ကျောက်ဆည်မြို့နယ်အတွင်းရှိ တောင်သူများသည် စပါး၊နှမ်း၊ပဲ၊ပြောင်းစသည့်သီးနှံများကို မိရိုးဖလာအစဉ်အဆက် စိုက်ပျိုးလာခဲ့ကြရာမှ ယခုအခါစားဖိုဆောင်သီးနှံများဖြစ်သည့် ခရမ်းချဉ်သီး၊ ရုံးပတီသီး၊ခရမ်းသီး စသည့်သီးနှံများကို တစ်နိုင်တစ်ပိုင် စိုက်ပျိုးလာကြပါသည် ။ ကျောက်ဆည်ခရိုင်၊စားသုံးသူရေးရာဦးစီးဌာနမှ ဝန်ထမ်းများသည် ကျောက်ဆည်မြို့၊ အနောက်သာဂရကျေးရွာရှိ တောင်သူ ဦးဇော်မင်း၏ ခရမ်းသီးစိုက်ခင်းများအား ကွင်းဆင်းလေ့လာခဲ့ပါသည် ။ ခရမ်းသီး (အလုံး သေး) စိုက်ပျိုးမည်ဆိုလျှင် မျိုးစေ့ကို ပျိုးထောင်ပြီး တစ်လခွဲသား အရွယ်တွင် စိုက်ပျိုးရကြောင်း၊ စိုက်ပျိုးပြီး နှစ်လခွဲ၊ သုံးလအချိန်တွင် အသီးများစတင်ခူးဆွတ်နိုင်ပြီး (၄) ရက်ခြားတစ်ကြိမ် ခူး ဆွတ်ရကြောင်း၊ စတင်ခူးဆွတ်သည်မှ တစ်ပတ်ထက်တစ်ပတ် အထွက်နှုန်း ပိုမိုထွက်ရှိလာပြီး အပင်(၆)လ သားကျော်မှသာ အထွက်နှုန်းနည်းသွားကြောင်း ၊ အထွက်နှုန်းအနေဖြင့် (၁) ဧကလျှင် စတင်ခူးဆွတ်ချိန်တွင် ပိဿာချိန် (၄၀-၅၀) ခန့်အထိ ထွက်ရှိပြီး ၊ အထွက်နှုန်းအများဆုံးအချိန်တွင် ပိဿာ (၃၀၀-၄၀၀) ခန့်ထွက်ရှိပါသည် ။ ခရမ်းသီး (အလုံးသေး) များအား ထမင်းဆိုင်များမှ အတို့အမြုပ်အဖြစ် အများဆုံးအသုံးပြုကြောင်း သိရှိရပါသည် ။ (၁)ဧက ကုန်ကျစရိတ်အနေဖြင့် ပျိုးထောင် ၊ မြေပြင် ၊ သွင်းအားစု၊ စိုက်ပျိုးစရိတ်၊ လုပ်သားခ စုစုပေါင်း(၈၀၀၀၀၀-၁၀၀၀၀၀၀) ကျပ် ဝန်းကျင်ခန့် ကုန်ကျကြောင်း၊ ခရမ်းသီး(အလုံးသေး)ကို အနည်းဆုံး (၅) လကျော်အထိ ခူးဆွတ်နိုင်ပြီး ယခုအခါ ခရမ်းသီး (အလုံးသေး) (၁)ပိဿာလျှင် (၄၀၀-၅၀၀)ကျပ် စျေးနှုန်းများဖြင့် ရောင်းချရကြောင်း ၊ ကုန်စိမ်း ဖြစ်သည့်အတွက် တစ်ပတ်နှင့်တစ်ပတ် စျေးနှုန်းမတူညီကြောင်း ၊ ပျမ်းမျှအားဖြင့် (၁)ပိဿာလျှင် အနည်းဆုံး(၂၅၀-၅၀၀)ကျပ်အထိ ရောင်းချရသောကြောင့် ရာသီသိမ်းသည်အထိ စုစုပေါင်း (၁)ဧကဝင်ငွေ (၂၀)သိန်းခန့်ရရှိကြောင်း သိရှိရပါသည်။ ကုန်စိမ်းပွဲစားများမှ စိုက်ခင်းထဲသို့လာရောက် ဝယ်ယူသည့်အတွက် တင်ပို့ရောင်းချစရိတ် သက်သာကြောင်း ၊ ပွဲစားများ မှမန္တလေး၊ နေပြည်တော်၊ ရန်ကုန်စျေးကွက်များသို့ တင်ပို့ရောင်းချကြောင်း သိရှိရပါသည်။ (၁)ဧက အကျိုးအမြတ်အနေဖြင့် စိုက်ပျိုးသည့် (၅)လကျော် ကာလအတွင်း (၈)သိန်း မှ (၁၀) သိန်းကျော် အထိရရှိသဖြင့် တိုးချဲ့စိုက်ပျိုးသင့်သော သီးနှံတစ်မျိုးဖြစ်ပါကြောင်း ရေးသားတင်ပြအပ်ပါသည်။
DOCA (မန္တလေး)