မန္တလေးတိုင်းဒေသကြီး ၊ရမည်းသင်းခရိုင်တွင် လယ်ယာထွက်ကုန်သီးနှံမျိုးစုံအပြင် ဟင်းသီးဟင်ရွက်သစ်သီးဝလံများစိုက်ပျိုးကြရာ ရွာတန်းကျေးရွာအုပ်စု၊ သဲကျွန်းအုပ်စု၊ အလယ်ကုန်း အုပ်စု၊ လက်ပတောကျေးရွာအုပ်စု၊ရွှေဒါးကျေးရွာအုပ်စုတို့တွင် စပျစ်ကို စီးပွားဖြစ်စိုက်ပျိုးကြကြောင်း သိရှိရပါသည်။
ရမည်းသင်းခရိုင်တွင် စားစပျစ်နှင့်ဝိုင်စပျစ်(၂)မျိုး စိုက်ပျိုးကြပြီး စပျစ်မျိုးပေါင်းများစွာရှိ သည့်အနက် အီတလီ No (3)၊ BQ ၊ BK ၊ RG စပျစ်မျိုးများ၊ ရိုးရိုးအချွန်၊ ပန်းရောင်အချွန်မျိုးနှင့် ဂျပန်(စိမ်း)တို့ကို စိုက်ပျိုးကြကြောင်း၊ စိုက်ပျိုးရာတွင် ကိုင်းဖြတ်၍ ပျိုးထောင်စနစ်ကိုအသုံးပြု၍ စင်တင်စနစ်ဖြင့်စိုက်ပျိုးကြကြောင်း၊ စပျစ်ပင်သည် စတင်စိုက်ပျိုးပြီး သက်တမ်း(၂၀)နှစ်ထိခူး ဆွတ် နိုင်သည့် နှစ်ရှည်သီးပင်တစ်မျိုးဖြစ်ကြောင်း၊ မိုးရာသီတွင်သီးသောစပျစ်မှာ မေလတွင် အဖူးအပွင့်များ စပွင့်ပြီး ဆောင်းစပျစ်မှာအောက်တိုဘာလဆန်းပိုင်းတွင် အဖူးအပွင့်များပွင့်၍ အသီးတင်ပြီး ရက်ပေါင်း (၁၁၅)ရက်ကျော်တွင် စတင်ခူးဆွတ်ရကြောင်း၊ စပျစ်စိုက်ပျိုးရာတွင် ကုန်ကျစရိတ်အနေဖြင့် ပျိုးကိုင်း ကျင်းတူး၊ရေတင်၊စင်ဆောက်၊ သွင်းအားစု၊လုပ်သားခအပါအဝင် စုစုပေါင်း ကျပ်သိန်း(၂၀၀)ခန့် ကုန်ကျ မှုရှိကြောင်း၊ တဧကအထွက်နှုန်းမှ ပိဿာ(၆၀၀၀မှ ၈၀၀၀)ကြားထွက်ရှိကြောင်း၊ ဈေးကွက်အနေဖြင့် ခြံအရောက်လာရောက်ဝယ်ယူသည့်ပွဲစားများအားရောင်းချခြင်း၊အချို့စပျစ်ခြံများမှာ ရန်ကုန်၊မန္တလေး၊ မော်လမြိုင်၊တောင်ကြီး၊ မကွေး ၊ပဲခူး၊ နေပြည်တော်မြို့များသို့ တိုက်ရိုက်ချိတ်ဆက်ရောင်းချလျက်ရှိ ကြောင်း၊ ယခုဈေးကွက်တွင် စပျစ်စပေါ်ချိန်၌ RG စပျစ်တစ်ပိဿာလျှင် (၁၀၀၀၀)ကျပ်အထိရရှိသဖြင့် အကျိုး အမြတ်များရရှိကြောင်းစပျစ်စိုက်တောင်သူတစ်ဦီးထံမှသိရပါသည်။
DOCA(မန္တလေး)