မကွေးတိုင်းဒေသကြီး၊ ဆိပ်ဖြူမြို့နယ်အတွင်းရှိ ဒေသခံပြည်သူများသည် ကြက်သွန်နီသီးနှံကို ဒေသစီးပွားဖြစ် နှစ်စဉ်မပြတ်စိုက်ဧက အများဆုံးစိုက်ပျိုးလျက်ရှိသည်။ ဆိပ်ဖြူမြို့ ကြက်သွန်နီ ဈေးကွက်သို့ ဒေသတွင်း ကြက်သွန်နီစိုက်ပျိုးထွက်ရှိသော ကျေးရွာများအပြင် အခြားမြို့နယ်များဖြစ်သော ပွင့်ဖြူ၊ စလင်း၊ ချောက်၊ ပခုက္ကူ ဒေသထွက် ကြက်သွန်နီများလည်း ဝင်ရောက် အရောင်းအဝယ် ဖြစ်လျက်ရှိသည်။ ကြက်သွန်နီဈေးကွက်သို့ ဒီဇင်ဘာလဆန်းမှစ၍ မိုးကြက်သွန်နီ(အသစ်)များလည်း ယခုဇန်နဝါရီ(စတုတ္ထပတ်)ထိ အရောင်းအဝယ်ဖြစ်လျက်ရှိသည်။ တစ်ရက်လျှင် ကုန်ချိန် ပိဿာ (၅)သောင်းခွဲ မှ (၇)သောင်း၊ တစ်လအတွင်း ကုန်ချိန်ပိဿာ(၁၃)သိန်းခန့် ဝင်ရောက်ခဲ့ကြောင်း ဈေးကွက်မှ သိရှိရသည်။
ဈေးနှုန်းအနေဖြင့် ကြက်သွန်နီအရွယ်အစားနှင့်အရည်အသွေး လိုက်၍ ၂၀၂၅ခုနှစ်၊ ဇန်နဝါရီလ (ပထမပတ်) တွင် မိုးကြက်သွန်နီ(အသစ်)တစ်ပိဿာလျှင် ကျပ်(၃၁၀၀-၂၀၀၀)၊ (ဒုတိယပတ်)တွင် ကျပ် (၂၈၀၀-၁၄၀၀)၊ (တတိယပတ်)တွင် ကျပ်(၂၇၀၀-၁၄၀၀)၊ (စတုတ္ထပတ်)တွင် ကျပ်(၂၅၀၀-၁၃၀၀) ဈေးဖြင့် အရောင်းအဝယ်ဖြစ်ခဲ့ပြီး ဇန်နဝါရီ (ပထမပတ်)နှင့် (စတုတ္ထပတ်) ဈေးနှုန်းနှိုင်းယှဉ်ပါက တစ်လအတွင်း ကြက်သွန်နီ တစ်ပိဿာလျှင် ကျပ်(၆၀၀)ခန့် ဈေးကျပြီး အရောင်းအဝယ်ဖြစ်ကြောင်း၊ ဈေးကွက်သို့ ကုန်ချိန်ဝင်ရောက်မှုများခြင်းနှင့် ပြည်ပနိုင်ငံများမှ ဝယ်ယူမှုနည်း၍ ဈေးနှုန်း ကျဆင်း ကြောင်း သိရှိရသည်။
ကုန်စည်စီးဆင်းမှုအနေဖြင့် ဇန်နဝါရီလအတွင်း ရန်ကုန်ဘုရင့်နောင်ပွဲရုံသို့ ကုန်ချိန်ပိဿာ (၉)သိန်း၊ ပြည်မြို့သို့ (၅)သောင်း၊ ပုသိမ်မြို့သို့ (၅)သောင်း၊ မော်လမြိုင်မြို့သို့ (၁)သိန်း၊ မြဝတီမြို့သို့ (၂)သိန်း၊ စုစုပေါင်းကြက်သွန်နီပိဿာချိန် (၁၃)သိန်းခန့် အိတ်ရေ ပျမ်းမျှ(၄)သောင်းခန့် တန်ချိန်အားဖြင့် (၂၁၂၃)တန်ခန့် ကုန်စည်စီးဆင်းခဲ့ကြောင်း၊ ရန်ကုန်ဘုရင့်နောင်ပွဲရုံနှင့် မြန်မာနိုင်ငံအောက်ပိုင်းဒေသများသို့ ကုန်ချိန်အများဆုံးတင်ပို့ပြီး ပြည်ပပို့ကုန်အဖြစ် မြဝတီမြို့မှတစ်ဆင့် ထိုင်း၊ ဗီယက်နမ်နိုင်ငံများသို့ တင်ပို့ကြောင်း ဈေးကွက်မှသိရှိရသည်။
DOCA(မကွေး)