ဧရာဝတီတိုင်းဒေသကြီးရှိ ဟင်္သာတမြို့သည် အောက်မြန်နိုင်ငံတွင် အရောင်းအဝယ် စည်ကားဖွံ့ဖြိုးသော မြို့ကြီးတစ်မြို့ဖြစ်သည့်အပြင် ရေလမ်းနှင့်ကုန်းလမ်း နှစ်မျိုးလုံး အသုံးပြု နိုင်ခြင်းကြောင့် ကုန်သွယ်မှုစည်ကားဖွံ့ဖြိုးသော မြို့ကလေး တစ်မြို့လည်း ဖြစ်ပါသည်။ ယခင်က ဟင်္သတ မြို့ပြန်လက်ဆောင်အနေဖြင့် ရာသီအလိုက်ထွက်ရှိသည့် ကညွတ်၊ မုန်လာဥ၊ ဒန့်သလွန်၊ ပီလောပီနံ၊ ပဲမြစ်၊ ထန်းမြစ်၊ မရွေး နှင့် ဟင်္သာတမုန့်ဟင်းခါးအနှစ်အထုပ်များမှာ ဟင်္သာတ အပြန်လက်ဆောင်အနေဖြင့် ဝယ်သွားလေ့ရှိကြပါတယ်။ ၂၀၁၂ ခုနှစ် နောက်ပိုင်း မှာတော့ ဟင်္သာတ မြို့ပြန်လက်ဆောင်အနေဖြင့် နာမည်ကြီးလာတာကတော့ “မြတ်ရတနာ” တံဆိပ်ဖြင့် ထုတ်လုပ်သည့် ဘာလချောင်ကြော် ၊ ငံပြာကြော် နှင့် ငါးပိထောင်း တို့မှာ နာမည် ကြီး လာပါသည်။
“မြတ်ရတနာ” ဘာလချောင်ကြော် နှင့် ငံပြာရည်ကြော်လုပ်ငန်းကို ဟင်္သာတမြို့ရှိ ရုံးကြီးရပ်ကွက်၊ ရဲဖြတ်လမ်း၊ အမှတ်(၃၀၅) တွင် ဦးငွေစိုး ဆိုသူမှ စတင်၍ လုပ်သားအင်အား (၇)ဦး ခန့်ဖြင့် လုပ်ကိုင် ဆောင်ရွက်နေသော အသေးစားစက်မှုလုပ်ငန်းလေး တစ်ခုဖြစ်ပါသည်။ အသေးစား စက်မှုလုပ်ငန်း လိုင်စင်အမှတ် အစ-၁၄(၁၉၉၉၉) ရရှိထားသူ ဖြစ်တယ် လို့လဲ သိရှိရပါတယ်။ “မြတ်ရတနာ” မှ မျှင်ငါးပိထောင်း၊ ငါးကတ်ကြေးကိုက်၊ ငါးငပိကြော်၊ ငါးပိ ခါးကျိုးကြော်၊ ငံပြာရည်ကြော်အစပ်၊ ငံပြာရည်ကြော်အစပ်ပေါ့၊ ဘာလချောင်ကြော်၊ ပုစွန် ခြောက်အချိုကြော်၊ ပုစွန်ခြောက်အချိုနှပ်၊ မရမ်းသီးငပိကြော် တို့ကို အဓိကထား ထုတ်လုပ် ပါသည်။ “မြတ်ရတနာ” မှ ထုတ်လုပ်သည့် စားသောက်ကုန်များအနက် ငါးကတ်ကြေးကိုက်မှာ လူကြိုက်အလွန်များပါတယ်။ “မြတ်ရတနာ” စားသောက်ကုန် လုပ်ငန်း၏ ပိုင်ရှင်ဖြစ်သူသည် ဟင်္သာတ မြို့ခံသူ ဖြစ် သည့် အတွက် ဟင်္သာတမှ ထွက်ရှိသောဒေသထွက် လတ်ဆက်သော ကြက်သွန်နီ၊ ကြက် သွန်ဖြူ၊ ငရုပ်သီး၊ ငံပြာရည် နှင့် မျှင်ငါးပိ တို့ကို ကုန်ကြမ်းအဖြစ် အသုံးပြု ထားသကဲ့သို့ အချိုမှုန့် သုံးစွဲထားမှုမရှိသည့်အတွက်လည်း “မြတ်ရတနာ” ၏နာမည် သတင်းမှာ တဖြည်းဖြည်းဖြင့် ကျော်ဇော်လာခဲ့ခြင်း ဖြစ်ပါသည်။ “မြတ်ရတနာ” စားသောက်ကုန် လုပ်ငန်း အား (၂၀၁၂) ခုနှစ်ခန့်မှစတင်၍ ဆောင်ရွက်ခဲ့ပြီး ရင်းနှီးမြုပ်နှံမှုအနေဖြင့် ကျပ်သိန်း(၅၀၀) ရင်းနှီးမြုပ်နှံထားပြီး၊ တစ်နေ့လျှင်ရောင်းအား (၁၅)သိန်းကျော်ရရှိကြောင်း နှင့် တစ်နှစ်လျှင် အမြတ်ငွေ ကျပ်သိန်း(၆၀) ခန့်ရရှိသည့်အထိ အောင်မြင်ပြီး လူကြိုက်များတဲ့ အမှတ်တံဆိပ် တစ်ခုလည်း ဖြစ်ပါတယ်။ စားသောက်ကုန် လုပ်ငန်းအား ဒေသအတွင်း ဖြန့်ဖြူးရောင်းချ သော်လည်း လူကြိုက်များလာသည့်အတွက် တစ်ဆင့်ဝယ်ယူ၍ ရန်ကုန်တွင် ပြန်လည် ရောင်းချ သူ အများအပြားလည်း ရှိနေပြီဟု လေ့လာသိရှိရပါသည်။
DOCA(ဧရာဝတီ)