အိန္ဒိယနိုင်ငံ၌ စားတော်ပဲဝါ တင်သွင်းမှုအပေါ် အကောက်ခွန်ကင်းလွတ်သက်သာခွင့် ပေးအပ်ထားသော ကာလသည် အမိန့်ကြော်ငြာစာ တစ်စုံတစ်ရာမျှ ထပ်မံထုတ်ပြန်ခြင်းမရှိပဲ ကုန် ဆုံးခဲ့ပြီဖြစ်သည်ဟု ကုန်သွယ်ရေးသတင်းအရင်းအမြစ်များက ပြောဆိုခဲ့ကြသည်။
အိန္ဒိယအစိုးရသည် စားတော်ပဲတင်သွင်းမှုနှင့် စပ်လျဉ်း၍ အကောက်ခွန်ကင်းလွတ်ခွင့်ကို ၂၀၂၃ ခုနှစ် ဒီဇင်ဘာလ ၈ ရက်နေ့မှ စတင်ခွင့်ပြုခဲ့ခြင်းဖြစ်ပြီး သက်တမ်းအကြိမ်ကြိမ် တိုးမြှင့်ပေး ခဲ့ရာ ၂၀၂၄ ခုနှစ် ဒီဇင်ဘာ ၂၅ ရက်နေ့၌ နောက်ဆုံးကြိမ် သက်တမ်းတိုးပေးခဲ့သော ကာလသည် ယခုနှစ် ဖေဖော်ဝါရီ ၂၈ ရက်နေ့တွင် ကုန်ဆုံးခဲ့ခြင်းဖြစ်သည်။
၂၀၂၃ ခုနှစ်၌ ပထမဦးဆုံးထုတ်ပြန်ခဲ့သော အမိန့်ကြော်ငြာစာတွင် အကယ်၍ နောက်ထပ် အမိန့်တစ်စုံတစ်ရာ ထုတ်ပြန်ခြင်းမပြုခဲ့ပါက သွင်းကုန်အခွန်စည်းကြပ်မှုကို မူလအတိုင်း ပြန် လည်ကောက်ခံမည်ဟု ဖော်ပြထားခဲ့သည်။ ကုန်သည်အသိုင်းအဝိုင်း၏ ပြောဆိုမှုအရ ယခုအခါ စားတော်ပဲဝါ တင်သွင်းမှုအပေါ် အကောက်ခွန် ၃၀ ရာခိုင်နှုန်းနှင့် ထိုကဲ့သို့ စည်းကြပ်သည့်အခွန် အပေါ် လယ်ယာစိုက်ပျိုးရေး အခြေခံအဆောက်အအုံ ရန်ပုံငွေ ခိုင်ကြေး ၁၀ ရာခိုင်နှုန်း ကောက်ခံ မည်ဖြစ်ရာ စုစုပေါင်းအခွန် ၃၃ ရာခိုင်နှုန်း ပေးဆောင်ရလိမ့်မည်ဖြစ်ကြောင်း သိရှိရသည်။ ထို့ အပြင် စားတော်ပဲဝါကို ကောလ်ကတ္တားဆိပ်ကမ်း တစ်ခုတည်းမှသာ တင်သွင်းခွင့်ရရှိမည်ဖြစ်ပြီး ဆိပ်ကမ်းအရောက် ပဲတစ်ကီလိုဂရမ်၏ အရင်းတန်ဖိုးသည် အနိမ့်ဆုံးအားဖြင့် ရူပီး ၂၀၀ ရှိရမည် ဖြစ်သည်။
ပဲမျိုးစုံကုန်သွယ်မှုနယ်ပယ်၌ စားတော်ပဲဝါ ပြဿနာကို တဖြည်းဖြည်းချင်း ဖြေရှင်းနိုင်ခဲ့ပြီ ဖြစ်သည်ဟု ကုန်သွယ်ရေး အရင်းအမြစ်တစ်ရပ်က ပြောကြားခဲ့သည်။ ယခုအခါ အိန္ဒိယသို့ စားတော်ပဲ တင်သွင်းရာတွင် ၂၀၂၅ ခုနှစ် ဖေဖော်ဝါရီလ ၂၈ ရက်နေ့ သို့မဟုတ် ၎င်းနေ့ရက် မတိုင်မီ ကုန်တင်ပို့လွှာ ထုတ်ပေးခဲ့သော သင်္ဘောတင်ပို့မှုများကိုသာ ခွင့်ပြုမည်ဖြစ်ပြီး ကုန်စည်များသည် ၂၀၂၅ ခုနှစ် မတ်လ ၃၁ ရက်နေ့ နောက်ဆုံးထား၍ အိန္ဒိယဆိပ်ကမ်းသို့ ရောက်ရှိရမည်ဖြစ်သည်။
