စစ်ကိုင်းတိုင်းဒေသကြီး၊ ကန့်ဘလူခရိုင်၊ ကန့်ဘလူမြို့တွင် ဒေသထွက်လက်လုပ်ချဉ်အမျိုးမျိုးကို ရောင်းချသည့်အနက်မှ ရာသီစာဖြစ်သည့် မုန့်ညှင်းချဉ်ကိုလည်း ရောင်းချလျက်ရှိကြောင်း သိရသည်။
ကန့်ဘလူမြို့မစည်ပင်သာယာဈေးမှာ အချဉ်မျိုးစုံဖြစ်သည့် ပဲတီချဉ်၊ မုန့်ညှင်းချဉ်၊ သရက်ချဉ်၊ မုံလာချဉ်၊ သရက်သီးကုလာတည်ချဉ်၊ နှမ်းပတ်ချဉ်နှင့် သံပုရာချဉ် တို့ကို လုပ်ကိုင် ရောင်းချလျက်ရှိရာ မုန့်ညှင်းချဉ်သည်လည်းတစ်ခုအပါအဝင်ဖြစ်ပါသည်။ မုန့်ညှင်းချဉ်ကိုပြုလုပ်သည့် မုန့်ညှင်းရွက်သည်ရှားပါးသော ရာသီဖြစ်သည့်အတွက် ကုန်ကြမ်းဖြစ်သည့် မုန့်ညှင်းရွက်ကို ကန့်ဘလူမြို့ပေါ် ရပ်ကွက် များမှ မြေအောက်ရေတင်စနစ်ဖြင့် စိုက်ပျိုးသည့် စိုက်ပျိုးရေးတောင်သူများထံမှဝယ်ယူရရှိပြီး မုန့်ညှင်းရွက် လက်တွင်းတစ်ဆုပ်စာ တစ်စည်းလျှင်(၂၀၀)ကျပ်၊ (၅/၆)စည်းလျှင် (၁၀၀၀) ကျပ်ဖြင့် ဝယ်ယူရရှိပြီး နေ့စဉ်အလင်မှီအောင် အချဉ်တည်ရပါသည်။
၂၀၂၅ ခုနှစ်၊ ဖေဖော်ဝါရီလ ဒုတိယပတ်တွင် မုန့်ညှင်းချဉ် ဈေးနှုန်းအနေဖြင့် တစ်ပိဿာ လျှင်(၃၀၀၀)ကျပ်၊ (၅၀)ကျပ်သားလျှင်(၁၅၀၀)ကျပ်၊ (၂၅)ကျပ်သားလျှင် (၈၀၀)ကျပ် နှင့် လက်ဖက်ရည် သောက်ပန်ကန် တစ်ပန်ကန်လျှင်(၅၀၀)ကျပ် တို့ဖြင့် ရောင်းချလျက်ရှိကြောင်း မြို့မစည်ပင်သာယာ ဈေးတွင် လက်လုပ်ချဉ်များ ရောင်းချနေသူတစ်ဦးထံမှ သိရှိရပါသည်။
DOCA(စစ်ကိုင်း)