ဆိပ်ဖြူမြို့ ကြက်သွန်နီ အရောင်းအဝယ်ဖြစ်လျက်ရှိသော ကုန်စည်ဒိုင်သို့ ဇွန်လ(ပထမ)ပတ်အတွင်း ကြက်သွန်နီပင်စိုက်အသစ်များ ဆိပ်ဖြူမြို့နယ်ဒေသတွင်း နေရာအနှံ့အပြားမှ နေ့စဉ် ဝင်ရောက်လျက်ရှိပါသည်။ တစ်ရက်လျှင်ပျမ်းမျှ ကြက်သွန်နီ ကုန်ချိန်ပိဿာ (၃)သောင်းခွဲခန့် (၁)ပတ် အတွင်း စုစုပေါင်းပိဿာ (၃)သိန်းခန့် ကုန်စည်ဒိုင်သို့ ဝင်ရောက်လျက်ရှိပြီး မြို့ပေါ်ရှိ ကြက်သွန်ကုန်သည် သိုလှောင်ရုံများတွင် ကြက်သွန်နီပိဿာ ပျမ်းမျှ (၁)ပတ်အတွင်း ကုန်ချိန် (၃)သိန်းခန့် ဝင်ရောက် အရောင်းအဝယ်ဖြစ်ကြောင်း၊ ဇွန်လ(၁)ရက်မှ(၇)ရက်ထိ (၁)ပတ်အတွင်း ကုန်စည်ဒိုင်နှင့် သိုလှောင်ရုံများ အရောင်းအဝယ်ဖြစ်မှု စုစုပေါင်းမှာ ကြက်သွန်နီပိဿာ(၆)သိန်းခန့်ရှိကြောင်း မြို့ပေါ်ရှိ ကုန်စည်ဒိုင်အသင်းဝင် ကုန်သည်ပွဲစား(၁)ဦးထံမှ သိရှိရသည်။
ဈေးနှုန်းဈေးကွက်အနေဖြင့် ဇွန်လပထမ(၁)ပတ်အတွင်း ကြက်သွန်နီ(၁)ပိဿာ ထိပ်စအမြင့် ဆုံးဈေးနှုန်းမှာ (၁၁၂၅)ကျပ်မှ (၇၇၅)ကျပ်ထိ ဈေးနှုန်းဖြစ်ခဲ့ပြီး အနိမ့်စ အမြင့်ဆုံးဈေးနှုန်းမှာ (၈၅၀)ကျပ်မှ (၆၃၅)ကျပ်ထိ ဈေးနှုန်းများဖြင့် အရောင်းအဝယ်ဖြစ်ခဲ့ကြောင်း၊ သီးနှံ အရည်အသွေး များ မတူညီခြင်းကြောင့် ဈေးနှုန်းများ ကွာခြားကြောင်း၊ ယခင်(၁)ပတ် ကြက်သွန်နီ အမြင့်ဆုံး ဈေးနှုန်းမှာ (၇၂၅)ကျပ် ဈေးနှုန်းဖြင့် အရောင်းအဝယ်ဖြစ်ခဲ့ပြီး ယခု(၁)ပတ် အမြင့်ဆုံးဈေးမှာ (၁၁၂၅)ကျပ် ဈေးနှုန်းဖြင့် အရောင်းအဝယ်ဖြစ်၍ ယခင်(၁)ပတ်ထက် (၄၀၀)ကျပ်ခန့် သိသိသာသာ ဈေးနှုန်း မြင့်တက်သွားကြောင်း၊ အနိမ့်စအမြင့်ဆုံး ဈေးနှုန်းမှာ ယခင်(၁)ပတ်က (၅၅၀)ကျပ်၊ ယခု(၁)ပတ် (၈၅၀)ကျပ် ဈေးနှုန်းဖြစ်၍ (၃၀၀)ကျပ်ခန့် မြင့်တက်ခဲ့ကြောင်း၊ ပြည်တွင်းဖြန့်ဖြူးမှု သာမက မြဝတီမြို့ ဝယ်လက်များမှတစ်ဆင့် ပြည်ပထိုင်းနိုင်ငံ၊ ဗီယက်နမ်နိုင်ငံ၊ လာအိုနိုင်ငံများသို့ တင်ပို့ဖြန့်ဖြူးကြောင်း၊ ကြက်သွန်နီဈေးနှုန်းများ ဆက်လက်မြင့်တက်နိုင်မည်ဟု သုံးသပ်ခန့်မှန်းကြောင်း၊ ယခင်(၁)ပတ်ထက် ယခု(၁)ပတ် ကြက်သွန်နီ (၁)ပိဿာလျှင် ထိပ်စ(၄၀၀)ကျပ်၊ အနိမ့်စ (၃၀၀)ကျပ် ဈေးနှုန်းမြင့်တက်ခဲ့ကြောင်း ကုန်သည်မှတစ်ဆင့် သိရှိရသည်။
ဆိပ်ဖြူမြို့တွင် ကြက်သွန်နီအသစ်(၁)ပိဿာလျှင် လက်လီဈေးနှုန်းအနေဖြင့် ထိပ်စ(ရှယ်) ကျပ်(၁၃၀၀)၊ လတ်(ကြီး) ကျပ်(၁၂၀၀)၊ လတ်(သေး) ကျပ်(၁၁၀၀/၁၀၀၀) ဈေးနှုန်းများဖြင့် အရောင်းအဝယ်ဖြစ်လျက်ရှိကြောင်း၊ ကုန်စည်စီးဆင်းမှုအနေဖြင့် ဇွန်လပထမ(၁)ပတ်အတွင်း ဆိပ်ဖြူမြို့မှ ရန်ကုန် ဘုရင့်နောင်ပွဲရုံသို့(၂၀)စီး၊ ပြည်မြို့(၁၀)စီး၊ ဧရာဝတီတိုင်းဒေသကြီး ပုသိမ်မြို့(၁၀)စီး၊ မော်လမြိုင်မြို့(၅)စီး၊ မြဝတီမြို့(၁၅)စီး စုစုပေါင်း(၆၀)စီးခန့် နေ့စဉ်(၆/၁၂)ဘီး မော်တော်ယာဉ် များ ဖြင့် ကြက်သွန်နီ ပျမ်းမျှပိဿာ (၆)သိန်း၊ တန်ချိန်(၃)သောင်းခွဲခန့် ကုန်စည်စီးဆင်းခဲ့ကြောင်း သိရှိရပါသည်။
DOCA(မကွေး)