညွတ်ပြီး အာဟာရပြည့်ဝသော အစားအစာတစ်မျိုးဖြစ်၍ စားသုံးပြည်သူများအနေဖြင့် လူတန်းစားမရွေး ဝယ်ယူစားသုံးနိုင်ပြီး အလွယ်တကူစားသုံးရသော အစားအစာတစ်မျိုးဖြစ်၍ အရောင်းအဝယ်သွက်ကြောင်း ကြက်ဥရောင်းဝယ်ရေး လုပ်ငန်းရှင်ထံမှ သိရှိ ရပါသည်။
DOCA(မကွေး)