အိန္ဒိယနိုင်ငံအနေဖြင့် ၂၀၂၄ ခုနှစ်အတွင်း စားတော်ပဲဝါကို အနည်းဆုံး တန်ချိန် ၃ သန်းခန့် တင်သွင်းခဲ့ရာ အဓိကအားဖြင့် ကနေဒါနိုင်ငံထံမှ ရယူခဲ့ခြင်းဖြစ်သည်။ ထိုသို့ ပမာဏ အမြောက် အမြား တင်သွင်းခြင်းက ပဲစင်းငုံ၊ မတ်ပဲနှင့် ကုလားပဲတို့ကဲ့သို့သော အခြားပဲမျိုးများ၏ ဈေးနှုန်း များအပေါ် ဖိအားများသက်ရောက်မှုရှိပြီး ယခုအခါ ၎င်းတို့အနက် အချို့မှာ အစိုးရက အထောက် အပံ့ပြုသည့် အခြေခံရည်ညွှန်းဈေးနှုန်း၏ အောက်၌ အရောင်းအဝယ်ပြုလျက်ရှိကြသည်။
သို့ဖြစ်ရာ တောင်သူလယ်သမားများအပေါ် ထိခိုက်မှုမရှိစေရေးအတွက် အကောက်ခွန် စည်းကြပ်ခြင်းကို ပြန်လည်ကျင့်သုံးရန် အစိုးရထံသို့ အိန္ဒိယ ပဲမျိုးစုံနှင့် ကေက်ပဲသီးနှံအသင်းက တောင်းဆိုထားခဲ့ခြင်းဖြစ်သည်။ အခြားတစ်ဖက်တွင်မူ စားတော်ပဲကို ဈေးနှုန်းမြှင့်တင်ရောင်းချ နိုင်မည့် အခွင့်အရေးကိုရယူမှု ဖြစ်ပေါ်လာနိုင်သည်။ ပြည်တွင်းဈေးကွက်၌မူ အကောက်ခွန် သက်သာခွင့် ပေးအပ်ထားမှု အဆုံးသတ်လာနိုင်ခြေကို မျှော်လင့်လျက် ပဲမျိုးစုံဈေးနှုန်းများသည် ပြန်လည်၍ စတင်မြင့်တက်လျက်ရှိသည်။
အခွန်စည်းကြပ်မှု ပြန်လည်စတင်ခဲ့ချိန် နောက်ပိုင်း၌ ပဲမျိုးစုံဈေးနှုန်းများသည် ၁ ကွင်တယ် (၁၀၀ ကီလိုဂရမ်) အပေါ် ရူပီးငွေ ၁၅၀ ကျော် မြင့်တက်လာခဲ့ကြောင်း၊ ယခုအချိန်မှစ၍ မတ်ပဲ၊ ကုလားပဲနှင့် ပဲနီလေးတို့၏ ဈေးနှုန်းများမှာ မြင့်မားလာဖွယ်ရှိကြောင်း၊ အကောက်ခွန်ကင်းလွတ် လျက် တင်သွင်းခွင့် သို့မဟုတ် အခွန်နှုန်းထားလျှော့ချလျက် တင်သွင်းခွင့်ကို ဆက်လက်ထား ရှိခြင်းနှင့် စပ်လျဉ်း၍ စိုက်ပျိုးရေးဝန်ကြီးဌာန၏ ဆောင်းသီးနှံပဲမျိုးစုံ ထွက်ရှိနိုင်မည့် ခန့်မှန်းချက် ထုတ်ပြန်ပြီးချိန်တွင် ဆုံးဖြတ်ချက်တစ်ရပ် ချမှတ်လိမ့်မည်ဖြစ်ကြောင်း ကုန်သည်အသိုင်းအဝိုင်း က ပြောဆိုခဲ့ကြသည်။
Source: The Hindu Business Line , March 01, 2025(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)