မကွေးတိုင်းဒေသကြီး၊ ပခုက္ကူခရိုင်၊ ပခုက္ကူဈေးကွက်သို့ ၂၀၂၄ခုနှစ်၊ ဒီဇင်ဘာလ(ပထမပတ်) မှစတင်၍ ပဲစဉ်းငုံနီ(အသစ်)များဝင်ရောက်ခဲ့ပြီး (၂၀)ပိဿာဝင်တစ်တင်းလျှင် သီးနှံပေါ်စ ကျပ် (၁၂၆၅၀၀-၁၂၂၀၀၀)ဈေးဖြင့် အရောင်းအဝယ်ဖြစ်ခဲ့ရာ ယခု၂၀၂၅ခုနှစ်၊ ဖေဖော်ဝါရီလ(ပထမပတ်)ထိ ပဲစဉ်းငုံနီများ ဈေးကွက်သို့ လှိုင်လှိုင်ဝင်ရောက် အရောင်းအဝယ်ဖြစ်လျက်ရှိပါသည်။ ပခုက္ကူ၊ မြိုင်၊ ပေါက်၊ ရေစကြို မြို့နယ် အတွင်းရှိ ကျေးရွာများနှင့် စစ်ကိုင်း၊ မန္တလေးတိုင်းဒေသကြီးအတွင်းရှိ ကျေးရွာများမှ နေ့စဉ်ဝင်ရောက် လျက်ရှိပြီး ဖေဖော်ဝါရီ(ပထမပတ်)တွင် တစ်ရက်လျှင် ပဲစဉ်းငုံနီပိဿာ (၃၀)ဝင်အိတ်(၁၀၀၀-၂၀၀၀)၊ တစ်ပတ်အတွင်း အိတ်ရေ(၁၀၀၀၀)ခန့် ဝင်ရောက် အရောင်းအဝယ်ဖြစ် ကြောင်း သိရသည်။
ဈေးနှုန်းအနေဖြင့် ပဲစဉ်းငုံနီ တစ်တင်းလျှင် ၂၀၂၄ခုနှစ်၊ ဒီဇင်ဘာလတွင် အမြင့်ဈေး ကျပ် (၁၂၆၅၀၀-၁၂၂၀၀၀-၉၈၀၀၀)၊ ၂၀၂၅ခုနှစ်၊ ဇန်နဝါရီလတွင် ကျပ်(၉၄၀၀၀-၉၆၀၀၀-၉၈၀၀၀)ဈေး အသီးသီးဖြင့် အရောင်းအဝယ်ဖြစ်ခဲ့ပြီး ယခုဖေဖော်ဝါရီ(ပထမပတ်)တွင် ပဲစဉ်းငုံနီတစ်တင်းလျှင် ကျပ် (၉၀၀၀၀-၉၁၅၀၀-၉၂၀၀၀)ဈေးဖြင့် အရောင်းအဝယ်ဖြစ်လျက်ရှိရာ ယခင်ဇန်နဝါရီ(ပထမပတ်)နှင့် ဈေးနှုန်းနှိုင်းယှဉ်ပါက ကျပ်(၅၀၀၀)ခန့် ဈေးလျော့နည်းခဲ့ကြောင်း၊ ဈေးနှုန်းအနည်းငယ်အေးသော်လည်း ကုန်ချိန်ဝင်ရောက်မှုများပြီး ဝင်သမျှအရောင်းအဝယ်ဖြစ်နေကြောင်း၊ ပခုက္ကူဈေးကွက်သို့ ဝင်ရောက် လာသည့် ပဲစဉ်းငုံနီများကို ရန်ကုန်၊ မန္တလေးဈေးကွက်သို့ တင်ပို့ပြီး ထိုမှတစ်ဆင့် ပြည်ပအိန္ဒိယနိုင်ငံသို့ တင်ပို့လျက်ရှိကြောင်း၊ ပဲစဉ်းငုံသီးနှံသည် ပြည်ပပို့ကုန် ပဲတစ်မျိုးဖြစ်၍ ဈေးကွက် ဝယ်လိုအားပေါ် မူတည်ပြီး နေ့စဉ်နှင့်အမျှ ဈေးနှုန်းပြောင်းလဲမှုရှိကြောင်း ဈေးကွက်မှ သိရှိရပါသည်။
DOCA(မကွေး)