ပူပြင်းသောနွေကာလနှင့်လိုက်ဖက်သော အစာလည်းဆေး၊ ဆေးလည်းအစာတစ်မျိုးမှာ ကင်ပွန်း ချဉ်ဖြစ်ပါသည်။ ကင်ပွန်းချဉ်ပင်သည် အကိုင်းတွင်ဆူးပါသော နွယ်ယောင်ချုံပင်မျိုးဖြစ်ပါသည်။ ကင်ပွန်း ချဉ်ပင်သည် မြန်မာနိုင်ငံအနှံ့အပြားသဘာဝအလျောက် အလေ့ကျပေါက်သော စားသုံးအပင်မျိုးဖြစ်သော်လည်း ယခုအခါ ပျိုးပင်ပျိုးခြံများတွင် ကင်ပွန်းချဉ်ပျိုးပင်ပေါက်များ ပျိုးထောင်၍ ရောင်းချလျက်ရှိပါသည်။ကင်ပွန်းချဉ် ပင်သည် အသီး၊အရွက်၊အဖူး၊အပွင့်အားလုံးအသုံးဝင်ပါသည်။ ကင်ပွန်းသီးကို ရှေးယခင်ကထဲကယခုအချိန်အထိ တရော်ကင်ပွန်းခေါင်းလျှော်ရည်အဖြစ် ခေါင်းဆေးမင်္ဂလာပြုလုပ်ကြပါသည်။အိမ်သန့်၊ ဝိုင်းသန့်ရန်အတွက်သော် လည်းကောင်း၊ မင်္ဂလာယူကြသော အိမ်တက်၊ကျောင်းတက်စသော အခမ်းအနားများတွင်လည်းကောင်း၊ အန္တရာယ်ကင်းစေရန်အတွက် တရော်ကင်ပွန်းရည်ကို ပတ်ဖြန်းပေးကြပါသည်။ ကင်ပွန်းသီးခြောက်ကိုပြုတ်၍ တရော်ကို ထုထောင်းထည့်ကာ သင်္ကြန်အကြိုနေ့နှင့် နှစ်ဆန်းတစ်ရက်နေ့များတွင် ခေါင်းဆေးမင်္ဂလာပြုလုပ်ရန် အတွက် ကုသိုလ်ကောင်းမှုပြုလုပ်ကြသူများလည်းရှိပါသည်။တိုးတက်လာသည့် ခေတ်ရေစီးကြောင်းနှင့်အညီ တံဆိပ်အမျိုးမျိုး၊ brand အမျိုးမျိုးဖြင့်သုံးစွဲကြသော်လည်း ရှေးမူမပျက်ကျက်သရေမင်္ဂလာအတွက် တရော်ကင်ပွန်းကို သုံးစွဲကြစမြဲဖြစ်ပါသည်။ကင်ပွန်းချဉ်၏ ကင်ပွန်းဖူးဥများကိုလည်း ကင်ပွန်းဖူးချဉ်ရည်ဟင်း၊ ချက်ပြုတ်စားသောက်ကြပါသည်။ကင်ပွန်းချဉ်ရွက်ကိုချဉ်ရည်ဟင်းချက်၍သော်လည်းကောင်း၊ကင်ပွန်းချဉ်ထောင်းမီးအုန်း၍သော်လည်းကောင်း စားသုံးပါက ထမင်းမြိန်၊ခံတွင်းလိုက်သော ဟင်းလျာတစ်မျိုးဖြစ်ပါသည်။ ကင်ပွန်းချဉ်သည် အသဲအတွက် အစွမ်းထက်၊အသုံးဝင်ပါသည်။ကင်ပွန်းချဉ်ရွက်နုကိုကြိတ်ပြီး အသည်းရောင် သည့်နေရာတွင် စိတ်ရှည်လက်ရှည်လိမ်းပေးပါက ရောဂါသက်သာစေပါသည်။ကင်ပွန်းရွက်ဟင်းချိုသည် လူတိုင်းနှင့်သင့်လျော်ပြီး ကိုယ်တွင်းအပူကိုငြိမ်းစေပ ါသည်။ ကျောက်ကပ်ကိုအားပေးသဖြင့် ဆီးရွှင်စေ ပါသည်။နာလန်ထစလူမမာများ ကင်ပွန်းချဉ်ဟင်းနှင့် ငါးခြောက်ဖုတ်စားက ထမင်းမြိန်စေပါသည်။ ကင်ပွန်း ချဉ်သည် နေမကောင်းသူများ ၊ခံတွင်းပျက်သူများအတွက် ဓာတ်စာဆေးဝါးဖြစ်ပါသည်။sme လုပ်ငန်း အနေဖြင့်လည်း ကင်ပွန်းချဉ်မှ scurb၊ခေါင်းလျော်ရည်များ ထုတ်လုပ်ကြပြီး စီးပွားဖြစ်လုပ်ကိုင်ကြကြောင်း သိရှိရသည်။ ဈေးကွက်အတွင်း၌ ကင်ပွန်းချဉ်ရွက်ကို တစ်နှစ်ပတ် လုံးဝယ်ယူရရှိသော်လည်း ရာသီချိန်ပေါများပြီး ဈေးသက်သာကြောင်း သိရှိရသည်။ကင်ပွန်းချဉ်ရွက် တစ်ဆယ်သားလျှင် ၁၀၀၀ ကျပ်၊ တစ်စည်းလျှင် (၅၀၀)ကျပ်ဖြစ်ကြောင်းဈေးကွက်အတွင်းမှ သိရှိရပါသည်။
DOCA(မန္တလေး)