မကွေးတိုင်းဒေသကြီး၊ ပခုက္ကူခရိုင်၊ ပခုက္ကူဈေးကွက်သို့ ဆီထွက်သီးနှံ မြေပဲ၊ နှမ်းနှင့်ပဲမျိုးစုံ နေ့စဉ်ဝင်ရောက်အရောင်းအဝယ်ဖြစ်လျက်ရှိပြီး ပဲပုပ်သီးနှံများလည်း ၂၀၂၅ ခုနှစ်၊ ဇန်နဝါရီလ (တတိယပတ်)မှစ၍ ဈေးကွက်သို့ ပဲပုပ်သီးနှံ(အသစ်)များဝင်ရောက် အရောင်းအဝယ်ဖြစ်လျက်ရှိသည်။ စိုက်ပျိုးမှုအနေဖြင့် ပဲပုပ်သီးနှံကို မကွေးတိုင်းဒေသကြီး၊ ပခုက္ကူခရိုင်အတွင်းရှိ ပခုက္ကူကျွန်းဒေသများ ဖြစ်သည့် မြစ်ခြေ၊ ကမ္မ၊ ကျွန်းရွာများနှင့် နီးစပ်ရာကျေးရွာများအပြင် မြိုင်၊ ရေစကြို၊ ပေါက်၊ ဆိပ်ဖြူမြို့နယ်နှင့် ယောနယ်ဒေသများတွင် အများဆုံးစိုက်ပျိုးပြီး စိုက်ဧက(၂၅၀၀)ဝန်းကျင်ခန့် စိုက်ပျိုးကြောင်း၊ ဇန်နဝါရီလ(တတိယပတ်)အစောပိုင်းမှစ၍ ဈေးကွက်သို့ ပခုက္ကူမြို့နယ် မြစ်ခြေ၊ ကမ္မဒေသရှိ ကျွန်းရွာများနှင့် ထီးလင်း၊ ဂန့်ဂေါမြို့ ယောနယ်ဒေသများမှ ထွက်ရှိသော ပဲပုပ်သီးနှံ (အသစ်)များ ဈေးကွက်သို့ စတင်ဝင်ရောက်ကြောင်း၊ ဈေးနှုန်းအနေဖြင့် တစ်တင်းလျှင် ကျပ်(၁၀၀၀၀၀) ဈေးဖြင့် အရောင်းအဝယ်ဖြစ်ကြောင်း၊ ယခုဇန်နဝါရီ(စတုတ္ထပတ်)တွင် ပဲပုပ်တစ်တင်းလျှင် ကျပ် (၉၈၀၀၀) ဈေးဖြင့် အရောင်းအဝယ်ဖြစ်ကြောင်း၊ တစ်ပတ်အတွင်း ပဲပုပ်တစ်တင်း ကျပ်(၂၀၀၀)ခန့် ဈေးကျဆင်း၍ အရောင်းအဝယ်ဖြစ်ပြီး ဈေးကွက်သို့ တစ်ရက်လျှင် ပိဿာ(၃၀)ဝင်အိတ် (၁၀၀၀ မှ ၁၅၀၀ ထိ) ဝင်ရောက်ကြောင်း၊ တစ်ပတ်အတွင်း အိတ်ရေ(၃၀၀၀)ခန့် ဝင်ရောက်ကြောင်း၊ ပဲပုပ်သီးနှံ သည် ကျန်းမာရေးနှင့် ညီညွတ်ပြီး ပြည်တွင်းစားသုံးမှုအနေဖြင့် ပဲပုပ်ပြား၊ ပဲပုန်းရည်(အစိမ့်/အချဉ်) အမျိုးမျိုးအပြင် ပဲပိစပ်စားသုံးဆီအဖြစ်လည်း ကြိတ်ခွဲထုတ်လုပ်ကြောင်း၊ ပဲပုပ်သီးနှံမှာ အရသာ ကောင်းပြီး စားသုံးမှုများပြားသော သီးနှံတစ်မျိုးဖြစ်၍ ပြည်တွင်းသုံးစွဲမှုများသည့်အပြင် ပြည်ပနိုင်ငံ သို့လည်း တင်ပို့လျက်ရှိ၍ ဈေးကွက်သို့ ကုန်ချိန်ဝင်သလောက် အရောင်းအဝယ်ဖြစ်ကြောင်း၊ ယခု အချိန်တွင် ပခုက္ကူပွဲရုံဈေးကွက်သို့ ဖေဖော်ဝါရီလဆန်းပိုင်းတွင် ပဲပုပ်သီးနှံများ ဈေးကွက်သို့ လှိုင်လှိုင် ဝင်ရောက်လာမည်ဖြစ်ကြောင်း သိရှိရသည်။
ဈေးကွက်အနေဖြင့် ပခုက္ကူဈေးကွက်သို့ ဝင်ရောက်လာသည့် ပဲပုပ်သီးနှံများကို ပခုက္ကူပွဲရုံ များမှတစ်ဆင့် ဒေသတွင်းဖြန့်ဖြူးမှုအပြင် ရန်ကုန်၊ မန္တလေးဈေးကွက်သို့ တင်ပို့ပြီး ထိုမှတစ်ဆင့် ပြည်ပတရုတ်နိုင်ငံသို့ တင်ပို့လျက်ရှိကြောင်း သီးနှံဈေးကွက်မှ သိရှိရသည်။
DOCA (မကွေး)